قىتايدان كەلگەن قانداسىمىز استانادا تيتۋلدىق جەكپە-جەككە شىعادى

استانا. قازاقپارات - جەڭىلىپ كورمەگەن جەڭىل سالماقتاعى «قازاق جاۋىنگەرى» لاقاپ اتىمەن بەلگىلى قانداسىمىز ەلشات نىعمەتوللانىڭ (17-0-1، 5 ك و) كىممەن، قاشان جانە قايدا ايقاساتىنى بەلگىلى بولدى، دەپ حابارلايدى قازاقپارات Sports.kz سىلتەمە جاساپ.

BoxRec.com پورتالىنىڭ جازۋىنشا، نىعمەتوللا رينگكە 16- جەلتوقساندا قازاقستان استاناسىنداعى «بارىس ارەنادا» شىعادى. 28 جاستاعى قازاقستاندىق سپورتشى فيليپپيندىك بوكسشى «ياگۋار» لاقاپ اتىمەن تانىمال ەلتس روزيامەن (17-9-1، 9 ك و) جۇدىرىقتاسادى. ون راۋندتىق جەكپە- جەكتە جەڭىل سالماقتاعى WBC International Silver بەلبەۋى باسكە تىگىلەدى.

بيىل نىعمەتوللا ەكى جىلدان استام ۋاقىتتان كەيىن رينگكە ورالىپ وتىر. ول وسىعان دەيىنگى ايقاسىن 2020-جىلى 12- ناۋرىزدا دۋبايدا (ب ا ءا) بوكس كەشىندە وتكىزىپ، فيليپپيندىك دجاستين داراپتى (10-2، 6 ك و) تورەشىلەردىڭ ءبىراۋىز شەشىمىمەن جەڭدى.

ايتا كەتەيىك، ەلشات نىعمەتوللا بەلگىلى بوكسشى قانات يسلامنىڭ جەرلەسى. قوس سپورتشى دا التاي جەرىندە دۇنيەگە كەلگەن.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى