پرەزيدەنت شەتەلدەن قايتارىلعان اكتيۆتەر قايدا جۇمسالاتىنىن ايتتى
«ءبىز ادىلدىكتى قالپىنا كەلتىرىپ، ەلدەن زاڭسىز شىعارىلعان بارلىق اكتيۆتى قايتارۋعا ءتيىسپىز. بۇل ءۇشىن ۇكىمەت زاڭسىز شىعارىلعان كاپيتالدى قايتارۋ ءۇشىن قاجەتتى راسىمدەردى رەتتەيتىن زاڭ جوباسىن ازىرلەيدى. سونىمەن قاتار زاڭ جوباسى ادىلەتسىز بايۋعا جانە اكتيۆتەردى زاڭسىز شىعارۋعا ىقپال ەتەتىن سەبەپتەر مەن شارتتاردى جويۋعا باعىتتالادى»، - دەدى قاسىم- جومارت توقايەۆ.
سونىمەن بىرگە، پرەزيدەنت قايتارىلعان بارلىق قاراجات ازاماتتاردىڭ يگىلىگىنە جۇمسالۋى قاجەتتىگىن باسا ايتتى.
«بۇل قارجىنى جوعارى تەحنولوگيالى ءوندىرىس ورىندارىن اشۋعا، مەكتەپتەر مەن اۋرۋحانالار سالۋعا، الەۋمەتتىك جوبالاردى جۇزەگە اسىرۋعا پايدالانۋ كەرەك. ءتيىستى جارلىققا بۇگىن قول قويامىن. جاقىن ارادا اۋقاتتى كاسىپكەرلەر حالىقتىڭ يگىلىگى ءۇشىن وزدەرىنىڭ الەۋمەتتىك جاۋاپكەرشىلىگىن جانداندىرادى دەپ ويلايمىن»، - دەدى ق. توقايەۆ.
زاڭ الدىندا ءبارىنىڭ تەڭ بولۋى - مەملەكەتىمىزدىڭ ۇزاق مەرزىمدى دامۋىنىڭ نەگىزگى شارتى.
«شىنايى زاڭ ۇستەمدىگىن قامتاماسىز ەتپەي، ادىلەتتى ءارى نارىقتىق ەكونوميكانى قۇرۋ، جەكە مەنشىكتى قورعاۋ، باسەكەلەستىكتى دامىتۋ، سىبايلاس جەمقورلىقتى جويۋ مۇمكىن ەمەس. سوندىقتان زاڭ الدىندا ءبارىنىڭ تەڭ بولۋى - مەملەكەتىمىزدىڭ ۇزاق مەرزىمدى دامۋىنىڭ نەگىزگى شارتى. بارلىق ماسەلە، اسىرەسە تۇيتكىلدى جانە داۋلى پروبلەمالار كونسترۋكتيۆتى ديالوگ ارقىلى، ەڭ الدىمەن، پارلامەنتتە شەشىلۋگە ءتيىس. الداعى سەنات جانە ءماجىلىس سايلاۋى وسى مۇمكىندىكتى بەرەدى»، - دەدى قاسىم- جومارت توقايەۆ.
مەملەكەت باسشىسى «ءتۇرلى كوزقاراس، ءبىراق ءبىرتۇتاس ۇلت» قاعيداتىن قاتاڭ ساقتاۋىمىز كەرەكتىگىن باسا اتاپ ءوتتى.
«ءبىز «بىرلىگىمىز - ءارالۋاندىقتا» فورمۋلاسىندا كورىنىس تاپقان حالقىمىزدىڭ تاريحي جەتىستىكتەرىن جان- جاقتى ەسەلەۋگە ءتيىسپىز. قوعامدا ارازدىق تۋعىزاتىن جانە ۇلتتىڭ بىرلىگىن بۇزاتىن، تۇپتەپ كەلگەندە، مەملەكەتىمىزگە قارسى باعىتتالعان ارانداتۋشىلىق ارەكەتتەرگە قاتاڭ توسقاۋىل قويىلادى»، - دەدى ق ر پرەزيدەنتى.
اۆتور
مارلان جيەمباي
