ۇشاق كەشىكسە، تاسىمالداۋشىدان نە تالاپ ەتە الاسىز؟
سوڭعى كەزدەرى حالىق اراسىندا بۇل پروبلەما ءجيى تالقىلانىپ ءجۇر. ولار ۇشاقتارىنىڭ كەشىگىپ كەلگەنىن جانە سول ءۇشىن جوسپارلارىنىڭ بۇزىلعانىن ايتىپ، نارازىلىق ءبىلدىرىپ جاتىر.
الايدا كوپشىلىك كەي جاعدايدا زايا كەتكەن ۋاقىتى ءۇشىن اۆياكومپانيادان وتەماقى تالاپ ەتۋگە بولاتىنىن بىلە بەرمەيدى.
وتەماقىنى قانداي جاعدايدا تالاپ ەتە الاسىز؟
اۆياكومپانيا تەك ولاردىڭ كىناسىنەن بولعان ىڭعايسىزدىقتاردى وتەيدى. مىسالى، رەيسىڭىز ۇشاق ۇشۋعا دايىن بولماعاندىقتان كىدىرىپ قالدى. بۇل تاسىمالداۋشىنىڭ كىناسى.
ال قولايسىز اۋا رايى نەمەسە اۋەجاي پروبلەمالارىنا اۆياكومپانيا اسەر ەتە المايدى، سوندىقتان بۇل جاعدايدا ولار وتەماقى تولەۋگە مىندەتتى ەمەس.
سوندىقتان الدىمەن رەيستىڭ كەيىنگە شەگەرىلۋ سەبەبىن ءبىلىپ الىڭىز. ونى اۋەجايداعى اۆياكومپانيا وكىلىنەن نەمەسە تاسىمالداۋشىنىڭ جەدەل تەلەفون جەلىسىنە قوڭىراۋ شالۋ ارقىلى انىقتاي الاسىز.
ەگەر سويلەسە كەلە، رەيستىڭ كەيىنگە شەگەرىلۋى اۆياكومپانيانىڭ كىناسى ەكەنىن انىقتاساڭىز، ولاردان وتەماقى تالاپ ەتە الاسىز. ول ءسىزدىڭ قاي ەلدەن ۇشىپ بارا جاتقانىڭىزعا جانە تاسىمالداۋشى-اۆياكومپانيا قاي جەردە تىركەلگەنىنە بايلانىستى.
قازاقستان جولاۋشىلارىنىڭ قۇقىعىن «قازاقستان رەسپۋبليكاسىنىڭ اۋە كەڭىستىگىن پايدالانۋ جانە اۆياتسيا قىزمەتى تۋرالى» زاڭى قورعايدى. ونىڭ 86-بابىنا سايكەس، ۇشاق ۇشپاي قالسا نەمەسە ۇشاق كىدىرسە جانە وعان تاسىمالداۋشى كىنالى بولسا، ولار سىزگە مىنا قىزمەتتەردى ۇسىنۋعا مىندەتتى:
1) 7 جاسقا دەيىنگى بالاسى بار جولاۋشىعا انا مەن بالا بولمەسىن ۇسىنۋ؛
2) رەيستىڭ جونەلتىلۋىن 2 ساعاتتان كوپ كۇتسەڭىز، ۇزاقتىعى 5 مينۋتتان اسپايتىن 2 تەلەفون قوڭىراۋىن شالۋعا (ونىڭ ىشىندە حالىقارالىق بايلانىس جەلىسى بويىنشا قوڭىراۋ شالۋ دا كىرەدى) نەمەسە ەلەكتروندىق پوشتا ارقىلى ەكى حابارلاما جىبەرۋگە مۇمكىندىك بەرۋ؛
3) رەيستىڭ جونەلتىلۋىن 2 ساعاتتان اسا كۇتكەن كەزدە سالقىنداتىلعان سۋسىندارمەن قامتاماسىز ەتۋ؛
4) رەيستىڭ جونەلتىلۋىن 4 ساعاتتان كوپ كۇتسەڭىز، كۇندىزگى ۋاقىتتا - ءاربىر 6 ساعات سايىن، ال تۇنگى ۋاقىتتا ءاربىر 8 ساعات سايىن ىستىق تاماقپەن قامتاماسىز ەتۋ؛
5) رەيستىڭ ۇشۋىن كۇندىزگى ۋاقىتتا 8 ساعاتتان اسا جانە تۇنگى ۋاقىتتا 6 ساعاتتان اسا كۇتكەن كەزدە قوناق ۇيگە ورنالاستىرۋعا جانە تاسىمالداۋشى كولىكپەن اۋەجايدان قوناق ۇيگە دەيىن جانە كەرى قاراي جەتكىزۋ قىزمەتتەرىن كورسەتۋدى ۇيىمداستىرۋعا مىندەتتى.
