قازاقستاننىڭ حالىقارالىق كاسىپوداقتار فەدەراتسياسىنداعى مۇشەلىگى قالپىنا كەلتىرىلدى
بۇل تۋرالى ق ر ك ف ءتوراعاسى ساتىبالدى داۋلەتالين ءمالىم ەتتى، دەپ حابارلايدى قازاقپارات ق ر كاسىپوداقتار فەدەراتسياسىنىڭ مەدياورتالىعىنا سىلتەمە جاساپ.
ق ر كاسىپوداقتار فەدەراتسياسىنىڭ دەلەگاتسياسى اۆستراليانىڭ مەلبۋرن قالاسىندا ءوتىپ جاتقان حالىقارالىق كاسىپوداقتار كونفەدەراتسياسىنىڭ V كونگرەسىنە قاتىسىپ جاتىر.
«ح ك ك باس كەڭەسىنىڭ وتىرىسىندا ق ر كاسىپوداقتار فەدەراتسياسىنىڭ حالىقارالىق كاسىپوداقتار كونفەدەراتسياسىنا مۇشەلىگى تۋرالى ماسەلە قارالدى. كاسىپوداقتار فەدەراتسياسىنىڭ ح ك ك- گە مۇشەلىگىن قالپىنا كەلتىرۋ تۋرالى شەشىم قابىلداندى! دەگەنمەن، ەلىمىزدەگى بىرلەستىكتەر بوستاندىعىن قامتاماسىز ەتەتىن زاڭنامالىق رەفورمالاردىڭ جۇزەگە اسىرىلۋى ماڭىزدى»، - دەدى ساتىبالدى داۋلەتالين.
17-22- قاراشادا 300 دەن استام ۇلتتىق كاسىپوداق ورتالىقتارىنىڭ دەلەگاتتارى الداعى ءتورت جىلعا ارنالعان دۇنيەجۇزىلىك كاسىپوداقتار قوزعالىسىنىڭ كۇن ءتارتىبىن تالقىلايدى.
كونگرەسس قاتىسۋشىلارى مۇشە-ەلدەردەگى تۇراقتىلىقتى ساقتاۋ بويىنشا ۇسىنىستار كورسەتىلەتىن «جاڭا الەۋمەتتىك كەلىسىمشارت» مالىمدەمەسىن قابىلداۋعا نيەتتى. مالىمدەمە جوباسىنا سايكەس، تالقىلاۋ جاڭا الەۋمەتتىك كەلىسىمشارت تاقىرىبىنا: «جاسىل» جۇمىس ورىندارى، جۇمىسكەرلەردىڭ قۇقىقتارى، ادىلەتتى جالاقى، الەۋمەتتىك قورعاۋ، تەڭدىك جانە ينكليۋزيۆتىلىككە ارنالادى.
ايتا كەتسەك، حالىقارالىق كاسىپوداقتار كونفەدەراتسياسى - 161 ەلدەن 176 ميلليون ادام كىرەتىن الەمدەگى ەڭ ءىرى كاسىپوداق بىرلەستىگى. 2018-جىلى قازاقستان رەسپۋبليكاسى كاسىپوداقتار فەدەراتسياسىنىڭ ح ك ك- گە مۇشەلىگى توقتاتىلعان بولاتىن.
