فۋتبول: قازاقستان قۇراماسى وزبەكستاننان جەڭىلىپ قالدى

قوس مەملەكەتتىڭ قۇرامالارى اراسىنداعى ويىن بۇرىننان تارتىستى ءوتىپ كەلەدى. دەسە دە قازىر ءبىرى ەۋروپا، ءبىرى ازيا قۇرلىعىندا دوپ تەبەدى. سوندىقتان ەكى قۇرامانىڭ كەزدەسۋى ۇزاق جىلدان بەرى وتكىزىلمەي كەلدى.

ايتا كەتسەك، ەكى قۇراما بۇعان دەيىن التى مارتە كەزدەستى. ونىڭ بىرەۋىندە قازاقستاندىق فۋتبولشىلار جەڭسە، ەكەۋىندە وزبەكستاندىق قۇراما باسىم ءتۇستى. ءۇش ويىن تەڭ ناتيجەمەن اياقتالدى.

سوندىقتان بۇگىنگى كەزدەسۋ تارتىستى وتەتىنى انىق ەدى.

كورشى ەلدىڭ استاناسى - تاشكەنت قالاسىنداعى «پاحتاكور» ستاديونىندا وتكىزىلگەن ويىن بارىسىندا قوس قۇرامانىڭ بەلسەندىلىگى بايقالدى. الاڭ يەلەرى دە ۇرىمتال ساتتەردى ۇيىمداستىرۋعا كۇش سالدى.

ءبىرىنشى كەزەڭنىڭ 12-مينۋتىندا وزبەكستاندىق حوكيمات ەركينوۆ ەسەپ اشسا، 45-مينۋتتا ەلدور شومۋرودوۆ باسىمدىقتى ارتتىردى.

ەكىنشى كەزەڭدە قازاقستاندىق قۇرامادان اسلان دارابايەۆتى باكتيەر زاينۋتدينوۆ الماستىردى. بۇدان كەيىن قوس قۇرامانىڭ دا گول سوعاتىن مۇمكىندىگى بولدى. ويىننىڭ 61-مينۋتىندا قازاقستاندىق ەلحان استانوۆ تەپكەن دوپتى وزبەك قاقپاشىسى وتكىر ەسۋپوۆ قايتارىپ ۇلگەردى.

ويىننىڭ 68-مينۋتىندا باۋىرجان يسلامحان ەكى جىلدىق ۇزىلىستەن كەيىن جاسىل الاڭعا قايتا ورالدى. ول 2020-جىلدىڭ قىركۇيەك ايىندا دوپينگ قولداندى دەگەن جەلەۋمەن فۋتبولدان ەكى جىلعا شەتتەتىلگەن ەدى. جاقىندا ول جازا مەرزىمىن تولىق اياقتادى.

سودان كەيىن ۇلتتىق قۇراماعا شاقىرتۋ الدى.

ەكىنشى كەزەڭدە قۇرامالار العا قاراي ۇمتىلدى. دەگەنمەن تابلوداعى ەسەپ وزگەرىسسىز قالدى.

وسىلايشا قازاقستان قارسىلاسىنا 0:2 ەسەبىمەن جول بەردى.

ەندى قازاقستان قۇراماسى 19- قاراشادا سىرت الاڭدا بىرىككەن اراب امىرلىگى قۇراماسىمەن كەزدەسەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى