مەملەكەت باسشىسى: سايلاۋ ناتيجەسىن حالقىمنىڭ باتاسى دەپ بىلەمىن

«شىن مانىندە، ەل سەنىمىن ەش نارسەمەن ولشەۋ مۇمكىن ەمەس. حالىقتىڭ سەنىمى - ەڭ قۇندى نارسە. سايلاۋ ناتيجەسىن حالقىمىزدىڭ ساياسي باعدارىما - باعاسى، الداعى جوسپارىما - باتاسى دەپ قابىلدايمىن. حالقىنىڭ قولداۋىنا يە بولىپ، ەل تىزگىنىن ۇستاۋ - ەر ازامات ءۇشىن ەڭ بيىك مارتەبە ءارى وراسان زور جاۋاپكەرشىلىك»، - دەدى پرەزيدەنت.

قاسىم-جومارت توقايەۆ حالىقتىڭ سەنىمىن وزىنە بەرىلگەن امانات دەپ قابىلدايتىنىن اتاپ ءوتتى.

«الداعى 7 جىلدى بۇگىنگى بۋىننىڭ جانە كەلەشەك ۇرپاقتىڭ الدىنداعى بورىشىمدى وتەۋگە بەرىلگەن بىرەگەي مۇمكىندىك دەپ بىلەمىن. قازاقتا «امانات» دەگەن اسىل ۇعىم بار. حالقىمنىڭ سەنىمى - ماعان امانات. وسى اماناتقا ادال بولۋ - مەن ءۇشىن قاسيەتتى پارىز. ەل ءۇمىتىن اقتاپ، قازاقستاندى وركەندەگەن، باقۋاتتى مەملەكەتكە اينالدىرۋ ءۇشىن قولىمنان كەلگەننىڭ ءبارىن جاسايمىن»، - دەدى مەملەكەت باسشىسى.

ەسكە سالساق، ق ر ورتالىق سايلاۋ كوميسسياسىنىڭ شىعارعان قورىتىندىسى بويىنشا 20-قاراشاداعى كەزەكتەن تىس پرەزيدەنت سايلاۋىندا كانديدات قاسىم- جومارت توقايەۆ سايلاۋشىلاردىڭ 81,31 پايىز داۋىسىن جيناپ، جەڭىسكە جەتكەن بولاتىن.

وسىعان بايلانىستى ورتالىق سايلاۋ كوميسسياسى ق ر پرەزيدەنتىنىڭ انت بەرۋ كۇنىن 26-قاراشاعا بەلگىلەگەن ەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى