توقايەۆ قاڭتار وقيعاسى جايلى: بەيبىت شەرۋ مەن قاراقشىلاردىڭ قاندى قىلمىسىنىڭ اراسىن اجىراتا ءبىلۋ كەرەك
«قاسىرەتتى قاڭتار ەلىمىز ءۇشىن زور سىناق بولدى. قاساقانا ارەكەت ەتكەن قاراقشىلار توبى مەملەكەتتىگىمىزدىڭ تۇعىرىن شايقالتۋعا تىرىستى، ەلدەگى تۇراقتىلىقتىڭ تامىرىنا بالتا شاپقىسى كەلدى. ءبىز بۇل جەردە ءبىر ماسەلەنىڭ باسىن اشىپ الۋىمىز كەرەك. بەيبىت شەرۋلەردىڭ سەبەبى - ءبىر بولەك. ال، مەملەكەتتىك توڭكەرىس جاساعىسى كەلگەندەردىڭ ماقساتى - مۇلدە باسقا. قاڭتار وقيعاسىنىڭ استارىنا ۇڭىلسەك، ونىڭ سەبەپتەرى ايقىن كورىنەدى. ەلىمىزدە ۇزاق ۋاقىت الەۋمەتتىك ادىلدىك نازاردان تىس قالدى. مەملەكەت پەن قوعامنىڭ اراسى الشاقتاپ كەتتى. جىلدار بويى شەشىلمەگەن الەۋمەتتىك- ەكونوميكالىق ماسەلەلەردەن جۇرت ابدەن قاجىدى. بۇل - تۇسىنىكتى جايت. الايدا، قىلمىسكەرلەردىڭ كوزدەگەنى باسقا ەدى. ولار بەيبىت شەرۋدى جاپپاي تارتىپسىزدىككە اينالدىرعىسى كەلدى. الدىن- الا ازىرلەگەن ارانداتۋشىلار، بۇزاقىلار، ءتىپتى قاراقشىلاردى پايدالاندى. سونىڭ كەسىرىنەن الماتىداعى جاعداي كۇرت ناشارلادى، ءتىپتى، باقىلاۋدان شىقتى. قىلمىسكەرلەر اكىمشىلىك عيماراتتاردى باسىپ الدى. كوشەلەردى جاۋىپ، جولىندا كەزدەسكەننىڭ ءبارىن قيراتتى، تونادى. قىسقاسى، ويلارىنا نە كەلسە، سونى ىستەدى. ءبىراق، قانداي جاعداي بولسىن، ازاماتتارىمىز، ەڭ باستىسى، الماتىنىڭ اسقاق رۋحىن قۇلاتقان جوق. قالا تۇرعىندارى جۇدىرىقتاي جۇمىلدى، سۇيىكتى قالاسىن قورعاپ قالۋ ءۇشىن بىرىكتى. ارينە، سودىرلاردىڭ مۇندايدى كۇتپەگەنى ايدان انىق»، - دەدى مەملەكەت باسشىسى.
سونىمەن قاتار پرەزيدەنت الماتىنى قيراتىپ جاتقانى جانىنا باتقانىن ايتتى.
«ەلىمىزدىڭ التىن بەسىگى - الماتىنى قيراتىپ جاتقانى وسى قالانىڭ پەرزەنتى رەتىندە مەنىڭ دە جانىما باتتى. دەگەنمەن، ءدال سول ساتتە ابدىراپ، ۋاقىت ۇتتىرۋعا ەش قاقىمىز بولعان جوق. وندا ابدەن داندايسىپ كەتكەن قاراقشىلار قالامىزدى كۇل-تالقان ەتەر ەدى.
ەل تاعدىرى سىنعا تۇسكەن جاۋاپتى ساتتە حالقىمىز مىزعىماس بىرلىگى مەن قايتپاس قايسارلىعىن تانىتتى. مەملەكەتتىگىمىزدى ساقتاپ قالۋ ءۇشىن ءبىز قانداي تاۋەكەلگە دە باراتىنىمىزدى ايقىن كورسەتتىك. سول قيىن كۇندەردە بۇكىل قازاقستان حالقى الماتىلىقتاردىڭ تىلەۋىن تىلەدى. وكىنىشكە قاراي، ءقازىر كەيبىرەۋلەر قىلمىستىق ارەكەتتى حالىق كوتەرىلىسى دەپ اقتاۋعا تىرىسىپ ءجۇر.
