ەستون سپورتشىسى بوزجىراداعى شاتقالداردىڭ اراسىن اسپالى ارقان بويىمەن ءجۇرىپ ءوتتى
سپورتشى ەكى ءجۇز مەتر بيىكتىكتە جارتى شاقىرىم قاشىقتىقتى ءجۇرىپ ءوتتى. ءتۇسىرىلىم 50 گرادۋس ىستىقتا جانە قاتتى جەل سوعىپ تۇرعان كۇنى ءوتتى.
«بوزجىرا مەن ءۇشىن ۇلكەن سىناق بولدى. ول مەنىڭ ومىرىمدەگى ەڭ كۇردەلى، ءارى ادەمى جوبالاردىڭ ءبىرى. بوزجىرانىڭ سۋرەتتەرىن كورگەندە قايران قالىپ ەدىم. ال، وسىندا كەلىپ، سول سۇلۋلىقتىڭ ءبارىن ءوز كوزىممەن كورگەن كەزدە، ءتىپتى تاڭعالدىم. بۇرىنعى مۇحيتتىڭ ورنى دەگەن دەرەك قيالىما قانات ءبىتىردى. قازاقستانعا العاش رەت كەلۋىم. ماعان بۇل جەردىڭ حالقى قاتتى ۇنادى: شەتىنەن مەيىرىمدى، اقىلدى، ءوز ءىسىن جاقسى بىلەتىن ادامدار ەكەن»، - دەيدى ياان.
ءتۇسىرىلىم بەس كۇنگە سوزىلدى. ماقساتى — بوزجىرانىڭ تۋريستىك مۇمكىندىگىن جاڭا قىرىنان پاش ەتەتىن ەرەكشە بەينەروليك ءتۇسىرۋ.
ەڭ باستى مىندەتتەردىڭ ءبىرى - شاتقالدىڭ تابيعاتىنا اسقان ۇقىپتىلىقپەن قاراپ، وسى تاريحي مەكەنگە قاتىستى قويىلاتىن ەكولوگيالىق تالاپتاردىڭ ءبارىن تولىعىمەن ورىنداۋ.
«بۇگىندە ماڭعىستاۋ وبلىسى قازاقستان تۋريزمىندەگى باسىم تۇرعان باعىتتاردىڭ ءبىرى. بيىلعى كەلگەن شەتەلدىك ساياحاتشىلاردىڭ سانى بويىنشا، بۇل ءوڭىر العاشقى وزىق بەستىكتىڭ قاتارىنا كىردى. ماڭعىستاۋدىڭ الەمدىك فيلم- ءتۋريزمىنىڭ ورتالىعىنا اينالۋ مۇمكىندىگى بار. ءبىز ءوز ولكەمىزدىڭ ايرىقشا سۇلۋلىعىن اشىپ كورسەتە الاتىن باستامالاردى قولداۋعا دايىنبىز. تەك كەلەتىن ادامدار تابيعاتىمىزعا اسقان ۇقىپتىلىقپەن، جاناشىرلىقپەن قاراۋى كەرەك»، - دەيدى «Kazakh Tourism» ۇ ك ا ق باسقارما ءتوراعاسى تالعات امانبايەۆ.
ەجەلدە ۇلى جىبەك جولى ماڭعىستاۋدىڭ جەرىن باسىپ وتكەن. ال بوزجىرا اۋماعىنداعى بەكىنىسكە ۇقسايتىن شاتقالداردىڭ ءبىرى قازاقستان رەسپۋبليكاسىنىڭ مىڭ تەڭگەلىك بانكنوتىندا بەينەلەنگەن.
«سونداي كەرەمەت جەر ەكەن. مۇنداعى بىرەگەي لوكاتسيانى ءوز كوزىممەن كورگەنىمە، وعان قوسا، ادامنىڭ فيزيكالىق مۇمكىندىگى مەن تابيعاتتىڭ سۇلۋلىعىن ۇشتاستىرا العانىما قۋانامىن»، - دەدى سپورتشى.
ياان سلەكلاينمەن 12 جىلدان بەرى اينالىسادى. بۇگىندە ونى جۇيكەسى مىقتى اتلەت دەپ اتايدى. ويتكەنى بوس تارتىلعان اسپالى جولمەن جۇرگەن كەزدە، سپورتشى تەپە- تەڭدىكتى دەنەسى مەن قولىن قيمىلداتۋ ارقىلى عانا ساقتايدى. ال جەلدىڭ ەكپىنى اسپا جولدى اياقتىڭ استىنان وڭاي جۇلىپ اكەتە الادى. سونىڭ كەسىرىنەن ادام تەپە- تەڭدىگىن ساقتاي الماي قالۋى مۇمكىن.
بۇل سپورتشى الەمنىڭ ءۇش دۇركىن چەمپيونى، الەمدىك دەڭگەيدەگى تالاي رەكوردتىڭ يەسى، ەڭ ايرىقشا لوكاتسيالاردى باعىندىرعان ادام. ول بىرنەشە رەت گولليۆۋدتىق فيلمدەردە كاسكادەر بولىپ جۇمىس ىستەگەن جانە مادوننانىڭ كونسەرتتىك تۋرىنا قاتىستى. سول تۋردىڭ اياسىندا سلەكلاينەر- نومىرلەر كورسەتىپ، انشىگە اسپا جولمەن ءجۇرۋدى ۇيرەتكەن.
ايتا كەتەيىك، بۇل جوبا ماڭعىستاۋ وبلىستىق اكىمدىگىنىڭ، ق ر مادەنيەت جانە سپورت مينيسترلىگى جانە «قازاق تۋريزم» ۇ ك ا ق- نىڭ قولداۋىمەن ىسكە استى.
