قاراعاندى وبلىسىنىڭ تۇرعىنى جارالى اققۋدى قۇتقاردى
قاناتى سىنۋىنا بايلانىستى بۇل قۇس قورعانكول كولىندە قاتىپ قالا جازداعان، دەپ حابارلايدى قازاقاپارت ءتىلشىسى.
اقبەل اۋىلىنىڭ تۇرعىندارى سۋ ايدىنىنداعى اققۋدى ەكى اپتا بۇرىن بايقاعان. ول ۇشۋعا تىرىسقانىمەن ونىسىنان ەشتەڭە شىقپادى.
«ءبىز كولدە ءجۇزىپ جۇرگەن اققۋدى كوردىك، ءبىراق جاقىنداي المادىق: ول بىزدەن ۇركىدى. ال مۇز ءالى سونشالىقتى قاتپاعان ەدى. الايدا بىرەر كۇن بۇرىن قۇستىڭ ءوزى جاعاعا شىعىپ، ءتىپتى اۋىلعا جاقىندادى. ءبىز ونىڭ كومەككە مۇقتاج ەكەنىن تۇسىندىك. ونى مەنىڭ باقشاما ايداپ، تاۋىقتارىم تۇراتىن سارايعا ورنالاستىردىم. قازىر اققۋ بىزگە ۇيرەنىپ كەلەدى، شيراي باستادى. جەمدى جاقسى جەيدى، سۋ ىشەدى. ءبىراق ول ەندى ۇشا المايتىن ءتارىزدى»، - دەيدى داۋكەن.
اققۋدى كورۋگە داۋكەننىڭ اۋلاسىنا اۋىل بالالارى عانا ەمەس، ەرەسەكتەر دە كەلەدى ەكەن. ول قۇستىڭ اۋىلدىڭ ناعىز جۇلدىزىنا اينالعانىن اتاپ ءوتتى.
«جۇبايىم قالجىنداپ، اققۋدى جۇلدىز دەپ اتاۋ كەرەك دەيدى. ءبىز وعان ۇيرەنىپ قالدىق. وعان قامقورلىق جاساۋعا، ۋاقىتىلى جەم، سۋ بەرۋگە دايىنبىز. بۇل وتە ادەمى قۇس. بالا كەزىمىزدەن بىزگە اققۋلاردىڭ كيەلى قۇس ەكەنىن ايتىپ، ولاردى قورعاۋ كەرەك دەپ ۇيرەتتى»، - دەيدى اۋىل تۇرعىنى.
اقبەل اۋىلدىق وكرۋگىنىڭ اكىمدىگى اققۋ تۋرالى اقپاراتتى وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسىنا بەرگەنىن حابارلادى.
جاقىن ارادا ول جاڭا مەكەنگە كوشىرىلۋى مۇمكىن.
