توقايەۆ: الماتىدا ەمحانالار مەن اۋرۋحانالار ابدەن ەسكىرگەن
«قالاداعى دەنساۋلىق ساقتاۋ سالاسى تۋرالى ايتساق، مۇنداعى نەگىزگى مىندەت - ينفراقۇرىلىمدى دامىتۋ جانە قىزمەت كورسەتۋ ساپاسىن ارتتىرۋ. الماتىدا ەمحانالار مەن اۋرۋحانالار ابدەن ەسكىرگەن. تۇرعىن ۇيلەر سالعان كەزدە الەۋمەتتىك نىساندار دۇرىس جوسپارلانبايدى. ال، بۇل الدىمەن تۇرعىنداردىڭ ومىرىنە تەرىس اسەر ەتەدى. ياعني، تۇرعىندارعا كورسەتىلەتىن قىزمەتتىڭ قولجەتىمدى بولۋىنا، جەدەل جاردەمنىڭ دەر كەزىندە كومەككە كەلۋىنە كەدەرگى كەلتىرەدى.
اكىمدىك جاڭا مەديتسينالىق نىساندار سالىپ، جاڭعىرتۋ ءۇشىن ارنايى جوسپار ازىرلەۋى كەرەك. بۇل شارالار انا مەن بالا ءولىمىن ازايتىپ، ازاماتتاردىڭ اۋىر دەرتتەن ساقتانۋىنا مۇمكىندىك بەرەدى. سونىمەن قاتار، العاشقى دارىگەرلىك- سانيتارلىق كومەك جۇيەسىن دامىتۋ قاجەت. كەلەسى جىلى حالىقارالىق دەڭگەيدەگى كوپبەيىندى اۋرۋحانا قۇرىلىسىن باستاۋ كەرەك. جوبانى مەملەكەت پەن بيزنەستىڭ سەرىكتەستىگى ارقىلى جۇزەگە اسىرعان ءجون»، - دەدى مەملەكەت باسشىسى.
ق. توقايەۆ شاھاردىڭ قۇرىلىسى قارقىن اۋداندارىندا پەرزەنتحاناسى بار اۋرۋحانالار سالۋ كەرەكتىگىن اتاپ ءوتتى.
«قالانىڭ قارقىندى ءوسىپ كەلە جاتقان اۋداندارىندا پەرزەنتحاناسى بار اۋرۋحانالار سالۋ كەرەك. حالىقتىڭ دەنساۋلىعىن ساقتاۋ ءۇشىن ناۋقاستاردى ەمدەۋمەن قاتار، اۋرۋدىڭ الدىن الۋ وتە ماڭىزدى. وسى ورايدا، قالا تۇرعىندارىنىڭ سالاماتتى ءومىر سالتىن ۇستانۋىنا جاعداي جاساۋ قاجەت.
قازىرگى تاڭدا الماتىلىقتاردىڭ ۇشتەن ءبىرى عانا دەنە شىنىقتىرۋمەن اينالىسادى. جالپى، دامىعان قالالاردا سالاماتتى ءومىر سالتىنىڭ ينفراقۇرىلىمى دەگەن ۇعىم بار. الماتىنىڭ بارلىق اۋداندارىندا وسىنداي ينفراقۇرىلىم سالىنۋى كەرەك. قازىر قالاداعى سپورت نىساندارى نەگىزىنەن ورتالىقتا ورنالاسقان. شەتتەگى اۋدانداردا مۇلدەم جەتىسپەيدى. سوندىقتان، اكىمدىككە جىل سايىن كەمىندە 3 دەنەشىنىقتىرۋ- ساۋىقتىرۋ كەشەنىن سالۋدى تاپسىرامىن»، - دەدى پرەزيدەنت.
سونداي-اق، الماتىدا 29 مىڭنان استام وقۋشىعا ورىن جەتپەيدى. بۇل تۋرالى مەملەكەت باسشىسى قاسىم-جومارت توقايەۆتىڭ الماتى قالاسى جۇرتشىلىعىمەن كەزدەسۋىندە ايتتى.
«الماتى تۇرعىندارىنىڭ سانى جىل سايىن ءوسىپ جاتىر. سونىڭ 60 پايىزى كوشى-قون ارقىلى جۇزەگە اسادى. بۇل جاعداي قالانىڭ الەۋمەتتىك ينفراقۇرىلىمىنا ەلەۋلى اسەر ەتەدى. قازىر قالاداعى بالاباقشالاردا 19 مىڭنان استام ورىن جەتپەيدى. بۇل تاپشىلىقتى ازايتۋ ءۇشىن مەملەكەتتىك جانە جەكە مەنشىك بالاباقشالاردى شۇعىل تۇردە سالۋ كەرەك. سونداي-اق بالالاردى مەملەكەتتىك ءبىلىم تاپسىرىسى ارقىلى مەكتەپكە دەيىنگى جەكە ءبىلىم بەرۋ مەكەمەلەرىنە ورنالاستىرۋ قاجەت. اكىمدىككە ۇشتەن التى جاسقا دەيىنگى بالالاردىڭ 97 پايىزىن مەكتەپكە دەيىنگى بىلىممەن قامتۋدى تاپسىرامىن. بۇل مىندەتتى 2025 -جىلعا دەيىن ورىنداۋ كەرەك. وقۋشىلاردىڭ سانى جىل سايىن ورتا ەسەپپەن 12-15 مىڭعا ارتىپ كەلەدى. سول سەبەپتى، مەكتەپتەردە ورىن تاپشىلىعى جوعارى. قازىر 29 مىڭنان استام وقۋشىعا ورىن جەتپەيدى. بۇل احۋال وقۋشىلاردىڭ ساپالى ءبىلىم الۋىنا كەرى اسەر ەتەدى. الماتىدا الداعى ەكى جىل ىشىندە «جايلى مەكتەپ» جوباسىمەن 37 مىڭ ورىندىق 22 مەكتەپ سالۋ كەرەك. باستى مىندەت - 2030 -جىلعا قاراي ءبىر اۋىسىممەن وقىتۋعا تولىق كوشۋ. ىشكى ميگراتسيا قارقىندى دامىپ جاتقاندىقتان، وسىنداي ماسەلەلەر تۋىنداپ وتىر. الايدا، جاس ۇرپاقتى ساپالى بالاباقشا، مەكتەپپەن قامتاماسىز ەتۋ - ءبىزدىڭ مىندەتىمىز. سوندىقتان، بۇل تاپسىرمالار مىندەتتى تۇردە تولىق ورىندالۋى كەرەك»، - دەدى مەملەكەت باسشىسى.
