قازاقستاندىقتار قانداي جاعدايدا اتى-ءجونىن ءوز قالاۋىنشا وزگەرتە الادى
بۇل تۋرالى وڭىرلىك كوممۋنيكاتسيالار قىزمەتىندە وتكەن بريفينگتە قالالىق ادىلەت دەپارتامەنتىنىڭ وكىلدەرى ايتتى، دەپ حابارلايدى قازاقپارات ءتىلشىسى.
الماتى قالاسى ادىلەت دەپارتامەنتى باسشىسىنىڭ ورىنباسارى بەرىكبول سامەنوۆ نەكە جانە وتباسى كودەكسىنىڭ باپتارىنا وزگەرىستەر مەن تولىقتىرۋلاردىڭ ەنگىزىلۋىنە بايلانىستى، اتىن، اكەسىنىڭ اتىن، تەگىن اۋىستىرۋعا بايلانىستى وزگەرتۋگە جاتاتىن مالىمەتتەر تۋۋ تۋرالى، نەكە قيۋ نەمەسە بۇزۋ تۋرالى ءتيىستى اكت جازبالارىنا اتىن، اكەسىنىڭ اتىن، تەگىن اۋىستىرۋ تۋرالى قورىتىندىنىڭ نەگىزىندە ەنگىزىلەتىنىن ايتتى.
«سونداي-اق وزگەرىستەر نەگىزىندە اتىن، اكەسىنىڭ اتىن، تەگىن اۋىستىرۋ تۋرالى اكت جازباسى تىركەلمەگەندىكتەن كۋالىك تە بەرىلمەيدى. ياعني تىركەۋشى ورگاندار اتىن، اكەسىنىڭ اتىن، تەگىن اۋىستىرۋ جۇرگىزىلگەنىن راستاۋ ءۇشىن تۋۋ تۋرالى، نەكە قيۋ نەمەسە بۇزۋ تۋرالى ءتيىستى كۋالىك بەرەدى»، - دەدى سپيكەر.
سونىمەن قاتار، ول ازاماتتىق حال اكتىلەرىن تىركەۋ سالاسىنداعى مەملەكەتتىك قىزمەتتەردى وڭتايلاندىرۋ ماقساتىندا ازاماتتارعا ىڭعايلى بولۋ ءۇشىن ازاماتتىق حال اكتىلەرىن تىركەۋدىڭ بارلىق تۇرلەرىن تىركەۋ، قايتالاما كۋالىك پەن انىقتاما الۋ بويىنشا ەكس اۋماقتىق قاعيدات ەنگىزىلگەنىن اتاپ ءوتتى.
وسىلايشا، ازاماتتار وزىنە ىڭعايلى حقو نەمەسە «ەلەكتروندى ۇكىمەت» www.egov.kz ارقىلى مەملەكەتتىك قىزمەت ستاندارتىنا سايكەس ءوتىنىش بىلدىرۋىنە بولادى.
تىركەۋ قىزمەتى سالاسىنداعى ادىستەمەلىك قامتاماسىز ەتۋ جانە باقىلاۋ باسشىسىنىڭ مىندەتىن اتقارۋشى ءلاززات سىدىقوۆا اتىن، اكەسىنىڭ اتىن، تەگىن اۋىستىرۋ تۋرالى ءوتىنىشتى تىركەۋشى ورگان، قازاقستاننىڭ شەت ەلدەگى مەكەمەسى قازاقستان رەسپۋبليكاسىنىڭ نەكە-وتباسى زاڭناماسىنا سايكەس قارايتىنىن تىلگە تيەك ەتتى.
اتىن، اكەسىنىڭ اتىن، تەگىن اۋىستىرۋدى ون التى جاسقا تولعان جانە اتىن جانە (نەمەسە) اكەسىنىڭ اتىن، تەگىن اۋىستىرۋعا تىلەك بىلدىرگەن ادامنىڭ جەكە ءوتىنىشى بويىنشا تىركەۋشى ورگاندار جۇرگىزەدى.
