شىمبۇلاق شيپاجايىنىڭ اۋماعىن پوليتسەيلەر شاڭعىمەن باقىلاپ ءجۇر

«شىمبۇلاق» تاۋ شاڭعىسى كۋرورتىنىڭ ديرەكتورى رينات ءابدىراحمانوۆتىڭ ايتۋىنشا، اتالعان جوبا 2019 -جىلدان بەرى جۇزەگە اسىرىلىپ كەلەدى.

«بىزدە كورىنبەيتىن مايدان جاۋىنگەرلەرى بار. دەسەك تە، بيىل قالادان شيپاجاي اۋماعىن شاڭعىمەن ءجۇرىپ باقىلايتىن پوليتسيا قىزمەتكەرلەرىن سۇرادىق. ءوتىنىشىمىز قاناعاتتاندىرىلدى. كەلەسى دۇيسەنبىدەن باستاپ 10 پوليتسيا قىزمەتكەرىن شاڭعى تەبۋگە ۇيرەتۋ ءۇشىن وقۋ پروتسەسىن باستايمىز»، - دەيدى سپيكەر.

سونداي- اق ول كۋرورتتا شاڭعى پاترۋلدەرى دە جۇمىس ىستەيتىنىن ايتتى. بيىل ولاردىڭ سانى 16 ادامعا ارتتى.

«ولاردىڭ تورتەۋى شاڭعى تەبۋدىڭ قاۋىپسىزدىگىن باقىلاپ، پوليتسيامەن بىرگە ءوزارا جۇمىس ىستەيدى»، - دەپ قوستى ول.

سونىمەن قاتار، سپيكەر دەمالىس ورنىنداعى قاۋىپسىزدىك ماسەلەسى تاۋ شاڭعىسى كۋرورتتارىنىڭ قىزمەتىن رەتتەيتىن زاڭنىڭ جوقتىعىنان تۋىنداپ وتىرعانىن تىلگە تيەك ەتتى.

ونىڭ ايتۋىنشا، شاڭعى پاترۋلدەرى نەمەسە كۋرورت قىزمەتكەرلەرى ەرەجەنى بۇزۋ تۋرالى ەسكەرتكەندەرى ءۇشىن كليەنتتەردەن ءجيى زارداپ شەگەدى.

رينات ءابدىراحمانوۆ ءتارتىپ ساقشىلارى حالىقارالىق FIS ەرەجەسىنىڭ ساقتالۋىن قاداعالايتىنىن ءتۇسىندىردى.

«دەمالىس كۇندەرى بەس پوليتسيا قىزمەتكەرى مەن ەكى كۋرورت ماماندارى، ال جۇمىس كۇندەرى ەكى پوليتسيا مەن ەكى كۋرورت قىزمەتكەرى كەزەكشىلىكتە بولادى. ءتارتىپ ساقشىلارى Police دەگەن جازۋى بار ارنايى كەۋدەشە كيەدى»، - دەدى ول.

جالپى، «شىمبۇلاق» ديرەكتورىنىڭ ايتۋىنشا، شيپاجايعا كەلۋشىلەر سانى جىل سايىن ارتىپ كەلەدى جانە وتكەن ماۋسىمدا ول ءابسوليۋتتى رەكوردقا جەتتى - 1 ميلليون استام ادام.

فوتو: xxl.no

اۆتور

الما مۇقانوۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى