الماتى جولدارىن كۇتىپ ۇستاۋعا بيىل قانشا اقشا ءبولىندى

بۇل تۋرالى وڭىرلىك كوممۋنيكاتسيالار قىزمەتى بريفينگىندە الماتى قالاسىنىڭ كوممۋنالدىق ينفراقۇرىلىمدى دامىتۋ باسقارماسى باسشىسىنىڭ ورىنباسارى دۋلات ەشكەنوۆ ايتتى، دەپ حابارلايدى قازاقپارات ءتىلشىسى.

سپيكەردىڭ ايتۋىنشا، الماتىدا قالا كوشەلەرىن كۇتىپ ۇستاۋ جۇمىستارى (قالالىق ماڭىزى بار كوشەلەر (ماگيسترالدىق)، اۋداندىق ماڭىزى بار كوشەلەر جانە جەرگىلىكتى ماڭىزى بار كوشەلەر) ءۇش باعىت بويىنشا جۇرگىزىلەدى.

«وسىعان سايكەس كوشە تازالاۋ جۇمىستارى قالالىق ماڭىزى بار كوشەلەردە تاۋلىگىنە كەمىندە 2 رەت، اۋداندىق ماڭىزى بار كوشەلەردە تاۋلىگىنە 1 رەت جانە جەرگىلىكتى ماڭىزى بار كوشەلەردە اپتاسىنا كەمىندە ءبىر رەت جۇرگىزىلەدى. الايدا، بۇل جول قىزمەتكەرلەرىنىڭ جۇمىستارى وسىمەن شەكتەلەدى دەگەن ءسوز ەمەس. ءارتۇرلى جاعداي مەن اۋا رايىنا بايلانىستى ۇزدىكسىز قوزعالىستى قامتاماسىز ەتۋ ءۇشىن جۇمىستار توقتامايدى»، - دەدى د. اشكەنوۆ.

ول بيىل جازدا الماتى قالاسىنىڭ كوشەلەرىنەن 1000 نان استام ارنايى تەحنيكانىڭ كۇشىمەن 90 توننادان استام قوقىس شىعارىلعانىن، ال قىسقى مەزگىلدە قار شىعارۋ، كوكتايعاقتى الدىن الۋ جۇمىستارى ءجۇرىپ جاتقانىن حابارلادى.

«قازىر «الماتى تازالىق» كاسىپورنى قىسقا %100 دايىن. بۇگىنگى كۇنى ءبىز پوليتسيا دەپارتامەنتىمەن بىرلەسىپ قار تازالاۋ جۇمىستارى كەزىندە جول قوزعالىسىنىڭ سحەماسىن پىسىقتاپ جاتىرمىز. جالپى، قالاعا تۇسكەن العاشقى قار دايىندىعىمىزدىڭ ءساتتى بولعانىن كورسەتتى، مەردىگەر ۇيىمداردىڭ نەگىزگى مىندەتتەرى ورىندالدى»، - دەدى و ك ق سپيكەرى.

ول سونداي- اق جولاۋشىلارعا ۇلكەن جاۋاپكەرشىلىك جۇكتەلەتىن جاۋاپتى كەزەڭ باستالعانىن اتاپ ءوتتى.

«كۇز مەزگىلى اياقتالعالى بەرى بىرنەشە اي ىشىندە ءبىز بۇل جاۋاپتى كەزەڭگە دايىندالۋ ءۇشىن جۇمىس جوسپارىمىزدى بەلگىلەدىك. ايتۋ كەرەك بيىلعى جىلى الماتى جولدارىن جىلدىق كۇتىپ ۇستاۋعا 13 ميلليارد تەڭگە ءبولىندى. الماتى جولدارى ۇعىمىنا ارىق جەلىلەرى، تروتۋارلار، جالپىعا ورتاق پايدالانىلاتىن اۋماقتار جانە تاعى باسقالار كىرەدى»، - دەدى دۋلات ەشكەنوۆ.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى