قاراعاندى وبلىسىندا سۋپەر-پوليتسەي قىزمەت ەتىپ جاتىر

كۇنى كەشە كوك مۇزدا تايعاناقتاپ، اۋدارىلىپ، تۇتانا باستاعان كولىكتەن ەكى ادامدى الىپ شىقتى، دەپ حابارلايدى قازاقپارات ءتىلشىسى.

مەدەت اسقاروۆ ۇيدەگى 7 ۇلدىڭ ورتانشىسى. اكەسىنەن جاستاي ايىرىلىپ قالعان. ەشكىمنىڭ الا ءجىبىن اتتاماۋ، قاجەت كەزدە قول ۇشىن سوزۋدى انا تاربيەسىنەن بويعا دارىتقان. ەڭ العاش 2018 -جىلى 5 بالانى ورتتەن امان الىپ قالادى.

«ءبىر ايەل ومىراۋداعى بالاسىمەن دالاعا شىعىپ قۇلاپ، كومەك سۇرادى. ول «بالالارىمدى قۇتقار، ۇيدە ءورت بولىپ جاتىر، قارا ءتۇتىن الىپ كەتتى» دەدى. ۇيىنە جۇگىرىپ كىرىپ، كىمنىڭ اياعىن ۇستادىم، سونى سۇيرەتىپ، ۇيگە جەتكىزە بەردىم. جۇبايىمنان جەدەل جاردەم شاقىرۋدى سۇرادىم»، - دەيدى مەدەت اسقاروۆ.

ال بيىل جازدا ءتارتىپ ساقشىسى سۋعا باتىپ بارا جاتقان ەكى ادامدى قۇتقارادى.

«ارىپتەسىم «ەكى ايەل باتىپ جاتىر» دەپ تەلەفونمەن حابارلاستى. سودان مەن ءوز كولىگىممەن وزەنگە باردىم. سويتسەم ارىپتەسىم ءبىر ايەلدى قۇتقارىپ جاتىر ەكەن. ءبىراق ەكەۋى دە باتىپ بارادى. الدىمەن جەڭىلدەۋىن قولىنان ۇستاپ الىپ شىقتىم دا، كەيىن بار كۇشىمدى جيناپ، ەكىنشى ينگا دەگەن ايەلدى قۇتقاردىم»، - دەيدى بۇقار جىراۋ اۋداندىق پوليتسيا ءبولىمىنىڭ اعا لەيتەنانتى.

سوڭعى جاعداي كۇنى كەشە بولىپتى. تىلەگەن ەسىمدى اۋىل تۇرعىنى قاس قارايعان شاقتا جۇمىستان ۇيىنە قايتىپ كەلە جاتقاندا، جاقىندا عانا العان سۋ جاڭا كولىگى تاسجولدا اۋدارىلادى. ەكى بالانىڭ اكەسى ەسىنەن تانعانى نەمەسە قاتتى شوشىعانى ەسىندە جوق، ايتەۋىر ەسىك اشۋعا قاۋقارى بولماعان. ابىروي بولعاندا الدىندا مەدەت كەلە جاتىپ، بايقاپ قالادى.

«اۋا رايى قولايسىزدىعىنا بايلانىستى ازداعان بوران، كوكتايعاق بولدى. رۋلگە يە بولا الماي قالدىم. ماشينانى اۋدارىپ الدىق. كوكتايعاق، ماشينانى ءارى- بەرى لاقتىرا باستادى، ەكى رەت اينالىپ تۇستىك. كولىگىمنىڭ ىشىندە قاۋىپسىزدىك بەلدىگىن بوساتا الماي جاتقان كەزدە مەدەت دەگەن جىگىت كەلدى. وعان العىسىم شەكسىز»، - دەدى بوتاقارا كەنتىنىڭ تۇرعىنى تىلەگەن ساكەنوۆ.

مەدەت اسقاروۆتىڭ ءۇش بالاسى بار. ىشكى ىستەر سالاسىندا 16 جىلدان بەرى قىزمەت ەتىپ كەلەدى. سوڭعى جاساعان ەرلىگى ءۇشىن حالىق الەۋمەتتىك جەلىلەردە وعان ىقىلاسىن بىلدىرگەن. ال اۋداندىق پوليتسيا ءبولىمى وبلىس دەپارتامەنتىنە مەدەتكە قۇرمەت كورسەتىپ، ماراپاتتاۋ ۇسىنىسىن جاساعان. ءبىراق پوليتسيا اعا لەيتەنانتى ادام قۇتقارۋدى ادامگەرشىلىك بورىشىم دەپ سانايدى.

اۆتور

اگاتا مۋحامەدجانوۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى