بريۋس ليدىڭ جۇمباق ءولىمى: قۇپيا دەرەكتەر نە دەيدى؟
بريۋس ءليدىڭ ءولىمى
اتى الەمگە ايگىلى اكتەر 1973-جىلى 32 جاسىندا كەنەتتەن قايتىس بولدى. جاسالعان ساراپتامانىڭ قورىتىندىسىنا سايكەس، ليدىڭ ولىمىنە سەبەپ بولعان - ميداعى ىسىك. رەسمي نۇسقادا مي بولىگىندەگى ىسىك بريۋس ليدىڭ اۋىرسىنۋدى باساتىن دارىلەردى كوپ ىشۋىنەن دامىعان دەلىنگەن. الايدا بريۋس ليدىڭ ولىمىنە بايلانىستى ءتۇرلى قاۋەسەت تارالعان. ءتىپتى كەيبىرەۋلەر «قاستاندىقپەن ءولتىرىلدى» دەسە، ەندى ءبىرى «بريۋس ەسىرتكىنى كوپ قولدانعاننان قايتىس بولدى» دەگەن كۇماندى پىكىرلەر دە بولدى.
مادريدتىك عالىمدار 50 جىل بۇرىن بولعان قايعىلى وقيعاعا قايتا ورالىپ، جەكپە-جەك شەبەرىنىڭ بويىنداعى كىناراتتى انىقتاۋعا تىرىستى. ولاردىڭ زەرتتەۋى كينوجۇلدىز جانە پروديۋسەر بريۋس ليدىڭ جۇمباق ولىمىنە سۋدى كوپ ءىشۋ سەبەپ بولۋى مۇمكىن ەكەنىن كورسەتتى.
گيپوناتريەميا
ادام اعزاسىندا سۇيىقتىقتىڭ «شامادان تىس دوزالانۋى» ءوز كەزەگىندە گيپوناتريەميانى، ياعني، قان پلازماسىنداعى ناتري دەڭگەيىنىڭ تومەندەۋىن تۋعىزادى. ناتري ءبىزدىڭ دەنەمىزدەگى سۇيىقتىق بالانسىن ساقتاۋ ءۇشىن قاجەت.
عىلىمي زەرتتەۋدىڭ قورىتىندىسى بريۋستە گيپوناتريەميانىڭ بىرنەشە قاۋىپ فاكتورى بولعانىن كورسەتەدى. مىسالى ول قايتىس بولعانعا دەيىن كوپ مولشەردە سۇيىقتىق ىشكەن، سونداي-اق بۇيرەك قىزمەتىن تومەندەتەتىن ەسىرتكى مەن الكوگولدى قابىلداعان. وسى ارەكەت سالدارىنان گيپوناتريەميا اكتەردىڭ ولىمىنە اكەلەتىن تسەرەبرالدى ءىسىنۋدى تۋدىرۋى مۇمكىن.
«ءبىز بريۋس لي بۇيرەك قىزمەتىنىڭ بۇزىلۋىنىڭ ەرەكشە تۇرىنەن - سۋدىڭ گومەوستازىن ساقتاۋ ءۇشىن جەتكىلىكتى مولشەردە سۋدى بولە الماۋدان قايتىس بولدى دەپ بولجايمىز. مۇنىڭ اسەرىنەن گيپوناتريەميا بولىپ، مي ءىسىنىپ، ءتىپتى ومىردەن دە وتەدى»، - دەپ قورىتىندىلادى عالىمدار.
بريۋس لي 1973-جىلى 20- شىلدەدە گونكونگتا كوز جۇمادى. تانىمال اكتەر ءوزىنىڭ كينو سالاسىنداعى ەڭبەك جولىن 1941-جىلى «التىن قاقپاداعى قىز» فيلمىندە ءسابي رولىنەن باستاعان. كينو جۇلدىزىنىڭ ەڭ سوڭعى تۇسكەن فيلمى - 1978-جىلى جارىق كورگەن «ءولىم ويىنى». كەنەتتەن بولعان قايعىلى وقيعانىڭ سالدارىنان ءتۇسىرىلىم الاڭىندا كەلەڭسىز جاعداي كوپ بولعان. الايدا تۋىنداعان قيىندىقتارعا قاراماستان فيلم كورەرمەن كوڭىلىنەن شىعا ءبىلدى.
سىمبات ناۋحان
