شەكارادان وتكەن كولىكتەردەن اقى الىپ وتىرعان قىلمىستىق توپ ۇستالدى
مينيسترلىكتىڭ ۇيىمداسقان قىلمىسقا قارسى كۇرەس دەپارتامەنتى ۇ ق ك 5 دەپارتامەنتىمەن بىرلەسىپ، وزبەكستانمەن شەكارالاس تۇركىستان وبلىسىنىڭ «قازىعۇرت» كەدەن بەكەتىندە قىلمىستىق ارەكەتپەن اينالىسقان توپتى ۇستاۋ ءۇشىن اۋقىمدى ارنايى وپەراتسيا جۇرگىزدى.
اتالعان ادامدار كەدەن بەكەتىندەگى سىبايلاس جەمقورلىق بايلانىستارىن پايدالانا وتىرىپ، «بروكەرلىك قىزمەت» كورسەتۋ دەگەن جەلەۋمەن تاۋارلاردى جۇيەلى تۇردە جالعان قۇجاتپەن زاڭسىز اكەلىپ وتىرعان.
تاسىمالداناتىن جۇككە بايلانىستى ءبىر جۇك كولىگىنىڭ كەدەرگىسىز كىرىپ- شىعۋى ءۇشىن 200 مىڭ تەڭگەگە دەيىن اقى الىنعان.
بۇل كەيىننەن تاۋار قۇنىنىڭ وسۋىنە اسەر ەتكەن. تاۋلىگىنە كەدەن بەكەتى ارقىلى 150-گە جۋىق اۆتوكولىك وتكەن.
سونىمەن قاتار، قىلمىسكەرلەر كورشى ەلدىڭ ازاماتتارىنىڭ مەملەكەتتىك شەكارانى زاڭسىز كەسىپ وتۋىنە قىلمىستىق قولداۋ كورسەتكەن.
جەدەل قىزمەتكەرلەر بۇكىل قىلمىستىق سحەمانى انىقتاپ، قۇجاتتادى.
ءبىر مەزگىلدە ءتىنتۋ جۇرگىزىلىپ، ءىرى كولەمدەگى اقشا، اتىس جانە سۋىق قارۋ تۇرلەرى، «قارا كاسسانىڭ» ەسەپكە الۋ جازبالارى، شەتەل ازاماتتارىنىڭ پاسپورتتارى، ارنايى تەحنيكالىق قۇرالدار تاركىلەندى.
قازىرگى ۋاقىتتا سوتقا دەيىنگى تەرگەۋ ءجۇرىپ جاتىر.
كىنالى ادامدارعا قاتىستى بۇلتارتپاۋ شاراسىن تاعايىنداۋ ماسەلەسى قاراستىرىلىپ جاتىر.