6) ەگەر تاسىمالداۋشىنىڭ كىناسىنەن ۇشاق ۇشپاي قالسا نەمەسە ونىڭ ۇشۋىن 10 ساعاتتان كوپ كۇتسەڭىز، جولاۋشىنىڭ قالاۋىنا قاراي جاقىن ارادا ۇشاتىن رەيسپەن تاسىمالداۋدى قامتاماسىز ەتۋى نەمەسە جولاۋشى بيلەتىنىڭ قۇنىن قايتارۋعا مىندەتتى.
7) اۆياكومپانيانىڭ كەسىرىنەن رەيس كەشىككەن بولسا جانە ول ونىڭ ەڭسەرىلمەيتىن كۇشتىڭ سالدارىنان بولعانىن دالەلدەي الماسا، تاسىمالداۋشى جولاۋشىعا ءاربىر كىدىرتىلگەن ساعات ءۇشىن بيلەت قۇنىنىڭ 3 پايىز مولشەرىندە ايىپپۇل تولەيدى.
ەگەر اۆياكومپانيا بۇل قىزمەتتەردى ورىنداۋدان باس تارتسا، قازاقستان رەسپۋبليكاسى ۇلتتىق ەكونوميكا مينيسترلىگىنىڭ تۇتىنۋشىلاردىڭ قۇقىقتارىن قورعاۋ كوميتەتىنە جانە قازاقستان رەسپۋبليكاسى يندۋستريا جانە ينفراقۇرىلىمدىق دامۋ مينيسترلىگىنىڭ ازاماتتىق اۆياتسيا كوميتەتىنە شاعىمدانا الاسىز.
سەنات دەپۋتاتى دينار نوكەتايەۆا azattyq.org سايتىنا بەرگەن سۇحباتىندا شاعىم كوپ بولسا، قىزمەت ساپاسى دا جاقساراتىنىن ايتتى:
- ءوزىم دە ارىز-شاعىم جازىپ جۇرگەندى جەك كورەمىن. ول كوپ ۋاقىتىڭدى الادى. سوندىقتان جولاۋشىلاردىڭ شاعىمىن ەستۋ ءۇشىن «ەلەكتروندى ۇكىمەت» پورتالىن قولدانۋ كەرەك. ول جەردە ءبارى اشىق. حالىق سوعان ۇيرەنىپ كەلە جاتىر. قانشا دەگەنمەن، ۇلتتىق اۋە كومپانياسى دا ۇكىمەتكە باعىنۋى كەرەك. سوندا اۋە كومپانياسىنىڭ قىزمەتىنە كوڭىلى تولماعانداردىڭ شاعىمى ءتيىستى ورگانعا تەز جەتەدى.
قورىتىندىلاي كەلسەك، اۋە كومپانيالارى رەيس كەشىككەنى ءۇشىن جاۋاپقا تارتىلمايدى، تەك كەشىككەن جاعدايدا جولاۋشىلارعا ءتيىستى قىزمەتتەر كورسەتىلمەسە عانا ايىپپۇل سالىنادى. بۇل دەگەنىمىز رەيس كەشىككەن كەزدە ونىڭ سەبەبىن انىقتاپ، ەگەر ول اۆياكومپانيانىڭ كىناسى ەكەنى انىقتالسا، ءوز قۇقىقتارىڭىزدىڭ ورىندالۋىن تالاپ ەتۋگە تىرىسۋ كەرەك. وسىلايشا، قىزمەت ساپاسىنىڭ ارتۋىنا ءوز ىقپالىڭىزدى تيگىزە الاسىز.
massaget.kz
