جاپونداردىڭ شاش سۇلۋلىعىنىڭ قۇپياسى

تاماقتانۋ

ازيالىقتاردىڭ كۇندەلىكتى راتسيونىنىڭ نەگىزىن تەڭىز ونىمدەرى قۇرايتىنىن بىلەمىز. تەڭىز ونىمدەرى شاش قۇرىلىمىنىڭ قۇرىلىس ماتەريالىنا قاجەت پايدالى اقۋىزدارعا باي. كۇندەلىكتى راتسيوننىڭ تاعى ءبىر ماڭىزدى ينگرەديەنتى — بالىق. ول مايلى قىشقىلدارعا باي. ولار شاشتىڭ ليپيدتى قاباتىن رەتتەۋگە جاۋاپ بەرەدى جانە باس تەرىسى تىتىركەنۋىن جانە قابىنۋىن باسادى. سونىڭ ارقاسىندا شاشتىڭ ءوسۋى جاقسارىپ، ونىڭ ءتۇسۋى ازايادى.

جاپون ايەلدەرىنىڭ راتسيونىن سويا، بالدىرلار، كوكونىستەردەگى جاسۇنىقتار، جەمىستەر جانە كوك شايداعى انتيوكسيدانتتار تولىقتىرادى. مۇنىڭ بارلىعى بىرگە شاشتى ىشتەن قورەكتەندىرەدى. بۇل وعان قوسىمشا كۇش سىيلايدى جانە قۇرىلىمىن قاتايتادى. سونداي-اق جاپونيادا كوللاگەن تۇرىندەگى اسپازدىق قوسىمشالار دا كەڭ تاراعان.

كوسمەتيكا

جاپونيادا مەديتسينا دا، كوسمەتولوگيا دا جوعارعى دەڭگەيدە دامىعان. جاپونيادا بارلىق دەرلىك ماركا تابيعي قۇراممەن جانە سۋلفاتتاردىڭ بولماۋىمەن ماقتانا الادى. قۇرامىندا سۋلفاتى جوق سۋسابىن قولدانىپ كورگەندەر ونىڭ دۇرىس كوپىرمەيتىنىن بىلەدى. بۇل جاعدايدان شىعۋ ءۇشىن جاپوندىقتان ماسساجدىق رەزەڭكە شەتكا پايدالانادى. ول سۋسابىندى كوپىرتۋگە جانە باس تەرىسى قاناينالىمىن جاقسارتۋعا كومەكتەسەدى.

سونداي-اق شاشقا ارنالعان كوپشىلىك جاپون كوسمەتيكاسىنىڭ قۇرامىندا سكۆالان — جانۋار مايى بار. سكۆالانى بار بالزامدار مەن ماسكالار ليپيدتەر جەتىسپەۋ كەزىندە پايدالى. ازيالىق كوسمەتيكانىڭ تاعى ءبىر پايدالى ينگرەديەنتى — ارگان مايى. ول زاقىمدالعان شاش قۇرىلىمىن قالپىنا كەلتىرەدى. ارگان مايى قۇرعاق، سىنعىش، تەرميالىق اسەرگە ءجيى شالدىعاتىن جانە بويالعان شاشتارعا پايدالى.

ءداستۇر

جاپوندىقتار ءداستۇردى جاقسى ساقتايدى. ولاردىڭ سۇلۋلىق سىرلارىنا دا قاتىستى ۇستاناتىن داستۇرلەرى بار. مىسالى، كامەليا گۇلىنىڭ مايىمەن شاشقا كۇتىم جاساۋ. ونىڭ قۇرامىندا شاش قۇرىلىمىنا ءسىڭىپ كەتەتىن اقۋىزدار مەن ولەين قىشقىلى بار. ول شاش قۇرىلىمىن تەگىستەپ، وعان كولەم بەرەدى. مىنا لايفحاكتى قولدانىپ كورىڭىز: 1 شاي قاسىق كامەليا گۇلى مايىن قىزدىرىپ، باس تەرىسىنە تيگىزبەي، شاشتىڭ بارلىق ۇزىندىعىنا جاعىپ شىعىڭىز. 20-25 مينۋتتان سوڭ سۋسابىنمەن جۋىپ تاستاڭىز. سونداي-اق شارشاعان جانە قۇرعاق شاشتى ەمدەۋ ءۇشىن ازيالىقتار ءبورىتاراق (گيبيسكۋس)، كوك شاي جانە سىركە سۋىنان تۇنبا دايىندايدى. مۇنداي تۇنبا مايلىلىق پەن زات الماسۋ پروتسەستەرىن رەتتەيدى، شاشتى بەلسەندى ىلعالداندىرادى.

دۇرىس ۇيقى

شاشتىڭ سىرتقى كەلبەتى كۇتىمدى ءارى ساۋ بولۋى ءۇشىن 7-8 ساعات ۇيقى كەرەك. وعان قوسا، جاپوندار جاستىققا جىبەكتەن تىگىلگەن قاپ پايدالانادى. سول كەزدە شاش زاقىمدالمايدى جانە ۇيىسپايدى. سونداي-اق ولار جاستىققا حوش ءيىستى شوپتەر سالادى. مىسالى: لاۆاندا جانە جالبىز. ولار ۇيقىعا تەرەڭ باتۋعا جانە تولىققاندى دەمالۋعا كومەكتەسەدى.

massaget.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى