بالقاش اۋەجايى ەلىمىزدەگى اۋەجايلاردى دامىتۋ باعدارلاماسىنا ەنگىزىلەدى
«مەملەكەت باسشىسى قاسىم-جومارت توقايەۆ قاراعاندى وبلىسىنا جۇمىس ساپارى بارىسىندا ەلىمىزدىڭ اۋەجايلارىن دامىتۋ باعدارلاماسىنا بالقاش قالاسىنىڭ اۋەجايىن قوسۋدى تاپسىردى.
وسى رەتتە يندۋستريا جانە ينفراقۇرىلىمدىق دامۋ مينيسترلىگى بالقاش اۋەجايىن دامىتۋ جونىندەگى جوبانىڭ 2023-2024-جىلدارعا ارنالعان «قۋاتتى وڭىرلەر - ەل دامۋىنىڭ درايۆەرى» ۇلتتىق جوباسىنا ەنگىزۋدى قولدايدى.
سونداي-اق پرەزيدەنتتىڭ تاپسىرماسىنا سايكەس 2022-جىلدىڭ مامىر ايىنان باستاپ قازان ايىنا دەيىن بالقاش قالاسىنا اپتاسىنا 14 رەيس جيىلىگىمەن استانا مەن الماتىدان كەلەتىن اۋە مارشرۋتتارى سۋبسيديالانادى. وسىلايشا، جازعى كەزەڭدە اۋە رەيستەرىن «يۋجنوە نەبو» كومپانياسى ىسكە اسىرعانىن ايتا كەتكەن ءجون»، - دەلىنگەن حابارلامادا.
ماۋسىمدىق جانە تۋريستىك اعىمدى ەسكەرە كەلە، جاڭا اۋە جانە تەمىرجول باعىتتارىنىڭ اشىلۋى تۋرالى ايتاتىن بولساق، ازاماتتىق اۆياتسيا كوميتەتى قاراعاندى وبلىسىنىڭ اكىمدىگىمەن بىرلەسىپ، ءوڭىردى دامىتۋدىڭ كەشەندى جوسپارى اياسىندا جاڭا اۋە مارشرۋتتارىنىڭ اشىلۋىن قاراستىرىپ جاتىر. مىسالى، 2024-جىلدان باستاپ شىمكەنت، تۇركىستان جانە جەزقازعان قالالارىنان بالقاش قالاسىنا دەيىن مارشرۋتتار اشۋ كوزدەلىپ وتىر. سونىمەن بىرگە استانا مەن الماتىدان ورىندالاتىن رەيستەر سۋبسيديالانادى.
مەملەكەت باسشىسىنىڭ «جاس وتباسىلارعا ارنالعان يپوتەكا» جەڭىلدەتىلگەن باعدارلاماسىن قارجىلاندىرۋدى ۇلعايتۋعا قاتىستى تاپسىرماسىنا كەلسەك، قازىر جۇمىس ىستەپ جۇرگەن جاستارعا ارنالعان وڭىرلىك باعدارلامالار قابىلدانىپ جاتىر.
«ونىڭ ىشىندە، جاس وتباسىلارعا ارنالعان باعدارلامالار دا بار. ماسەلەن، قاراعاندى وبلىسىندا «قاراعاندى جاستارى» وڭىرلىك باعدارلاماسى ىسكە قوسىلىپ، ونى جۇزەگە اسىرۋعا بيىل شامامەن 1,5 ميلليارد تەڭگە ءبولىندى. اتالعان قاراجاتقا 75 وتباسى تۇرعىن ۇيمەن قامتاماسىز ەتىلەدى»، - دەپ جازادى باسپا ءسوز قىزمەتى.
