تۇركيا ا ق ش-تىڭ كوڭىل ايتۋىن قابىلدامادى
ونىڭ ايتۋىنشا، ا ق ش سيريانىڭ كوباني ايماعىندا ورنالاسقان لاڭكەستىك ۇيىمعا قولداۋ جاساپ وتىر. ازىرگە ەشبىر توپ جاۋاپكەرشىلىكتى ءوز موينىنا الماعان.
يستيكليال داڭعىلىنداعى جارىلىستان 6 كىسى وپات بولىپ، 80 نەن استام ادام زارداپ شەكتى. اۋىر جارالانعاندار دارىگەرلەردىڭ ءجىتى باقىلاۋىندا. تۇرىك بيلىگى وقيعانى تەراكت دەپ اتادى. جەرگىلىكتى ارنالاردىڭ حابارلاۋىنشا ۇستالعان كۇدىكتىنىڭ اتى- ءجونى احلام الباسحير. ول وسى تەراكتىنى جاساۋ ءۇشىن سيريادان تۇركياعا 4 اي بۇرىن كەلگەن ەكەن. پوليتسيا تەرگەۋ بارىسىندا تاعى 46 كۇدىكتىنى قۇرىقتادى.
سۇلەيمان سويلۋ، تۇركيا ىشكى ىستەر ءمينيسترى:
- وپەراتسيالار جالعاسۋدا. لاڭكەستەر قولعا ءتۇستى. ەگەر ۇستالماعاندا بۇگىن گرەكياعا قاشۋدى جوسپارلاپتى. بۇل وقيعاعا بىزدەن قارىمتا جاۋاپ بولادى.
وقىس وقيعا بولعان جەرگە قالا تۇرعىندارى مەن قوناقتارى گۇل شوقتارىن قويىپ، جارىلىستا قازا تاپقانداردى ەسكە الدى. راسىمگە كەلگەن ىشكى ىستەر ءمينيسترى، اق ءۇيدىڭ جاعدايعا بايلانىستى ايتقان كوڭىل ايتۋىن قابىلدامايتىنىن جەتكىزدى.
سۇلەيمان سويلۋ، تۇركيا ىشكى ىستەر ءمينيسترى:
- ا ق ش ەلشىلىگىنىڭ كوڭىل ايتۋىن قابىلدامايمىز. ولار كوباني لاڭكەستىك ايماعىنا قولداۋ كورسەتىپ وتىر. تۇركيانىڭ تىنىشتىعىن بۇزۋعا باعىتتالعان ۇيىمعا قاراجات جولداعان مەملەكەتپەن وداقتاستىعىمىزدى قايتا قاراستىرۋ قاجەت.
شابۋىل كەزىندە ءۇش وتباسىنىڭ ەكى مۇشەسىنەن تۇراتىن التى تۇرىك ازاماتى قازا تاپتى. جاۋاپكەرشىلىكتى ەشبىر توپ ءوز موينىنا العان جوق.
تەراكتىدە قازا تاپقاندار اراسىندا قازاقستاندىقتار جوق. وقىس وقيعادان كەيىن باس كونسۋلدىقتا جەدەل جەلى جۇمىس ىستەپ، جەرگىلىكتى بيلىكپەن تىعىز بايلانىستا بولدى. ىستامبۇلداعى باس كونسۋل ءالىم بايەلدىڭ ايتۋىنشا، ازاماتتار ادامدار كوپ شوعىرلاناتىن جەرلەرگە بارماعان ءجون.
ءالىم بايەل، قازاقستاننىڭ ىستامبۇلداعى باس كونسۋلى:
- كەشە بولعان وقيعادان كەيىن ىستامبۇلدىڭ گۋبەرناتورى مەن تۇرىكتىڭ بيلىك ورگاندارىمەن ۇنەمى بايلانىستا بولدىق. ديپلوماتتارىمىز ءتيىستى اۋرۋحانالاردى تۇندە ارالاپ شىقتى. قازىرگى تاڭدا زارداپ شەككەندەر اراسىندا قازاقستان ازاماتتارىنىڭ جوق ەكەنىن ايتا الامىز. سونىمەن بىرگە جالپى ازاماتتارىمىزدان شەتەلدە جۇرگەندە بارىنشا ساق بولۋدى سۇرايمىز.
«كۇردىستان جۇمىسشى پارتياسى» تۇرىك مەملەكەتىنە قارسى 1984 -جىلدان بەرى كوتەرىلىس جاساپ كەلەدى. سالدارىنان 40 مىڭنان استام ادام اجال قۇشتى. ونىڭ باسىم كوپشىلىگى كۇرتتەردىڭ تەررورلىق ۇيىمىنىڭ سودىرلارى. توپتى تۇركيا، ەۋروپالىق وداق جانە ا ق ش تەررورلىق ۇيىم تىزىمىنە ەنگىزگەن. رەسمي انكارا سيرياداعى YPG-دىڭ «كۇردىستان جۇمىسشى پارتياسى» سەپاراتيستىك ۇيىمىنىڭ قاناتى ەكەنىن ايتادى.
24.kz
