مەسسي ارگەنتينا قۇراماسىنىڭ ساۋد ارابياسىنا جەڭىلۋىنە قاتىستى پىكىر ءبىلدىردى
ايتا كەتسەك، 22-قاراشادا وتكەن ويىندا ارگەنتينا قۇراماسى ساۋد ارابياسىنا 1:2 ەسەبىمەن جول بەردى.
«بۇل بارلىعىمىز ءۇشىن اۋىر سوققى بولدى. جانكۇيەرلەر ءۇشىن دە، ءبىز ءۇشىن دە. ءبىز تۋرنيردىڭ باستاۋىندا مۇنداي ساتسىزدىكتى كۇتكەن جوقپىز. العا قويعان ماقساتىمىز - جەڭىسكە جەتۋ، ءۇش ۇپايدى ولجالاۋ بولاتىن. ول جانىڭا جايلىلىق بەرەدى. مۇنداي جاعداي ويلاعانداي بولا بەرمەيتىنى تاعى بار. قارسىلاسىمىز قالاي وينايتىنىن جاقسى بىلدىك. اسىعىستىق تانىتتىق. سونىڭ سالدارىنان ويىن ءبىزدىڭ ويلاعانىمىزداي جۇرگەن جوق. ءيا، گولىمىزدى ەرتە سوعا الدىق. ەسەپكە الىنباعان گولدارعا قاتىستى بىرنەشە قاۋىپتى ساتتەر بولدى. سول ساتتە ءبىز مۇنداي گول سوعاتىن مۇمكىندىك ءالى دە بولادى دەگەن سەنىمدە ەدىك. بۇل جەردە قاتەلەسكەنىمىزدى تۇسىندىك»، - دەدى ارگەنتينالىق فۋتبولشى.
لەونەل مەسسي ودان كەيىن قۇرامادا ويىن بارىسى قالاي وربىگەنىنە نازار اۋداردى.
«ودان كەيىنگى ساتتەردە اسىعىستىق بولدى. ويىنىمىز ويلاعانداي جۇرگەن جوق. قاپتالدى ۇدايى اۋىستىرىپ تۇرۋعا مۇمكىندىك بولمادى. نەگىزىندە ويىن سولاي ءوربۋى ءتيىس ەدى. ارابيالىق فۋتبولشىلار قورعانىس شەبىندە جوعارى دەڭگەيدە ويىن كورسەتكەنىن بايقادىق. سوندىقتان دوپتى الىپ ءجۇرۋ بارىسىندا جىلدام بولۋعا كۇش سالدىق. دەگەنمەن جۇيەلى تۇردە قيمىل كورسەتە العان جوقپىز. سونىڭ سالدارىنان بىرنەشە مارتە ويىننان تىس قالۋ تىركەلدى. بۇل ساتتەردە ساۋد ارابياسىنىڭ قۇراماسى جيناقى قيمىلدادى. ودان كەيىن ءبىزدىڭ قاقپامىزعا ەكى گول سوعىلدى. بۇل ءبىزدىڭ ءۇمىتىمىزدى سەيىلتتى دە ول كوپتەگەن قاتەلىككە ۇرىندىردى.
ءبىز ساۋد ارابياسى دوپقا يەلىك ەتۋ جونىنەن جاقسى ەكەنىن اڭعاردىق. ولارعا دوپتى الىپ ءجۇرۋ ۇنايدى. سوندىقتان العا قاراي ۇمتىلا ءتۇسىپ جيناقىلىق تانىتتى. وسىعان بايلانىستى ءبىزدىڭ قاقپا ماڭىندا بىرنەشە مارتە ويىننان تىس قالىپ جاتتى. بىزگە كەدەرگى كەزدەستى جانە ول ءبىز كۇتپەگەن جاعداي ەدى. ەندى ءبىزدىڭ بىرلىگىمىزدى كورسەتەتىن ءسات تۋدى. ويىنعا قايتا ورالامىز. 26-قاراشاداعى ويىندا مەكسيكانى جەڭۋگە كۇش سالامىز»، - دەدى لەونەل مەسسي.
