بۇگىن كەزەكتەن تىس پرەزيدەنت سايلاۋى وتەدى
ەستەرىڭىزدە بولسا، 2022 -جىلدىڭ 1-قىركۇيەگىندە قازاقستان حالقىنا جولداۋىن ارناعان مەملەكەت باسشىسى كەزەكتەن تىس پرەزيدەنت سايلاۋىن وتكىزۋدى ۇسىنعان بولاتىن.
ال 21-قىركۇيەكتە پرەزيدەنت سايلاۋىن 2022 -جىلدىڭ 20-قاراشاسىنا بەلگىلەۋ تۋرالى مەملەكەت باسشىسىنىڭ جارلىعى جاريا ەتىلدى.
23-قىركۇيەكتە پرەزيدەنتتىككە ۇمىتكەرلەردى تىركەۋ باستالدى. سول كۇننەن 21-قازان ارالىعىنا دەيىن رەسپۋبليكالىق قوعامدىق بىرلەستىكتەر مەن ساياسي پارتيالار 12 تۇلعانى ورتالىق سايلاۋ كوميسسياسىنا ۇمىتكەر رەتىندە ۇسىندى. ونىڭ التاۋى پرەزيدەنتتىكتەن ۇمىتكەر رەتىندە تىركەلىپ، پرەزيدەنتتىككە كانديداتتار 21-قازان كۇنى ساعات 18.00-دەن باستاپ ۇگىت- ناسيحات جۇمىستارىنا كىرىسۋگە رۇقسات الدى.
ولار:
1. قاسىم- جومارت كەمەل ۇلى توقايەۆ - قازاقستان رەسپۋبليكاسىنىڭ قازىرگى پرەزيدەنتى.
ونىڭ كانديداتۋراسىن بىرنەشە ساياسي پارتيا مەن رەسپۋبليكالىق قوعامدىق بىرلەستىك حالىقتىق كواليتسيا رەتىندە ۇسىندى. ورتالىق سايلاۋ كوميسسياسى قاسىم-جومارت توقايەۆتى 12-قازاندا ۇمىتكەر رەتىندە تىركەدى.
2. مەيرام زەكەش ۇلى قاجىكەن - «زاماناۋي قوعامدى زەرتتەۋ ينستيتۋتى» ج ش س ديرەكتورى.
ونىڭ كانيداتۋراسىن «امانات» قازاقستان كاسىپوداقتارىنىڭ دوستاستىعى» رەسپۋبليكالىق قوعامدىق بىرلەستىگى ۇسىندى. م. قاجىكەندى ورتالىق سايلاۋ كوميسسياسى 15-قازاندا پرەزيدەنتتىككە كانديدات رەتىندە رەسمي تىركەدى.
3. جيگۋلي مولداقالىق ۇلى دايرابايەۆ - «قازاقستان فەرمەرلەر وداعى» قاۋىمداستىعىنىڭ پرەزيدەنتى. ونىڭ كانديداتۋراسىن «اۋىل» حالىقتىق- دەموكراتيالىق پاتريوتتىق پارتياسى ۇسىندى. ورتالىق سايلاۋ كوميسسياسى ج. دايرابايەۆتى 17-قازاندا كانديدات رەتىندە تىركەدى.
4. قاراقات جاقسىلىق قىزى ابدەن - استانا قالاسى ءماسليحاتىنىڭ VI شاقىرىلىمىنىڭ دەپۋتاتى، ق ر پرەزيدەنتى جانىنداعى ايەلدەر ىستەرى جانە وتباسىلىق- دەموگرافيالىق ساياسات جونىندەگى ۇلتتىق كوميسسيانىڭ، استانا قوعامدىق كەڭەسىنىڭ مۇشەسى، استانا اكىمىنىڭ الەۋمەتتىك ماسەلەلەر جونىندەگى شتاتتان تىس كەڭەسشىسى.
ونىڭ كانديداتۋراسىن «كاسىبي الەۋمەتتىك جۇمىسكەرلەر ۇلتتىق اليانسى» رەسپۋبليكالىق قوعامدىق بىرلەستىگى ۇسىندى. قاراقات ابدەندى ورتالىق سايلاۋ كوميسسياسى 19-قازان كۇنى كانديدات ەتىپ تىركەدى.
5. سالتانات پارحات قىزى تۇرسىنبەكوۆا – ق ر پرەزيدەنتى جانىنداعى ايەلدەر ىستەرى جانە وتباسىلىق- دەموگرافيالىق ساياسات جونىندەگى ۇلتتىق كوميسسيانىڭ مۇشەسى، «وتباسىنداعى زورلىق- زومبىلىقسىز قازاقستان» جوباسىنىڭ نەگىزىن قالاۋشى.
ونىڭ كانيداتۋراسىن «قازاق انالارى - داستۇرگە جول» رەسپۋبليكالىق قوعامدىق بىرلەستىگى ۇسىندى. ورتالىق سايلاۋ كوميسسياسى سالتانات تۇرسىنبەكوۆاعا كانديدات كۋالىگىن 20-قازاندا تاپسىردى
6. نۇرلان ساتىبالدى ۇلى اۋەسبايەۆ - جالپىۇلتتىق سوتسيال- دەموكراتيالىق پارتياسى استانا قالالىق فيليالىنىڭ ءتوراعاسى.
ونىڭ كانديداتۋراسىن جالپىۇلتتىق سوتسيال- دەموكراتيالىق پارتياسى ۇسىندى. نۇرلان اۋەسبايەۆتى ورتالىق سايلاۋ كوميسسياسى التىنشى ۇمىتكەر رەتىندە تىركەدى.
كانديداتتاردىڭ ۇگىت جۇمىستارى 2022 -جىلعى 19-قاراشادا ساعات 00.00-دە اياقتالدى. «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭنىڭ 32-بابىنا سايكەس، سايلاۋ بولاتىن كۇنى جانە ونىڭ قارساڭىنداعى كۇنى كەز كەلگەن ۇگىتكە تىيىم سالىنادى.
«ق ر سايلاۋ تۋرالى» كونستيتۋتسيالىق زاڭنىڭ 37-بابىنا سايكەس، سايلاۋ بيۋللەتەنىنە بارلىق تىركەلگەن كانديداتتار مەملەكەتتىك تىلدەگى ءالىپبي رەتىمەن تەگى، اتى، اكەسىنىڭ اتى كورسەتىلە وتىرىپ جازىلعان. سونداي-اق بيۋللەتەندە «بارىنە قارسىمىن» دەگەن جول ەنگىزىلگەن.
وسىلايشا، بيۋللەتەندە ابدەن قاراقات جاقسىلىق قىزى، اۋەسبايەۆ نۇرلان ساتىبالدى ۇلى، دايرابايەۆ جيگۋلي مولداقالىق ۇلى، قاجىكەن مەيرام زەكەش ۇلى، توقايەۆ قاسىم- جومارت كەمەل ۇلى، تۇرسىنبەكوۆا سالتانات پارحات قىزى جانە «بارىنە قارسىمىن» باعاناسى بار.
ەل بويىنشا سايلاۋعا بارلىعى 10101 ۋچاسكە ىسكە قوسىلادى، سايلاۋشىلار تىزىمىنە 11950485 ازامات ەنگىزىلدى. 4-قاراشادان باستاپ ەل تۇرعىندارىنا وزدەرىن تىزىمنەن تەكسەرۋگە مۇمكىندىك بەرىلدى. قازاقستان رەسپۋبليكاسىنىڭ شەت مەملەكەتتەردەگى وكىلدىكتەرى جانىنان 53 ەلدە 68 سايلاۋ ۋچاسكەسى قۇرىلدى.
