دەنساۋلىق ساقتاۋ ءمينيسترى اۋىل تۇرعىندارىندا ءجيى كەزدەسەتىن اۋرۋلاردى اتادى

«بۇگىندە اۋىلدا شامامەن 8 ميلليون ادام تۇرادى، بۇل ەل حالقىنىڭ %41 ىن قۇرايدى. اۋىل تۇرعىندارىنا 5 مىڭنان استام مەديتسينالىق ۇيىم مەديتسينالىق كومەك كورسەتەدى. جالپى مەديتسينالىق-دەموگرافيالىق جاعداي ەلىمىزدە تۇراقتى. رەسمي ستاتيستيكا بويىنشا حالىقتىڭ دەنساۋلىعى جاقسارىپ، ءولىم-ءجىتىم سوڭعى 9 ايدا %28,5 عا تومەندەدى»، - دەدى مينيستر ۇكىمەتتىڭ بۇگىنگى وتىرىسىندا.

ونىڭ ايتۋىنشا، اۋىل حالقىنىڭ دەنساۋلىعىن تالداۋ ولاردىڭ ءبىرىنشى (%42,7) تىنىس الۋ اعزالارىنىڭ اۋرۋلارىنان زارداپ شەگەتىنىن كورسەتەدى، ەكىنشى ورىندا اس قورىتۋ، ءۇشىنشى ورىندا - نەسەپ-جىنىس جۇيەسى اۋرۋلارى ورىن العان.

«شالعاي اۋىل تۇرعىندارىنا مەديتسينالىق قىزمەتتەردىڭ قولجەتىمدىلىگىن قامتاماسىز ەتۋ ماقساتىندا كولىك مەديتسيناسى دامىعان. مەديتسينالىق كومەك جانە كونسۋلتاتسيالىق- دياگنوستيكالىق قىزمەتتەر كورسەتەتىن 149 جىلجىمالى مەديتسينالىق كەشەن جۇمىس ىستەيدى. بيىل ەلىمىزدىڭ 10 وڭىرىندە 64 مىڭ تۇرعىنعا مەديتسينالىق كومەك كورسەتكەن 2 «جاردەم» جانە «سالاماتتى قازاقستان» مەديتسينالىق پويىزدارى قايتادان ىسكە قوسىلدى»، - دەدى اجار عينيات.

سونىمەن بىرگە، مەديتسينالىق اۆياتسيانى اۋىل تۇرعىندارىن تاسىمالدايتىن جانە شۇعىل كومەك كورسەتەتىن 33 اۋە كەمەسى جۇرگىزەدى. اۋىلدا جەدەل مەديتسينالىق كومەك كورسەتۋ ءۇشىن 595 بريگادا جۇمىس ىستەيدى جانە 2 ميلليون شاقىرتۋعا قىزمەت كورسەتىلگەن.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى