بۇگىن فۋتبولدان الەم چەمپيوناتى باستالادى: قاتار تاريحي ماتچ وتكىزەدى

چەمپيوناتتىڭ اشىلۋ سالتاناتى 20- قاراشادا استانا ۋاقىتىمەن 20:45 تە باستاۋ الادى. ونى تىكەلەي ەفيردە Qazaqstan مەن Qazsport تەلەارنالارى، qazaqstan.tv، azsporttv.kz جانە Qazaqstan.tv قوسىمشاسىنان كورۋگە بولادى.

ال العاشقى ويىندا تۋرنير قوجايىنى قاتار مەن ەكۆادور قۇرامالارى كەزدەسەدى. بۇل ماتچ ەلوردا ۋاقىتىمەن 22:00 دە باستالادى. كاتار قۇراماسىنا بۇل تاريحي ويىن بولادى، سەبەبى كوماندا العاش رەت الەم چەمپيوناتىندا وينايدى.

قاتار مەن ەكۆادور تاريحىندا العاش رەت رەسمي ماتچتا كەزدەسەدى. بۇعان دەيىن قۇرامالار ءۇش مارتە جولداستىق كەزدەسۋ وتكىزگەن. 1996-جىلى وتكەن ەكى ويىننىڭ بىرىندە كوماندالار 1:1 ەسەبىمەن تەڭ تۇسسە، ارتىنشا ەكۆادور باسىم بولعان - 2:1.

ال 2018-جىلى قۇرامالار دوحادا تاعى ءبىر جولداستىق ماتچ وتكىزىپ، كاتار 4:3 ەسەبىمەن جەڭگەن.

قازىر ف ي ف ا رەيتينگىندە ەكۆادور 44، قاتار 50-ورىندا تۇر.

قاتارداعى دوداعا 32 كوماندا قاتىسادى. قاتار الەم چەمپيوناتىنىڭ قوجايىنى رەتىندە اۆتومات تۇردە جولداما الدى. قالعاندارى ىرىكتەۋدەن ءوتتى. وكىنىشكە قاراي، قازاقستان قۇراماسى ىرىكتەۋدەن وتە الماي قالعان بولاتىن.

توپتار مىناداي:

A توبى: كاتار، ەكۆادور، سەنەگال، نيدەرلاندى.

B توبى: انگليا، يران، ا ق ش، ۋەلس.

C توبى: ارگەنتينا، ساۋد ارابياسى، مەكسيكا، پولشا.

D توبى: فرانسيا، اۋستراليا، دانيا، تۋنيس.

E توبى: يسپانيا، كوستا-ريكا، گەرمانيا، جاپونيا.

F توبى: بەلگيا، كانادا، ماروككو، حورۆاتيا.

G توبى: برازيليا، سەربيا، شۆەيتساريا، كامەرۋن.

H توبى: پورتۋگاليا، گانا، ۋرۋگۆاي، وڭتۇستىك كورەيا.

الەم چەمپيوناتىنىڭ 64 ماتچى Qazaqstan جانە Qazsport تەلەارنالارىنان كورسەتىلەدى. Qazaqstan تەلەارناسىنداعى ويىندار تەك قازاق تىلىندە جۇرگىزىلەدى.

تىكەلەي ەفيردە قازاق تىلىندە ەسەي جەڭىس ۇلى، ەرمۇحامەد ماۋلەن، جاندوس ءبايدىلدا، ەرسىن ەرىك ۇلى، ءۋاليحان قوسانباي، ءالىمجان اسقار ۇلى، رۋسلان باقىتجان، ورىس تىلىندە سەرگەي رايليان، ەربول قايىروۆ، دميتري ناستەرەنكو، ۆيكتور كيريليۋك، دىنمۇحاممەد تولەگەنوۆ، ديدار قادىروۆ جانە ادىلەت قۇسايىنوۆ كوممەنتاتورلىق ەتەدى.

ايتا كەتەيىك، فۋتبولدان الەم چەمپيوناتى 2022-جىلى 20- قاراشا مەن 18- جەلتوقسان اراسىندا وتەدى. الەمدىك دودا العاش رەت قىستا بولادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى