قوستاناي وبلىسىندا اۋىزسۋدى تىڭ تەحنولوگيامەن تازالاپ جاتىر

ليساكوۆ قالاسىندا بۇل سۋ تازارتۋ ستانسياسى جارتى عاسىر بۇرىن سالىندى. بيىل نىسان جاڭعىرتۋدان ءوتىپ، ءبىرسىپىرا يننوۆاتسيالىق جۇيەمەن جابدىقتالدى. مودۋلدى ستانسيا ورناتىلىپ، حلوردىڭ ورنىنا رەاگەنت پايدالانۋ قاجەتتىلىگى تۋدى. ەندى شاعىن شاھار تۇرعىندارى ەكولوگيالىق تازا اۋىزسۋ تۇتىنادى.

اندرەي كۋسوۆ، باس مەردىگەر:

- رەاگەنتتىڭ قۇرامىندا تۇز جوق. ونىڭ ادام دەنساۋلىعىنا ەشقانداي قاۋپى جوق. اۋىر مەتالداردى، ورگانيكالىق لاستانۋدى ءتيىمدى تازارتادى. اتالعان تەحنولوگيا فينليانديا جانە چەحيادا كەڭ قولدانىسقا يە. جاڭا جۇيە رەسەيدەگى 150-گە جۋىق قالادا ءوزىنىڭ تيىمدىلىگىن دالەلدەگەن.

تازارتۋ جۇيەسىنە ليساكوۆ قالاسىنىڭ قازىناسىنان 162 ميلليون تەڭگە ءبولىندى. بيۋدجەت قارجىسى ءوزىن تولىق اقتايتىنىنا سەنىمدى قالا باسشىسى.

اباي يبرايەۆ، ليساكوۆ قالاسىنىڭ اكىمى:

- سۋدىڭ ساپاسى جاقساراتىنى ءسوزسىز. ياعني ادام دەنساۋلىعىنا دا پايداسى بولادى. قۇبىرلار كوپكە دەيىن شىداس بەرەدى. رەاگەنتتىڭ ءوزى ارزانعا ءتۇسىپ، كوپ مولشەردە قولدانىلمايدى. ءوز كەزەگىندە بۇنىڭ ەكولوگياعا زيانى بولمايدى.

ەسكى تەحنولوگيادان باس تارتۋ سۋ قۇبىرلارىنىڭ پايدالانۋ مەرزىمىن ءۇش ەسە ارتتىرادى. كوممۋنالدىق سالادا قاراجاتتىڭ ايتارلىقتاي ۇنەمى بولادى.

اباي يبرايەۆ، ليساكوۆ قالاسىنىڭ اكىمى:

- تاريفتىڭ تۇراقتىلىعىنا دا اسەر ەتەدى. سۋدىڭ وزىندىك قۇنى تومەندەپ، نەگىزسىز قىمباتتاۋىن بولدىرمايدى. ازىرگە اۋىزسۋ تازارتۋدىڭ بۇل تەحنولوگياسى رەسپۋبليكا بويىنشا العاش بىزدە ەنگىزىلدى. قازىر ونىڭ ءبىرىنشى كەزەڭى اياقتالدى. نىسانداعى جۇمىستاردىڭ ەكىنشى كەزەڭى كەلەر جىلى جالعاسادى. قالادا اۋىزسۋدان باسقا كارىز جۇيەلەرىن تازارتۋدىڭ تىڭ تەحنولوگياسى دا قولدانىسقا ەنگىزىلەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى