ءماجىلىس قازاقى تازى مەن توبەت تۇقىمىن ساقتاپ، كوبەيتۋ تۋرالى زاڭ جوباسىن ماقۇلدادى
قۇجات قازاقستاننىڭ كەيبىر زاڭنامالىق اكتىلەرىنە قازاقى ءيت تۇقىمدارىن ساقتاۋ جانە ءوسىمىن كوبەيتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋدى كوزدەيدى.
پارلامەنت ءماجىلىسى ەكونوميكالىق رەفورما جانە وڭىرلىك دامۋ كوميتەتىنىڭ مۇشەسى ءامىرحان راحىمجانوۆتىڭ ايتۋىنشا، زاڭ جوباسىنىڭ نەگىزگى ماقساتى - يتتەردىڭ ۇلتتىق تۇقىمدارىن ساقتاۋ جانە ءوسىمىن مولايتۋ سالاسىنداعى قىزمەتتى جۇزەگە اسىرۋدىڭ قۇقىقتىق، ۇيىمداستىرۋشىلىق جانە ەكونوميكالىق نەگىزدەرىن بەلگىلەۋ.
وزگەرىستەر مەن تولىقتىرۋلار «جانۋارلار دۇنيەسىن قورعاۋ، ءوسىمىن مولايتۋ جانە پايدالانۋ تۋرالى» جانە «قازاقستان رەسپۋبليكاسىنداعى مەملەكەتتىك الەۋمەتتىك تاپسىرىس، ستراتەگيالىق ارىپتەستىكتى ىسكە اسىرۋعا ارنالعان مەملەكەتتىك تاپسىرىس، ۇكىمەتتىك ەمەس ۇيىمدارعا ارنالعان گرانتتار جانە سىياقىلار تۋرالى» قازاقستان رەسپۋبليكاسىنىڭ زاڭدارىنا ەنگىزىلىپ وتىر.
«سونداي- اق، زاڭ جوباسىندا مەملەكەتتىك ساياساتتى ىسكە اسىرۋ، يتتەردىڭ ۇلتتىق تۇقىمدارىن ساقتاۋ جانە ءوسىمىن مولايتۋ سالاسىنداعى نورماتيۆتىك قۇقىقتىق اكتىلەردى بەكىتۋ، يتتەردىڭ ۇلتتىق تۇقىمدارىنىڭ ەسەبىن جۇرگىزۋ بويىنشا مونيتورينگتى جۇزەگە اسىرۋ جونىندەگى ۋاكىلەتتى ورگاننىڭ قۇزىرەتى بەلگىلەنگەن»، - دەدى كوميتەت مۇشەسى.
اتالعان زاڭ جوباسىن ىسكە اسىرۋ ءۇشىن 1,4 ميلليارد تەڭگە قاراجات كەرەك دەگەن ەسەپ بار.
ەسكە سالساق، تامىز ايىندا قازاقى تازى مەن توبەتتى ساقتاۋ ماسەلەسىن پرەزيدەنتتىڭ ءىس باسقارماسى قولعا العانى حابارلانعان.
قازاقى تازى مەن توبەت تۇقىمىن ساقتاپ، مولايتۋعا جاۋاپتى ۋاكىلەتتى ورگان قۇرىلماقشى. ماجىلىستە قارالعان زاڭ جوباسىندا وسىنداي ماسەلە كوتەرىلدى.
قۇجاتتىڭ تولىق اتاۋى - «قازاقستان رەسپۋبليكاسىنىڭ كەيبىر زاڭنامالىق اكتىلەرىنە يتتەردىڭ ۇلتتىق تۇقىمدارىن ساقتاۋ جانە ءوسىمىن مولايتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى.
زاڭ جوباسى بويىنشا جاسالعان قورىتىندىنى دەپۋتاتتارعا پارلامەنت ءماجىلىسى ەكونوميكالىق رەفورما جانە وڭىرلىك دامۋ كوميتەتىنىڭ مۇشەسى ءامىرحان راحىمجانوۆ تانىستىردى.
ايتۋىنشا، زاڭ جوباسى ماقۇلدانسا، قازاقى تازى مەن توبەت تۇقىمىن ساقتاۋ جانە ءوسىمىن مولايتۋعا جاۋاپتى ۋاكىلەتتى ورگان قۇرىلادى.
ول ۇيىمنىڭ قازىرگى شارتتى اتاۋى - قازاقى ءيت تۇقىمدارىنىڭ ۇلتتىق ورتالىعى.
«ورتالىقتىڭ نەگىزگى قۇزىرەتىنە ءبىرىڭعاي اسىل تۇقىمدى قازاقى تازى مەن توبەتتىڭ كىتابىن جۇرگىزۋ، اتالعان تۇقىمداردىڭ ستاندارتتارىن ازىرلەۋ جانە باسقا دا مىندەتتەر كىرەدى. سونىمەن قاتار، زاڭ جوباسى كينولوگيالىق قىزمەت ۇعىمدارىن، قازاقى تۇقىمدى ءيتتىڭ شىعۋ تەگى تۋرالى كۋالىكتى، ءبىرىڭعاي اسىل تۇقىمدى كىتاپتى، قازاق ءيت تۇقىمدارى مەن ۇلتتىق اڭشىلىق ستاندارتىن ايقىندايدى»، - دەدى دەپۋتات.
مەملەكەت بۇل ورتالىقتى وسى سالادا جۇمىس ىستەيتىن قوعامدىق بىرلەستىكتەرگە مەملەكەتتىك الەۋمەتتىك تاپسىرىس ارقىلى قارجىلاندىرىپ، قولداۋ كورسەتپەك.
«سونداي- اق، زاڭ جوباسىندا قازاقستان رەسپۋبليكاسىنىڭ عىلىمي ۇيىمدارى جۇزەگە اسىراتىن قازاق ءيت تۇقىمدارىن ساقتاۋ جانە ءوسىمىن مولايتۋ سالاسىنداعى عىلىمي زەرتتەۋلەر جونىندەگى نورما كوزدەلگەن. عىلىمي ۇيىمدار ۋاكىلەتتى ورگانمەن، ۇلتتىق ورتالىقپەن، سونداي- اق كينولوگيالىق قىزمەتتى جۇزەگە اسىراتىن قوعامدىق بىرلەستىكتەرمەن بىرلەسىپ، قازاقتىڭ ءيت تۇقىمدارىن ساقتاۋ جانە ءوسىمىن مولايتۋ سالاسىندا مەملەكەتتىك عىلىمي- تەحنيكالىق باعدارلامالار ازىرلەيدى. زاڭ جوباسىنىڭ نورمالارىن ىسكە اسىرۋ ءۇشىن 1,4 ميلليارد تەڭگە قاجەت بولادى. بۇل سوما 18- قازاندا رەسپۋبليكالىق بيۋدجەت كوميسسياسىنىڭ وتىرىسىندا قولداۋ تاپتى»، - دەدى ءامىرحان راحىمجانوۆ.
ەسكە سالساق، تامىز ايىندا قازاقى تازى مەن توبەتتى ساقتاۋ ماسەلەسىن پرەزيدەنتتىڭ ءىس باسقارماسى قولعا العانى حابارلانعان.
فوتو: mydog.press
اۆتور
ەسىمجان ناقتىباي