تاعى دا ايتامىن: حالىقتىڭ بەيبىت شەرۋى مەن قاراقشىلار جاساعان قاندى قىلمىستىڭ اراسىن اجىراتا ءبىلۋ كەرەك. ءبىز جەدەل جانە باتىل ارەكەت جاساعاننىڭ ارقاسىندا ەل ىشىندە دەرەۋ ءتارتىپ ورناتتىق. قابىلداعان شەشىمدەرىمىز جانە ءىس-ارەكەتىمىز بۇكىل دۇنيە جۇزىندە تۇسىنىستىكپەن مويىندالدى، ءتىپتى، قولداۋ تاپتى»، - دەپ تولىقتىردى پرەزيدەنت.
سونىمەن قاتار مەملەكەت باسشىسى قاسىرەتتى كۇندەر الىستاعان سايىن بىرتىندەپ كومەسكى تارتا بەرەتىنىن جەتكىزدى.
«ۋاقىت - ەمشى» دەيدى حالقىمىز. قاسىرەتتى كۇندەر الىستاعان سايىن بىرتىندەپ كومەسكى تارتا بەرەتىنى انىق. قارۋلى توپتاردىڭ قالاي ويران سالعانى دا ەستەن شىعۋى مۇمكىن. ءبىراق، ءبىز ەل ىشىنە جىك سالعىسى كەلەتىن ارانداتۋشىلاردىڭ جەتەگىندە كەتپەۋىمىز كەرەك. كوشەگە شىعىپ، بۇزاقىلىق جاساعان ادامداردى دارىپتەپ، قولدان قاھارمان جاساۋعا بولمايدى. قاستاڭدىق ۇيىمداستىرعان قاراقشىلاردىڭ قىلمىسىن اقتاۋعا جول بەرىلمەيدى. ولاردىڭ ءبارى لايىقتى جازاسىن الادى. ءبىراق، قىلمىسكەرلەردىڭ قولشوقپارى بولعان، ارانداپ قالعان جاندار دا بار. مەن اۋىر قىلمىس جاساماعان وسىنداي ازاماتتارعا كەشىرىممەن قاراعان ءجون دەپ شەشتىم. وسىعان وراي، راقىمشىلىق تۋرالى زاڭ قابىلداندى. بۇل - ادامگەرشىلىك تۇرعىدان دۇرىس قادام. ويتكەنى، كەشىرىم - ىزگىلىكتىڭ بەلگىسى. قاجەتتى زاڭدىق راسىمدەر كەيىن راقىمشىلىق جاسالعان ادامدار بوساتىلىپ، وتباسىنا ورالادى. بۇدان بىلاي مۇنداي قاسىرەت قايتالانبايدى دەپ سەنەمىن. سول ءۇشىن ءبىز قولدان كەلگەننىڭ ءبارىن جاسايمىز. قايعىلى كۇندەردە قازا بولعان جانداردىڭ جاقىندارىنا تاعى دا كوڭىل ايتامىن. سىن ساعاتتا انتقا ادال بولعان قۇقىق قورعاۋ جانە كۇشتىك قۇرىلىمداردىڭ قىزمەتكەرلەرىن ەرەكشە اتاپ وتكىم كەلەدى. قوعامدىق ءتارتىپتى قالپىنا كەلتىرۋگە قالا تۇرعىندارى دا اتسالىستى. وسىنداي جاناشىر ازاماتتاردىڭ بارىنە ريزاشىلىعىمدى بىلدىرەمىن. «قاڭتار قاسىرەتى» بىزگە سىناق قانا ەمەس، ۇلكەن ساباق بولدى. تىنىشتىق پەن تۇراقتىلىقتىڭ قادىرىن جۇرتىمىز جەتە ءتۇسىندى. ال، قوعامعا ىرىتكى سالۋدى كوزدەگەن قاراقشىلاردىڭ، لاڭكەستەردىڭ ماقساتى ورىندالعان جوق. كەرىسىنشە، حالقىمىزدىڭ بىرلىگى نىعايا ءتۇستى. ۇيىسىپ، جان-جاقتى جاڭعىرۋ جولىنا قادام باستى»، - دەدى كەزدەسۋدە سويلەگەن سوزىندە.
