الماتىلىق دارىگەرلەر ادام ومىرتقاسىنا بىرەگەي وتا جاسادى
جوعارى تەحنولوگيالىق وتا مىندەتتى الەۋمەتتىك مەديتسينالىق ساقتاندىرۋ شەڭبەرىندە جاسالدى، دەپ حابارلايدى قازاقپارات ءتىلشىسى باسپا ءسوز قىزمەتىنە سىلتەمە جاساپ.
نەيروحيرۋرگيا ءبولىمىنىڭ مەڭگەرۋشىسى مارات الماتوۆتىڭ ايتۋىنشا، ناۋقاستىڭ بەل ومىرتقاداعى وستەوحاندروز بەن جارىقتىڭ زاردابىن تارتقانىنا بىرنەشە جىلدىڭ ءجۇزى بولعان. سونداي- اق بۇلشىق ەتتەرى سەمىپ، سول اياعىن باسا الماي قالعان.
دارىگەرلەر اقىلداسا كەلە ەمنىڭ مەيلىنشە جەڭىل ءارى ەڭ ءتيىمدى ءادىسى - شاعىن ينۆازيۆتى ءتاسىلىن تاڭداعان. بۇل ءادىس كەۋدە- بەل ومىرتقا تۇسىندا قىسىلىپ تۇرعان جۇلىن قۇرىلىمىن تولىق قالپىنا كەلتىرۋگە مۇمكىندىك بەرەدى.
«وپەراتسيا جۇمساق تىندەردى كەسپەي، تۋبۋستىق كەڭەيتكىش ارقىلى جاسالدى. مۇنداي حيرۋرگيالىق وپەراتسيا ءبىزدىڭ ستاتسيوناردا تۇڭعىش رەت بولدى. ۆينتتەر تەرى ارقىلى ەنگىزىلدى. وپەراتسيا بارىسىندا ومىرتقا اراسىنا جاساندى ديسك ورناتىلدى. ءۇش ساعاتقا سوزىلعان وتا ءساتتى اياقتالدى»، - دەدى مارات الماتوۆ.
جاڭا تەحنولوگيالاردىڭ كومەگىمەن جاسالاتىن زاماناۋي ەمدەۋ ءادىسى ارقىلى وپەراتسيا ۋاقىتىن قىسقارتىپ، جاقسى ناتيجەگە قول جەتكىزۋگە بولادى.
سونىمەن قاتار، ەمدەلۋشى وتادان كەيىن كوپ ۇزاماي اياققا تۇرىپ كەتۋى ءتيىس.
قازىرگى ۋاقىتتا ەمدەلۋشى اۋرۋحانادان شىعۋعا دايىندىق ۇستىندە.
«كەيىنگى كەزدە ءوز اياعىممەن جۇرۋدەن كۇدەر ۇزە باستاعان ەدىم. مۇگەدەك ارباعا تاڭىلدىم. قازىر ءوزىم ءجۇرىپ- تۇرامىن. ايىعىپ كەلە جاتىرمىن، اۋىرسىنۋ سەزىمىنەن ارىلدىم. نەيروحيرۋرگيا بولىمشەسىنىڭ دارىگەرلەرى مەن مەدبيكەلەرىنە العىستان باسقا ايتارىم جوق»، - دەدى ەمدەلۋشى.
