ماۋلەن اشىمبايەۆ: سايلاۋدىڭ ءادىل ءارى اشىق وتۋىنە بارلىق جاعداي جاسالعان
سەنات ءتوراعاسى استانا قالاسىنداعى №111-سايلاۋ ۋچاسكەسىندە داۋىس بەردى.
«بۇگىنگى كۇن ەلىمىز ءۇشىن ماڭىزدى، پرەزيدەنت سايلاۋى ءوتىپ جاتىر. سايلاۋ ەلىمىزدىڭ الداعى دامۋىنىڭ باعىت- باعدارىن ايقىندايدى. ءبىزدىڭ ەلىمىز ءۇشىن سوڭعى جىلدارى وڭاي بولمادى. پاندەميا ەل ەكونوميكاسى مەن حالقىمىزعا اۋىر ءتيدى. كوروناۆيرۋستى ءبارىمىز بىرگە ەڭسەردىك. بيىل الماتىداعى قاڭتار وقيعاسى ءبارىمىزدىڭ قابىرعامىزدى قايىستىردى. قازىر الەمدەگى گەوساياسي جاعداي ۋشىعىپ تۇر. دەگەنمەن قيىندىقتارعا قاراماستان قازاقستان حالقىنىڭ بىرلىگى مىقتى»، - دەدى ماۋلەن اشىمبايەۆ ب ا ق وكىلدەرىنىڭ سۇراعىنا جاۋاپ بەرە تۇرىپ.
سەنات باسشىسىنىڭ ايتۋىنشا، بۇگىن ءار قازاقستاندىقتىڭ ءوز تاڭداۋىن جاسايتىن كۇن.
«بيىل ماۋسىمدا رەفەرەندۋم ءوتتى. ونىڭ نەگىزىندە كونستيتۋتسيامىزعا ءبىرقاتار وزگەرىس ەنگىزىلدى. اتاپ ايتقاندا، ساياسي وزگەرىستەر سايلاۋعا دا قاتىستى. بۇگىن حالىق 7 جىلعا، ءبىر رەتكە قازاقستان پرەزيدەنتىن سايلايدى. سايلاۋدىڭ ءادىل ءارى اشىق وتۋىنە بارلىق جاعداي جاسالدى. كانديداتتارعا دا تەڭدەي مۇمكىندىك بەرىلدى. داۋىس بەرۋ بارىسىن حالىقارالىق بايقاۋشىلار قاداعالاپ جاتىر. پرەزيدەنت سايلاۋىنىڭ قازاقستان زاڭنامالارى مەن حالىقارالىق ستاندارتتارعا ساي وتەتىنىنە سەنىمدىمىن»، - دەيدى ول.
