ۋكراينادا جارىلىستان كەيىنگى جاعداي قانداي؟
Massaget.kz ءتىلشىسى ۋكرايناداعى كەيىنگى احۋالعا شولۋ جاسادى.
پولشا پرەزيدەنتى بايدەنمەن شۇعىل كەلىسسوز وتكىزدى
پولشا پرەزيدەنتى اندجەي دۋدا پشيەۆودوۆ قالاسىندا زىمىران قۇلاۋىنا بايلانىستى امەريكالىق كوشباسشى دجو بايدەنمەن شۇعىل كەلىسسوز وتكىزدى. بۇل تۋرالى پولشا پرەزيدەنتىنىڭ كەڭسەسى Twitter- دە حابارلادى. سونىمەن قاتار، ناتونىڭ باس حاتشىسى يەنس ستولتەنبەرگ دۋدامەن بولعان وقيعانى تالقىلاعانىن ايتتى.
«قازا تاپقاندارعا بايلانىستى كوڭىل ايتتىم. ناتو جاعدايدى باقىلايدى جانە وداقتاستار كەڭەس بەرەدى. بارلىق دەرەك انىقتالۋى ماڭىزدى»، - دەدى ول.
اق ءۇي مالىمەتىنشە، بايدەن مەن دۋدا پولشاداعى جارىلىسقا بايلانىستى كەلەسى قادامداردى ۇيلەستىرۋگە كەلىسكەن.
«بايدەن ا ق ش- تىڭ تولىق قولداۋىن جانە پولشاداعى تەرگەۋگە كومەكتەسۋدى ۇسىندى. بايدەن امەريكا قۇراما شتاتتارىنىڭ ناتوعا دەگەن ادالدىعىن راستادى»، - دەلىنگەن حابارلامادا.
ناتو ەلدەرىنىڭ شۇعىل كەلىسسوزى وتەدى
ناتو ەلشىلەرى 16- قاراشادا اليانس جارعىسىنىڭ 4-بابى بويىنشا پولشانىڭ وتىنىشىمەن شۇعىل كەزدەسۋ وتكىزەدى. اليانس مۇقيات ارەكەت ەتەدى جانە وقيعانىڭ قالاي بولعانىن تەكسەرۋ ءۇشىن ءبىراز ۋاقىت قاجەت بولادى. پولشانىڭ ۇلتتىق قاۋىپسىزدىك بيۋروسىنىڭ باسشىسى ياتسەك سيۆەرانىڭ ايتۋىنشا، دۋدا ستولتەنبەرگتەن اليانس كەلىسىمىنىڭ ءتورتىنشى بابىن قولدانۋ مۇمكىندىگىن سۇراعان.
پولشا پرەمەرى حالىقتى سابىرعا شاقىردى
پولشا پرەمەر-ءمينيسترى ماتەۋش موراۆەتسكي پشيەۆودوۆتاعى جارىلىس سالدارىنان ەكى ادام قازا تاپقانىنا بايلانىستى حالىقتى سابىرعا شاقىردى.
«پولياكتاردى وسى قايعىلى جاعدايعا بايلانىستى سابىرلى بولۋعا شاقىرامىن... ءبىز ۇستامدىلىق پەن ساقتىق تانىتۋىمىز كەرەك»، - دەدى موراۆەتسكي ۆارشاۆاداعى ۇكىمەتتىڭ توتەنشە كەلىسسوزدەرىنەن كەيىن.
Radio ZET NEWS پولياك جاڭالىقتار ستانتسياسى مالىمەتىنشە، زىمىراندى كىم اتقانى تۋرالى ناقتى دالەل جوق جانە تەرگەۋ جۇرگىزىلىپ جاتىر.
رەسەي پولشا مەن ۋكراينا شەكاراسىنداعى وقيعاعا قاتىسى بارىن جوققا شىعاردى
رەسەي قورعانىس مينيسترلىگى مالىمەتىنشە، ۋكراينا-پولياك شەكاراسىنا جاقىن ماڭدا رەسەيلىك تاراپ سوققى جاساماعان.
«پولشا بۇقارالىق اقپارات قۇرالدارى مەن شەنەۋنىكتەرىنىڭ پشيەۆودۋۆ ەلدى مەكەنى ماڭىندا «رەسەيلىك» زىمىران قۇلادى دەگەن مالىمدەمەلەرى - قاساقانا ارانداتۋ. ۋكراينا-پولشا مەملەكەتتىك شەكاراسىنا جاقىن نىساندارعا رەسەيلىك سوققى جاسالمادى»، - دەدى قورعانىس مينيسترلىگى وكىلى.
