سايلاۋ ناتيجەسى مەملەكەت باسشىسىنىڭ باستامالارى جۇزەگە اساتىنىن بىلدىرەدى - ساراپشى
بۇل تۋرالى پرەزيدەنت جانىنداعى قازاقستان ستراتەگيالىق زەرتتەۋلەر ينستيتۋتى ديرەكتورىنىڭ ورىنباسارى الۋا جولدىبالينا ايتتى، دەپ حابارلايدى قازاقپارات ءتىلشىسى.
«بيىلعى سايلاۋ قازاقستاننىڭ ساياسي جۇيەسىن تولىعىمەن قايتا قۇرۋ جولىنداعى شەشۋشى قادام بولعانى ءسوزسىز. سايلاۋ بويىنشا جاسالعان الدىن الا قورىتىندىلار مەن ەكزيت-پۋلل مالىمەتتەرى قازىردىڭ وزىندە ءتيىستى ناتيجەنى شىعارۋعا مۇمكىندىك بەرەدى. سايلاۋ ناۋقانى دەموكراتيالىق نورمالارعا ساي ءوتتى»، - دەدى ا. جولدىبايەۆا «ق س ز ي» GPS ساراپتامالىق الاڭى وتىرىسىندا.
وسى ورايدا ول جاڭا پرەزيدەنتتىك ماندات رەفەرەندۋمنان كەيىن وكىلەتتىكتەرى جاعىنان ايتارلىقتاي قىسقارعانىن ەسكە سالدى. مەملەكەت باسشىسى قازىرگى كەزدە دە، بولاشاقتا دا بيلىكتىڭ مونوپوليالانۋىنا جول بەرمەۋ ماقساتىندا كەزەكتەن تىس سايلاۋ وتكىزۋ جانە ءبىر رەتتىك پرەزيدەنتتىك مەرزىمدى بەكىتۋ قادامىنا باردى.
ا. جولدىبالينا ەل حالقى مەملەكەت باسشىسىنا تاعى دا سەنىم ءبىلدىرىپ، سايلاۋشىلاردىڭ باسىم بولىگى قاسىم-جومارت توقايەۆقا داۋىس بەرگەنىن ايتتى.
ساراپشىنىڭ پايىمىنشا، سايلاۋ ناتيجەسى رەفورمالاردىڭ جالعاساتىنىن، قاسىم-جومارت توقايەۆ جاريالاعان باستامالاردىڭ جۇزەگە اساتىنىن بىلدىرەدى. كەلەسى جەتى جىلدا ەكونوميكانى مونوپولياسىزداندىرۋ جانە ساياسي ينستيتۋتتاردى، اسىرەسە، جەرگىلىكتى دەڭگەيدە نىعايتۋ بويىنشا قادامدار قامتىلماق.
سونىمەن قاتار بيىلعى سايلاۋدا بايقاۋشىلار ەرەكشە بەلسەندىلىك تانىتقانىن جەتكىزدى.
«ەل حالقىنىڭ دا بەلسەندىگى جوعارى دەڭگەيدە. مەملەكەت باسشىسىنىڭ ءاربىر ارەكەتى قوعامنىڭ ءجىتى نازارىندا تۇرعانىن ايتقان ءجون. سايلاۋ قورىتىندىسى قوعامدا ادىلدىككە، باسەكەگە قابىلەتتىلىككە جانە ناقتى ناتيجەلەرگە سۇرانىستىڭ بار ەكەنىن كورسەتتى»، - دەدى ينستيتۋت وكىلى.