سونداي-اق، ول اتىن، اكەسىنىڭ اتىن، تەگىن اۋىستىرۋدىڭ دالەلدى سەبەپتەرىن اتادى:
1) اتىنىڭ، اكەسىنىڭ اتىنىڭ، تەگىنىڭ وعاش ەستىلۋى؛
2) اتىنىڭ، اكەسىنىڭ اتىنىڭ، تەگىنىڭ ايتۋعا قيىندىق كەلتىرۋى؛
3) ەگەر نەكەنى مەملەكەتتىك تىركەۋ كەزىندە نەكەگە دەيىنگى تەگىندە قالسا نەمەسە نەكەنى مەملەكەتتىك تىركەگەننەن كەيىن جۇبايى تەگىن باسقاسىنا اۋىستىرسا، جۇبايىمەن ورتاق فاميليادا بولعىسى كەلگەن جۇبايىنىڭ تىلەگى؛
4) ەگەر نەكە بۇزىلعان كەزدە بۇل تۋرالى مالىمدەلمەسە، نەكەگە دەيىنگى تەگىن العىسى كەلۋى؛
5) بۇرىنعى نەكەدەن تۋعان بالالارىمەن ورتاق فاميليادا بولعىسى كەلۋىنە بايلانىستى؛
6) جۇبايى قايتىس بولعان جاعدايدا نەكەگە دەيىنگى تەگىن العىسى كەلۋى؛
7) جۇبايى قايتىس بولعان جاعدايدا ءوتىنىش بەرۋشى نەكەگە دەيىنگى تەگىندە بولعاندا بالالارىمەن ورتاق تەكتە بولعىسى كەلۋى؛
8) ءوتىنىش بەرۋشى تاڭداعان اتا-اناسىنىڭ ءبىرىنىڭ ۇلتىنا سايكەس كەلەتىن اتتى جانە تەكتى العىسى كەلۋى؛
9) قۇجاتتاعى اتىنان وزگەشە، ومىردە ناقتى قالىپتاسقان اتىن العىسى كەلۋى؛
10) ەگەر نەكەگە وتىرعان كەزدە جۇبايىنىڭ تەگى قابىلدانسا، نەكەگە دەيىنگى تەگىن العىسى كەلۋى؛
11) ۇلتتىق داستۇرلەرگە بايلانىستى اكەسىنىڭ نەمەسە اتاسىنىڭ اتى بويىنشا تەكتە بولعىسى كەلۋى؛
12) ءوتىنىش بەرۋشىنى ءىس جۇزىندە تاربيەلەگەن ادامنىڭ تەگى مەن اتى بويىنشا تەكتى جانە (نەمەسە) اكەسىنىڭ اتىن العىسى كەلۋى؛
13) جىنىسىن حيرۋرگيالىق جولمەن وزگەرتكەن كەزدە تاڭداعان جىنىسقا سايكەس كەلەتىن اتتى، اكەسىنىڭ اتىن، تەكتى العىسى كەلۋى كەزىندە جۇرگىزىلەدى.
«اتىن، اكەسىنىڭ اتىن، تەگىن اۋىستىرۋ تۋرالى وتىنىشتە كەلەسىدەي مالىمەتتەر قاجەت: ءوتىنىش بەرۋشىنىڭ اتى، اكەسىنىڭ اتى (ەگەر بار بولسا)، تەگى؛ تاڭداعان اتى، اكەسىنىڭ اتى، تەگى؛ اتىن، اكەسىنىڭ اتىن، تەگىن اۋىستىرۋدىڭ سەبەپتەرى كورسەتىلۋگە ءتيىس»، - دەيدى ءلاززات سىدىقوۆا.
تولىق اتى-ءجونىن وزگەرتۋ ءوتىنىشى جوعارىدا اتالعان بارلىق 13 تارماققا سايكەس كەلۋى كەرەك.
جالپى، جىل باسىنان بەرى الماتىدا 2670 تۇرعىن تەگىن اۋىستىرۋعا ءوتىنىش بىلدىرگەن.
«تەگىن، اتىن، اكەسىنىڭ اتىن وزگەرتكەننەن كەيىن ءوتىنىش بەرۋشى ەڭ الدىمەن جەكە كۋالىگىن، ءتولقۇجاتىن اۋىستىرىپ، سودان كەيىن جۇرگىزۋشى كۋالىگىن اۋىستىرۋ ءۇشىن مەكەمەلەرگە، بانكتەرگە جۇگىنۋى قاجەت. قاجەت بولعان جاعدايدا نەكە كۋالىگىن جانە بالالاردىڭ تۋۋ تۋرالى كۋالىگىن وزگەرتۋ كەرەك. ديپلومدى اۋىستىرۋدىڭ قاجەتى جوق»، - دەدى ناۋرىزباي اۋداندىق ا ح ا ت ءبولىمىنىڭ باسشىسى ديليارا قيلىبايەۆا.
