استانا مەن الماتىدا فرانسۋز مەكتەپتەرى اشىلادى - توقايەۆ پەن ماكروننىڭ بىرلەسكەن مالىمدەمەسى
بۇل تۋرالى قازاقستان پرەزيدەنتى قاسىم-جومارت توقايەۆ پەن فرانسيا پرەزيدەنتى ەممانيۋەل ماكروننىڭ بىرلەسكەن مالىمدەمەسىندە ايتىلعان، دەپ حابارلايدى قازاقپارات.
مالىمدەمەدە پرەزيدەنتتەر ءبىلىم سالاسىنداعى ىنتىماقتاستىقتىڭ باسىمدىلىعىن اتاپ وتكەن.
«ولار استانا مەن الماتىدا ەكى فرانسۋز مەكتەبىن اشۋعا جانە دامىتۋعا قولداۋ ءبىلدىردى.
ستۋدەنتتەردىڭ ۇتقىرلىعىن، اتاپ ايتقاندا «اباي-ۆەرن» باعدارلاماسى شەڭبەرىندە شاكىرتاقىلار سانىنىڭ كوبەيۋىنە جانە «بولاشاق» باعدارلاماسى بويىنشا فرانسۋز جوعارى وقۋ ورىندارى ءتىزىمىن كەڭەيتۋ ارقاسىندا ارتتىرۋدى قولدادى.
سونداي-اق سوربوننا-قازاقستان ينستيتۋتىن قايتا فورماتتاۋدى قولدايتىندىقتارىن ءبىلدىردى جانە 2022-جىلعى 30- قاراشادا پاريجدە 7- قازاقستان-فرانسيا جوعارى ءبىلىم فورۋمىنىڭ ءوتۋىن، سونداي-اق ءبىلىم بەرۋ سالاسىنداعى ءبىرقاتار قۇجاتتارعا قول قويۋدى قۇپتادى»، - دەلىنگەن اقورداعا جاريالاعان بىرلەسكەن قۇجاتتا.
