وقۋلىقتار سيفرلى فورماتقا كوشىرىلىپ جاتىر - اسحات ايماعامبەتوۆ
بۇل تۋرالى پرەزيدەنتتىڭ سايلاۋالدى باعدارلاماسىنداعى تارماقتارعا توقتالعان وقۋ- اعارتۋ ءمينيسترى اسحات ايماعامبەتوۆ الەۋمەتتىك جەلىدەگى پاراقشاسىندا جازدى، دەپ حابارلايدى قازاقپارات.
وقۋلىقتاردى سيفرلى فورماتقا كوشىرۋ جۇمىستارى جۇرگىزىلىپ جاتىر. بالالار سيفرلى ساباقتار، جاتتىعۋلار مەن تاپسىرمالارعا قوسىمشا قول جەتكىزىپ، مەكتەپتە ءداستۇرلى باسپا وقۋلىقتارىن پايدالانۋعا مۇمكىندىك الادى. وقۋلىقتار ۇيرەنشىكتى ءداستۇرلى قاعاز جانە سيفرلى فورماتتا قولجەتىمدى بولادى، - دەپ جازعان ۆەدومستۆو باسشىسى.
سونىمەن قاتار، 2023 -جىلدان باستاپ «جايلى مەكتەپ» ۇلتتىق جوباسى اياسىندا وقىتۋعا قولايلى جاعدايلارى بار 1,5 ميلليون وقۋشى ورنى بەرىلەدى.
جاڭا جايلى مەكتەپتەر مەن قازىرگى سالىنىپ جاتقان مەكتەپتەردىڭ تۇجىرىمدامالىق ايىرماشىلىقتارى - قۇرىلىستىڭ ءبىرىڭعاي ستاندارتىنىڭ ساقتالۋى، زاماناۋي ءپان كابينەتتەرىمەن جانە زەرتحانالارمەن تولىق جابدىقتالۋى، 1-4-سىنىپ وقۋشىلارى مەن 5-11-سىنىپ وقۋشىلارى ءۇشىن بولەك بلوكتاردىڭ بولۋى، قۇرىلىس جانە ارلەۋ ماتەريالدارىنىڭ ساپاسى جوعارى بولۋىندا جانە ت. ب. وقۋشىلاردىڭ سانىن ەسكەرە وتىرىپ، كوبىرەك سپورت زالدارى اشىلادى. قىزدار مەن ۇلداردى ەڭبەككە تاربيەلەۋ ءۇشىن ءار مەكتەپتە ارنايى شەبەرحانالار قاراستىرىلادى، - دەيدى اسحات ايماعامبەتوۆ.
مينيستر 1,5 ميلليون ورىن سالۋ - بىرتىندەپ ءبىر اۋىسىمدى وقۋ فورماتىنا كوشۋگە دە جول اشاتىن يگى باستاما ەكەنىن دە اتاپ وتكەن.
بۇعان دەيىن سابيلەردى 2 جاستان باستاپ بالاباقشامەن قامتۋ مىندەتى بەكىتىلگەنى حابارلانعان بولاتىن.
سونداي- اق، تۇرمىسى تومەن وتباسىلاردىڭ بالالارى بالاباقشادا تەگىن تاماقپەن قامتىلاتىنى ءمالىم بولدى. ءمينيستردىڭ ايتۋىنشا، بارلىق باستاۋىش سىنىپ وقۋشىلارى دا تەگىن ىستىق تاماقپەن قامتىلادى.