ەۋروپا ەلدەرى پولشاعا كوڭىل ايتتى
گەرمانيا كانتسلەرى ولاف شولتس پولشا پرەزيدەنتى اندجەي دۋدامەن تەلەفون ارقىلى سويلەستى. ول ۋكراينا شەكاراسىنداعى پولشاداعى وقيعاعا بايلانىستى ۆارشاۆاعا قولداۋ ءبىلدىردى. بۇل تۋرالى سارسەنبىدە گەرمانيا ۇكىمەتى وكىلى ستەففەن حەبەنسترايت Twitter- دە حابارلادى.
«گەرمانيا كانتسلەرى پولشا پرەزيدەنتى دۋدامەن تەلەفون ارقىلى سويلەسىپ، وعان كوڭىل ايتتى. گەرمانيا ناتو بويىنشا سەرىكتەسى - پولشا جاعىندا»، - دەدى حەبەنسترايت.
زەلەنسكي رەسەيدى ۇجىمدىق قاۋىپسىزدىككە شابۋىل جاسادى دەپ ايىپتادى
ۋكراينا پرەزيدەنتى ۆلاديمير زەلەنسكي رەسەيگە پولشا اۋماعىنا جاسالعان «زىمىران سوققىسى» ءۇشىن جاۋاپكەرشىلىك جۇكتەدى، ونى ۇجىمدىق قاۋىپسىزدىك سوققىسى جانە وتە ماڭىزدى ەسكالاتسيا دەپ اتادى. بۇل تۋرالى ول Telegram-دا جازدى.
سونداي-اق، زەلەنسكي سەيسەنبىدە رەسەي ۋكراينا اۋماعىندا 90 زىمىران اتقانىن، ناتيجەسىندە ەلدىڭ ەنەرگەتيكالىق جۇيەسىنە زاقىم كەلگەنىن اتاپ ءوتتى.
ۋكراينانىڭ 20 ميلليونعا جۋىق تۇرعىنى جارىلىستان كەيىن ەلەكتر قۋاتىنسىز قالدى
ۋكراينانىڭ ەنەرگەتيكالىق نىساندارىنا جاسالعان سوققى سالدارىنان 7 ميلليوننان اسا ابونەنت جارىقسىز قالعان. بۇل شامامەن 20 ميلليون ادام بولادى. بۇل تۋرالى پرەزيدەنت كەڭسەسى باسشىسىنىڭ ورىنباسارى كيريلل تيموشەنكو ايتتى.
«ءارتۇرلى ايماقتارداعى 15 ەنەرگەتيكالىق نىسان زارداپ شەكتى. قازىر 7 ميلليوننان اسا ابونەنت ءوشىرىلدى، بۇل شامامەن 20 ميلليون ادام»، - دەدى تيموشەنكو.
ۋكراينا «درۋجبا» بويىنشا مۇناي ايداۋدى توقتاتتى
ۋكراينا كەرنەۋدىڭ تومەندەۋىنە بايلانىستى ۆەنگريا باعىتىنداعى «درۋجبا» قۇبىرى ارقىلى مۇناي ايداۋدى توقتاتتى. بۇل تۋرالى «ترانسنەفت» رەسمي وكىلى يگور دەمين ايتتى.
«درۋجبا» مۇناي قۇبىرىنىڭ توقتاۋىنا بايلانىستى ۆەنگريا پرەمەر-ءمينيسترى ۆيكتور وربان 15- قاراشادا كەشكە قاۋىپسىزدىك كەڭەسىن شاقىردى.
ب ۇ ۇ قاۋىپسىزدىك كەڭەسىنىڭ ۋكرايناعا قاتىستى وتىرىسى 16- قاراشادا وتەدى
ۋكراينا بويىنشا ب ۇ ۇ قاۋىپسىزدىك كەڭەسىنىڭ كەزەكتى وتىرىسى 16- قاراشادا وتەدى. وتىرىستىڭ تاقىرىبى ۋكراينادا «بەيبىتشىلىك پەن قاۋىپسىزدىكتى ساقتاۋ» رەتىندە كورسەتىلگەن. وتىرىس استانا ۋاقىتى بويىنشا ساعات 01:00 گە جوسپارلانعان.
