استانادا قوعامدىق كولىكتە جول اقىسىن تولەۋدەن جالتاراتىنداردىڭ سانى ارتقان
«جىل باسىنان بەرى قوعامدىق كولىكتە جول ءجۇرۋ اقىسىن تولەۋدەن جالتارۋدىڭ 82 مىڭ فاكتىسى تىركەلدى. ونىڭ ىشىندە 15521 جولاۋشى اكىمشىلىك جاۋاپكەرشىلىككە تارتىلدى. بۇل 2021-جىلدىڭ ۇقساس كەزەڭىمەن سالىستىرعاندا %127,5 كوپ»، - دەلىنگەن CTS كومپانياسىنىڭ قازاقپارات ساۋالىنا جولداعان جاۋابىندا.
كومپانيا مالىمەتى بويىنشا، كەيىنگى كەزدە بيلەتسىز جولاۋشىلاردىڭ سانى ايتارلىقتاي ارتقان.
«مىسالى، ا پۋنكتىنەن ۆ پۋنكتىنە دەيىن ءجۇرۋ جولىندا ءبىر اۆتوبۋستا جول اقىسىن تولەۋدەن جالتارعان 20 جولاۋشىعا دەيىن جەتىپ جاتادى. جول اقىسىن تولەمەۋ فاكتىسى سەرىكتەستىك قىزمەتكەرلەرىنىڭ مونيتورينگى كەزىندە عانا بەلگىلەنەدى. ياعني تاسىمالداۋ پروتسەسىن قاداعالاۋ بارىسىندا عانا قوعامدىق كولىكتىڭ جوسىقسىز پايدالانۋشىلارىن انىقتاۋعا بولادى»، - دەپ جازادى CTS ماماندارى.
