قاتار ەلىندە فۋتبولدان الەم چەمپيوناتى رەسمي تۇردە اشىق دەپ جاريالاندى

سالتاناتتى شارا اتالعان مەملەكەتتىڭ تاريحى مەن مادەنيەتىن بەينەلەيتىن تەاترلاندىرىلعان كورىنىسپەن باستالدى ءارى جارتى ساعاتتان استام ۋاقىتقا سوزىلدى.

بۇل چەمپيوناتتىڭ ەرەكشەلىگى - العاش رەت جاز مەزگىلىندە ەمەس، كۇزگى جانە قىسقى ۋاقىتتا وتكىزىلىپ جاتىر.

سونداي-اق، بيىلعى الەم چەمپيوناتىندا سوڭعى مارتە 32 قۇراما سىنعا تۇسەدى. سودان كەيىن دوپ دوداسىندا ول 48 قۇراماعا ۇلعايماق.

بيىل 22-مارتە وتكىزىلەتىن دوپ دوداسى جونىندە شەشىم 2010-جىلى شۆەيتساريانىڭ تسيۋريح قالاسىندا قابىلداندى. سوڭعى تۋردا قاتار – 14، ا ق ش 8 داۋىس الىپ، وسىلايشا شاعىن مەملەكەت 2022-جىلعى الەم چەمپيوناتىن وتكىزۋ قۇقىعىن يەلەندى.

قاتار دۇنيە ءجۇزى جۇرتشىلىعىنا مۇنايعا باي ەل رەتىندە تانىلعان. سوندىقتان ولار ايتۋلى الامانعا ۇلكەن دايىندىق جاسادى. ادەتتە، مۇندا جاز مەزگىلىندە وتە ىستىق اۋا رايى تىركەلەدى. ءاربىر ستاديوندا اۋا سالقىنداتقىش جەلىسى ىسكە قوسىلادى. تەمپەراتۋرانىڭ 27 گرادۋستان جوعارى بولماۋى قاداعالانادى.

سالدەن كەيىن الەم چەمپيوناتىنداعى العاشقى كەزدەسۋدە قاتار مەن ەكۆادور قۇرامالارى جاسىل الاڭعا شىعادى. ويىن ەلوردا ۋاقىتىمەن 21.50 دە باستالىپ، «Qazsport» تەلەارناسىنان تىكەلەي ەفيردە كورسەتىلەدى.

كەزدەسۋ بارىسىندا يتالياندىق دانيەلە ورساتو باس تورەشى قىزمەتىن اتقارادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى