الماتى قالاسىندا پاتەردىڭ باعاسى تىم جوعارى - مەملەكەت باسشىسى
«الماتى تۇرعىندارىنىڭ كوپشىلىگى، اسىرەسە، جاستار ءۇشىن باسپانا - ەڭ وزەكتى ماسەلە. قالادا پاتەردىڭ باعاسى تىم جوعارى. ارينە، ەڭبەك جولىن ەندى عانا باستاعان جاستار بىردەن پاتەر ساتىپ الا المايتىنى تۇسىنىكتى. ءبىراق، سولاي ەكەن دەپ ەش قارەكەتسىز قول قۋسىرىپ وتىرۋعا بولمايدى. جاستاردىڭ باسپانا الۋىنا جان- جاقتى جاعداي جاساۋ كەرەك. بۇل - مەملەكەتتىڭ باستى مىندەتىنىڭ ءبىرى. اكىمدىك جالعا بەرىلەتىن تۇرعىن-ءۇي سالۋ ءۇشىن ينۆەستورلارعا تارتىمدى بولاتىن ءتيىمدى تاسىلدەر ويلاستىرۋعا ءتيىس. ءبىراق جالدامالى ۇيلەر تىم قىمباتقا تۇسپەۋى كەرەك. ونداي پاتەرلەر، ەڭ الدىمەن، قولجەتىمدى بولۋعا ءتيىس. جالپى، الماتى جاستارى ءۇشىن باسپانالى بولۋ قول جەتپەس ارمان بولماۋى كەرەك. باسىندا باسپاناسى بار جاستاردىڭ ەرتەڭگى كۇنگە دەگەن سەنىمى ارتادى. قالادا تۇرعىن-ءۇي تاپشىلىعىن ازايتۋ - اسا ماڭىزدى مىندەت. كەلەسى جىلدان باستاپ تۇرعىن- ءۇي قۇرىلىسىن جىل سايىن 10 پايىزعا ارتتىرۋ قاجەت. ارينە، الماتىدا بوس جەر از. بۇل جاعداي قۇرىلىستىڭ قارقىنىن كۇشەيتۋگە كەدەرگى كەلتىرۋى مۇمكىن. سول سەبەپتى، جاڭا جەرلەردى يگەرۋ كەرەك. قالادا 1500 گە جۋىق ەسكى ءۇي بار. شاعىن اۋدانداردا تۇرعان مۇنداي ۇيلەرگە كۇردەلى جوندەۋ جۇرگىزگەن ءجون. ال، جاڭعىرتۋعا كەلمەيتىندەرىن ءسۇرىپ تاستاۋ قاجەت. اكىمدىككە وسى شارۋانى كەزەڭ- كەزەڭمەن جۇزەگە اسىرۋ ءۇشىن ناقتى جوسپار ازىرلەۋدى تاپسىرامىن. جاڭعىرتۋ جۇمىستارىنىڭ تۇرعىندارعا قولايسىزدىق تۋدىرماۋىن ويلاستىرۋ كەرەك»، - دەدى پرەزيدەنت.
سونداي-اق، الماتىنىڭ 30 مىڭعا جۋىق تۇرعىنى سۋدى تاسىپ ىشەدى. بۇل تۋرالى ق ر پرەزيدەنتى قاسىم-جومارت توقايەۆ قالا جۇرتشىلىعىمەن كەزدەسۋدە ايتتى.
«تۇرعىن-ءۇي كوممۋنالدىق شارۋاشىلىعىنا باسا ءمان بەرۋ قاجەت. ءبىرقاتار اۋداندا ورتالىقتان بەرىلەتىن سۋ جوق. الماتىنىڭ 30 مىڭعا جۋىق تۇرعىنى سۋدى تاسىپ ىشەدى. اكىمدىككە 3 جىلدىڭ ىشىندە بارلىق تۇرعىندارعا ورتالىقتان سۋ بەرۋدى تاپسىرامىن.
الداعى 2 جىلدا قارعالى، اقساي وزەندەرىنەن سۋ الاتىن 2 ءىرى قۇرىلعىنى ىسكە قوسۋ كەرەك. ناۋرىزباي جانە الاتاۋ اۋداندارىندا سۋ جينايتىن جاڭا ورتالىقتار سالۋ قاجەت. بۇل شارالاردىڭ ارقاسىندا 150 مىڭ ادامعا سۋ بەرىلەدى. ەرمەنساي جانە بارلىق وزەندەرىنەن سۋ تارتۋ جۇيەسىن دە ىسكە قوسۋ ماڭىزدى»، - دەدى مەملەكەت باسشىسى.
ق. توقايەۆ اتاپ وتكەندەي، ازاماتتاردىڭ ءومىر ساپاسى سۋعا تىكەلەي بايلانىستى.
«سۋ - تىرشىلىك كوزى. تۇرعىنداردىڭ ءومىر ساپاسى تىكەلەي سۋعا بايلانىستى. سوندىقتان، سۋمەن قامتاماسىز ەتەتىن جاڭا جەلى سالۋ، ەسكىلەرىن جاڭعىرتۋ جۇمىسىن باستى نازاردا ۇستاۋ كەرەك. مەن الماتىنىڭ تاريحي ورتالىعىندا كوممۋنالدىق ينفراقۇرىلىمنىڭ توزىپ بارا جاتقانىن ايتتىم. اكىمدىك ونداعى ەسكىرگەن جەلىنى ۋاقتىلى جاڭعىرتىپ وتىرۋى كەرەك. مىسالى، «تاريفتى ينۆەستيتسياعا ايىرباستاۋ» باعدارلاماسى بار، سونى ءتيىمدى پايدالانعان ءجون. بارشاڭىزعا بەلگىلى، قالا حالقىنىڭ سانى كۇن وتكەن سايىن ءوسىپ كەلەدى. سوندىقتان، تۇرعىن-ءۇي قۇرىلىسىنا ايرىقشا ءمان بەرىلەدى»، - دەدى ق ر پرەزيدەنتى.
