جەتىسۋ وبلىسىندا قۇلاندى قورعاۋ جۇمىستارى ءجۇرىپ جاتىر
قازاقستان بيوالۋانتۇرلىلىكتى ساقتاۋ قاۋىمداستىعىنىڭ ماماندارى «وحوتزووپروم» وندىرىستىك بىرلەستىگىمەن بىرىگىپ رەسپۋبليكامىزدىڭ ەكى وبلىسىنا 60-تان استام جابايى جانۋاردى جەتكىزگەن. قۇلاندار ەلىمىزدە «قىزىل كىتاپقا» ەنگەن جانە جوعالۋ قاۋپى بار سيرەك كەزدەسەتىن جانۋارلار قاتارىندا. قازاقستاندى مەكەندەيتىن قۇلاننىڭ ءتۇرى وتكەن عاسىردىڭ 30- جىلدارىندا تولىقتاي جويىلىپ كەتكەن دەپ سانالادى. ولاردىڭ جويىلۋىنا ادام فاكتورى، اڭشىلىق جانە ءۇي جانۋارلارىمەن جايىلىمعا تالاس اسەر ەتكەن.
عالىمدار قۇلانداردىڭ رەينترودۋكسياسى جوباسىن قولعا الىپ، 1953 -جىلى ارال تەڭىزىندەگى بارساكەلمەسكە تۇركىمەنستاننان 11 قۇلان اكەلىنەدى. الايدا ارال تەڭىزى تارتىلىپ، سۋداعى تۇز مولشەرى ارتقان سوڭ، جىلقى تۇقىمداس جانۋار تۇزدى سۋ ىشە المايدى. سوندىقتان قۇلانداردى «التىنەمەل» ۇلتتىق ساياباعىنا جەتكىزەدى. جەر ءجانناتى جەتىسۋ جەرىندە قۇلاننىڭ سانى ارتىپ، قازىرگى ۋاقىتتا 4 مىڭعا جۋىقتاپ قالعان. ەندى ءتۇز تاعىسىن ەلىمىزدىڭ وزگە وڭىرلەرىنە جەتكىزۋ جۇمىستارى ءجۇرىپ جاتىر.
اسەت الىمبەك، «التىنەمەل» مۇتپ قاپشاعاي ورمانشىلىعىنىڭ ءبولىم باستىعى:
- بىزدە وسى قۇلانداردى جەرسىندىرۋ ماقساتىندا «التىنەمەل» ۇلتتىق پاركىنەن جان- جاققا باسقا رەزەرۆاتتارعا قۇلاندار الىنىپ جاتىر. 2017 -جىلى التىن دالا رەزەرۆارتىنا 9 باس قۇلان الىندى. 2022 -جىلى التىن دالا رەزەرۆارتىنا 4 باس قۇلان الىندى. 2022 -جىلدىڭ قازان ايىندا جەرسىندىرۋ ماقساتىندا ىلە- بالقاش رەزيەۆارتىنا «التىنەمەل» م ۇ ت پ- دەن 60 باس قۇلان الىندى.
قازىرگى تاڭدا قۇلاندار ەلىمىزدىڭ ەكى وبلىسىندا مەكەندەيدى: وڭتۇستىك بالقاش وڭىرىندە جانە ۇلىتاۋ وبلىسىنداعى «التىن دالا» قورىعىندا. «ولاردى جەرسىندىرۋ جۇمىستارىنىڭ ەڭ قيىن كەزەڭى وسى وڭتۇستىكتەن «التىن دالا» رەزەرۆاتىنا جەتكىزۋ»، - دەيدى ماماندار.
اسەت الىمبەك، «التىنەمەل» م ۇ ت پ قاپشاعاي ورمانشىلىعىنىڭ ءبولىم باستىعى:
- ەندى بۇل قۇلانداردى جەرسىندىرۋ ماقساتىندا الىپ كەتۋ ءۇشىن كاماز اۆتوكولىكتەرىنە، اعاش جاشىكتەرگە بولەك- بولەك قۇلانداردى تيەپ جىبەرەمىز. ال ەندى التىن دالا رەزەرۆارتى الىس بولعاندىقتان وعان ۆەرتولەتپەن الىپ كەتىپ جاتىر.
قازىر «التىن دالا» قورىعىندا بارلىعى 12 باس قۇلان بار ەكەن. 2017 -جىلى قولعا الىنعان جابايى جانۋارلاردى جەرسىندىرۋ جۇمىستارىنىڭ وزىندىك قيىنشىلىقتارى دا بار. بىرىنشىدەن، ولاردى قولعا ۇيرەتۋ مۇمكىن ەمەس، سوندىقتان ءتۇن ۋاقىتىندا عانا ۇستاۋعا تۋرا كەلەدى. قاراڭعىدا قۇلاندار ناشار كورەدى جانە جىلدام جۇگىرە المايدى. قازاقستان بيوالۋانتۇرلىلىكتى ساقتاۋ قاۋىمداستىعى ءتۇز تاعىسىن تۇراقتى تۇردە كوبەيتۋ ءۇشىن تورعاي دالاسىنا تاعى 80 قۇلان اپارۋدى جوسپارلاپ وتىر.
www.24.kz
