زەينەتاقى جيناعىن پايدالانۋ شەگىن تومەندەتۋ قانشالىقتى ءتيىمدى - ءمينيستردىڭ جاۋابى
بۇل تۋرالى ق ر ۇلتتىق ەكونوميكا ءمينيسترى الىبەك قۋانتىروۆ ايتتى، دەپ حابارلايدى قازاقپارات ءتىلشىسى.
بۇدان بۇرىن حابارلانعانداي، جاقىندا ءماجىلىس دەپۋتاتى امانجان جامالوۆ زەينەتاقى جيناعىن پايدالانۋ شەگىن تومەندەتۋدى ۇسىنىپ، ۇكىمەت باسشىسىنا ساۋال جولدادى.
«بۇل ماسەلە كۇن تارتىبىندە تۇرعان جوق. ال جەكە ءوزىمنىڭ كوزقاراسىما توقتالسام، مۇنداي قادامعا قارسىمىن. ويتكەنى زەينەتاقى اۋدارىمدارىن الۋدىڭ ءبىرىنشى تولقىنى بويىنشا ەسەپتەۋلەر جۇرگىزىلگەن كەزدە، ادامداردىڭ ءتيىستى جاس ساناتىن قامتاماسىز ەتۋ ءۇشىن بەلگىلى ءبىر ەسەپتەۋلەر جۇرگىزىلدى. سوندىقتان زەينەتاقىعا قاتىستى ەڭ تومەنگى جەتكىلىكتى شەكتى تومەندەتۋ زەينەتاقى جيناعىن شەشىپ الۋدى ىنتالاندىراتىنى تۇسىنىكتى. وسىنىڭ سالدارىنان بولاشاقتا زەينەتكەرلەر ءۇشىن زەينەتاقى تولەمدەرىنىڭ جەتكىلىكسىز بولۋ تاۋەكەلدەرىن ايتارلىقتاي ارتتىرادى»، - دەدى ءا. قۋانتىروۆ سەناتتىڭ جالپى وتىرىسىنان كەيىن تىلشىلەر ساۋالىنا جاۋاپ بەرە وتىرىپ.
ونىڭ پايىمىنشا، زەينەتاقى جيناعىن پايدالانۋ شەگىن تومەندەتۋ سالدارىنان بيۋجەتكە قوسىمشا جۇك تە بولادى. بۇل تۇرعىدا زەينەتكەرلەردىڭ الەۋمەتتىك جاعدايىنا كەرى اسەر ەتەتىن ءتۇرلى فاكتورلار باستالادى.
ايتا كەتەيىك، بيىل ناۋرىز ايىندا ق ر پارلامەنتى ءماجىلىسىنىڭ دەپۋتاتى امانجان جامالوۆ ۇكىمەتتى زەينەتاقى جيناقتارىنىڭ ەڭ تومەنگى جەتكىلىكتى شەگىن قولدانۋ مەرزىمىن 2022-جىلدىڭ سوڭىنا دەيىن ۇزارتۋعا شاقىردى.
بيىل 1- ساۋىردەن باستاپ قازاقستاندا زەينەتاقى قاراجاتىنىڭ ءبىر بولىگىن مەرزىمىنەن بۇرىن پايدالانۋ ءۇشىن ەڭ تومەنگى جەتكىلىكتى شەگى ءوستى.
