قاسىم-جومارت توقايەۆ رەسپۋبليكالىق قوعامدىق شتابتا سايلاۋدىڭ قورىتىندىسىمەن تانىستى - فوتو
Exit poll-دىڭ ناتيجەسى جاريالانعاننان كەيىن رەسپۋبليكالىق قوعامدىق شتاب مۇشەلەرىنىڭ الدىندا سويلەگەن سوزىندە قاسىم-جومارت توقايەۆ بۇگىن ەرەكشە، تاريحي ناۋقان وتكەنىن اتاپ ءوتتى.
«بۇل ناۋقاننىڭ ءبىزدىڭ تاريحىمىزدا قالاتىنى ءسوزسىز. Exit Poll-دىڭ الدىن الا ناتيجەسى شىقتى. ارينە، رەسمي قورىتىندىنى كۇتەمىز. دەگەنمەن قازىردىڭ وزىندە حالقىمىز ماعان پرەزيدەنت رەتىندە جانە بارشاڭىزعا ۇلكەن سەنىم ارتتى دەپ ايتۋعا بولادى. حالىقتىڭ سەنىمى - بۇل ەڭ قۇندى نارسە. سوندىقتان حالىقتىڭ سەنىمىن ءبارىمىز اقتاۋىمىز كەرەك. بۇگىن، مىنە 21-قاراشادان باستاپ ءبارىمىز جۇمىسقا كىرىسۋىمىز قاجەت»، - دەدى قاسىم-جومارت توقايەۆ.
سونىمەن قاتار مىقتى مەملەكەت قۇرامىز دەسەك، ەڭ الدىمەن، ادىلدىك ورناتۋ قاجەت ەكەنىن، ونسىز ەشقانداي دا رەفورما بولمايتىنىن ايتتى. ونىڭ ايتۋىنشا، ءبارىمىز ءبىر ۇلت، ءبىر قوعام بولىپ ىسكە كىرىسۋىمىز قاجەت.
قاسىم-جومارت توقايەۆ وزىنە ۇلكەن سەنىم ارتقانى ءۇشىن كواليتسياعا ريزاشىلىعىن ءبىلدىردى.
«قوعامدىق شتابقا، سەنىمدى وكىلدەرىمە، ەرىكتىلەرگە راقمەت ايتامىن. سىزدەر ەلىمىزدىڭ ءار تۇكپىرىنە باردىڭىزدار. اۋىل- ايماقتار، شالعاي ەلدى مەكەندەر نازاردان تىس قالعان جوق. ەل اراسىندا ۇگىت- ناسيحات جۇرگىزدىڭىزدەر. بۇل - ۇلكەن جۇمىس. ونى مەن ەشقاشان ۇمىتپايمىن. سول سەبەپتى بۇگىنگى كورسەتكىش - بارىمىزگە ورتاق جەڭىس»، - دەدى قاسىم-جومارت توقايەۆ.
ونىڭ پىكىرىنشە، سايلاۋ زاڭعا سايكەس ءوتتى. قازاقستان رەسپۋبليكاسىنىڭ پرەزيدەنتتىگىنە ۇمىتكەرلەرگە بىردەي مۇمكىندىك بەرىلدى.
«ولار ايماقتاردى ەمىن- ەركىن ارالادى. سايلاۋشىلارمەن كەزدەسىپ، ۇگىت- ناسيحات جۇرگىزدى. ياعني، ەشكىمگە شەكتەۋ قويىلعان جوق. ءاربىر سايلاۋشىعا ءوز تاڭداۋىن جاساۋىنا ەركىندىك بەرىلدى. سوندىقتان بۇل ناۋقان ەرەكشە ءادىل، اشىق ءوتتى»، - دەدى قاسىم-جومارت توقايەۆ.
قاسىم-جومارت توقايەۆ پرەزيدەنت سايلاۋى جاڭا ساياسي داۋىرگە جول اشاتىنىن ايتىپ، الداعى ۋاقىتتا باستى بيلىك ينستيتۋتتارى تۇگەل جاڭعىرتىلاتىنىن جەتكىزدى.
«كونستيتۋتسيالىق رەفورمانى تولىعىمەن جانە ناقتى جۇزەگە اسىرامىز. ەلىمىزدىڭ ساياسي قۇرىلىسىن جاڭا قالىپقا تۇسىرەمىز. ەكونوميكانى تۇبەگەيلى وزگەرتەمىز. حالقىمىزدىڭ ءال- اۋقاتىن ارتتىرامىز. سونىڭ ءبارىن ويداعىداي اتقارۋ ءۇشىن بىزگە بىرلىك كەرەك. سوندىقتان ءاردايىم بىرگە بولايىق!» - دەدى قاسىم-جومارت توقايەۆ.
ءسوزىنىڭ سوڭىندا ول شاراعا قاتىسۋشىلاردى جاڭا، ادىلەتتى قازاقستاندى بىرگە قۇرۋعا شاقىرىپ، باق-بەرەكە تىلەدى.
ايتا كەتسەك، ورتالىق سايلاۋ كوميسسياسىنىڭ مالىمەتى بويىنشا، كەشە ساعات 22.00-دەگى جاعداي بويىنشا رەسپۋبليكانىڭ 8299501 ازاماتى بيۋللەتەن الدى. ول - تىزىمگە ەنگىزىلگەن ازاماتتاردىڭ 69,43 پايىزى دەگەن ءسوز. ال 4 وڭىردە سايلاۋشىلاردىڭ 80 پايىزدان استامى داۋىس بەرگەن.
بۇگىن ەلىمىزدە كەزەكتەن تىس پرەزيدەنت سايلاۋ ءوتتى. بارلىق وڭىردە 10033 ۋچاسكە جۇمىس ىستەدى.
سونىمەن قاتار شەت مەملەكەتتەردەگى قازاقستان وكىلدىكتەرى جانىنداعى 68 ۋچاسكەنىڭ بىرنەشەۋى قازىرگى ۋاقىتتا جۇمىسىن اياقتادى.
سايلاۋ كۇنىندە سان- فرانسيسكوداعى سايلاۋ ۋچاسكەسى سوڭعى بولىپ جۇمىسىن باستادى.
