قازاق ءتىلى بارلىق تۇركى ەلىنە ورتاق ءتىل بولاتىنى راس پا؟
بۇل - ەسكى فەيك، - دەپ حابارلايدى Stopfake.kz سايتى.
باسىلىم مالىمەتىنشە، قازنەتتە ءدال وسىنداي حابارلاما 2021-جىلى تاراعان بولاتىن. ول بىردەن كۇدىكتى بولىپ كورىنەدى. گەيدار اليەۆ 19 جىل بۇرىن، 2003-جىلى قايتىس بولعان. حابارلاماعا تىركەلگەن سۋرەتتە ونىڭ ۇلى ءارى ازەربايجان پرەزيدەنتى يلحام اليەۆ بەينەلەنگەن. حابارلامادا جازىلعان دايەكسوزدىڭ بۇل ەكەۋىنە دە قاتىسى جوق.
بارلىق تۇركى جۇرتى ءۇشىن ءبىرىڭعاي ءتىل تۋرالى 2011-جىلعى قاراشادا تۇركيانىڭ ازەربايجانداعى ەلشىسى حۋلۋسي كىلىدج تۇركى الەمىنىڭ مادەني ينتەگراتسياسى بويىنشا باكۋدە وتكەن كونفەرەنسيادا مالىمدەگەن بولاتىن. الايدا ول ورتاق ءتىل رەتىندە قازاق ءتىلىن ەمەس، تۇرىك ءتىلىن تاڭداۋدى ۇسىنعان.
1991-جىلى بەكىتىلگەن جالپى تۇركى ءالىپبيى بار. ول لاتىن گرافيكاسى نەگىزىندە جاسالعان. وعان سۇيەنگەن ماماندار لاتىن الىپبيىنە نەگىزدەلگەن قازاق ءتىلىنىڭ ءالىپبيىن ازىرلەپ جاتىر. دەگەنمەن ءبىرىڭعاي ءالىپبي تۇركى ەلدەرىنىڭ بارىندە بىردەي قولدانىلمايدى. ازەربايجان، تۇرىكمەن جانە وزبەك الىپبيلەرىندە جالپى الفاۆيتتە جوق سپەتسيفيكالىق ارىپتەر بار. قازاق ءالىپبيىنىڭ لاتىن نۇسقاسىندا جالپى الىپبيدە ۇسىنىلماعان ءۇش ءارىپ بار.
دەمەك، گەيدار اليەۆ نەمەسە ونىڭ ۇلى يلحام اليەۆ ءبىر كەزدەرى قازاق ءتىلىن بارلىق تۇركى حالقىنا ورتاق ەتىپ الۋدى ۇسىنعان دەپ ساناۋعا نەگىز جوق. بۇل - بىرنەشە جىلدان بەرى مەسسەندجەرلەرگە تارالىپ جۇرگەن ەسكى فەيك.
