بوكس الەمى جانىبەك ءالىمحان ۇلىنىڭ جەڭىسى تۋرالى نە دەپ جاتىر؟

ول لاس-ۆەگاستا ۇلى بريتانيالىق دەنزەل بەنتليدى تورەشىلەر شەشىمىمەن جەڭدى. قازاقستاندىق بوكسشى العاش رەت 12 راۋند بويى جۇدىرىقتاستى.

Massaget.kz ءتىلشىسى بوكس ساراپشىلارىنىڭ جەكپە-جەك تۋرالى پىكىرىن جينادى.

«تيتۋلىن پوشتامەن الدى»

ەكى سالماق دارەجەسىندە بۇرىنعى چەمپيون، قازىر كوممەنتاتور تيموتي برەدليدىڭ پىكىرىنشە، چەمپيوندار جانىبەكپەن قازىر كەزدەسىپ تاستاماسا، بولاشاقتا قازاقستاندىق بوكسشى مىقتىراق بولا تۇسەدى.

«جانىبەك چەمپيون، ءبىراق بەلبەۋ وعان تابىستالدى. تيتۋل ءۇشىن جۇدىرىقتاسپادى. تەك چەمپيون اتاعىنا كوتەرە سالدى. تيتۋلىن پوشتامەن الدى.

بارلىق چەمپيون مەن ۇمىتكەر ونىمەن جەكپە-جەك وتكىزۋى كەرەك. ونى بۇرىن جەڭىپ تاستاۋى كەرەك ەدى، ويتكەنى ول ەندى مىقتىراق بولا تۇسەدى. ول ۇلكەن جەكپە-جەكتەردى قالايدى. (...) بۇل بوكسشىعا جاي قاراي سالۋعا بولمايدى. جانىبەك ديۆيزيونداعى قاۋىپتى بوكسشى دەپ سانايمىن. ونىڭ ماشىعى كەرەمەت، سوققىسى مىعىم. بۇگىن سونى كورسەتكەن جوق، ءبىراق سىزدەرگە ايتايىن: تەمىردى تەمىر ۇشتايدى. ول بۇگىنگى كەزدەسۋدەن سوڭ مىقتى بولا تۇسەدى، قارسىلاسى مىقتى بولسا، ونىڭ دا بوكسى جاقسارادى»، - دەدى تيموتي برەدلي.

«بەنتليگە توتەپ بەرە المادى»

Las Vegas Review-Journal باسىلىمىنىڭ شولۋشىسى سەم گوردون بۇل جەكپە-جەكتە بەنتليدىڭ ستيلىن ماقتادى.

«ءالىمحان ۇلى ءوز ىرعاعىن تاپقان بەنتليگە توتەپ بەرە المادى. جاقىن وتكەن راۋند كوپ بولدى. ءالىمحان ۇلىنىڭ كۇش-قۋاتى بەنتليگە قيىندىق تۋدىرمادى. بەنتلي جارادى، جەكپە-جەكتى باياۋ باستاعانىمەن، كەيىن سابىرعا كەلىپ، ءالىمحان ۇلىنىڭ كورپۋسىنان ءجيى سوققى جاساپ، ىرعاعىن بۇزدى. ءالىمحان ۇلىنىڭ جەكپە-جەكتى ەرتە اياقتاۋعا مۇمكىندىگى بار دەپ ويلادىم. ونىڭ ورنىنا ول كارەراسىندا العاش رەت ون ەكى راۋند جۇدىرىقتاستى»، - دەپ جازدى گوردون Twitter- دە.

«چەمپيوندارعا شىنىمەن دايىن با؟»

The Ring جۋرناليسى دۋگلاس فيشەر بولسا، جانىبەك ءالىمحان ۇلىنىڭ كەز كەلگەن چەمپيونمەن شىعۋعا دايىنمىن دەگەن مالىمدەمەسىنە كۇماندانا باستاعان.

«جەكپە-جەكتەن كەيىن ءالىمحان ۇلى «مەن كەز كەلگەن چەمپيونمەن، كەز كەلگەن جەكپە-جەككە دايىنمىن» دەدى. ول شىنىمەن دايىن با؟ ول The Ring رەيتينگىندە ودان وزىپ تۇرعان ورتا سالماقتاعى بوكسشىلارمەن (گەننادي گولوۆكين، دجەرمالل چارلو، دەمەتريۋس اندرادە جانە حايمە مۋنگۋيا) نەمەسە ءتىپتى كىشى كريس يۋبەنك جانە كارلوس ادامەس سياقتى رەيتينگى تومەن قارسىلاستارمەن جەكپە-جەك وتكىزۋگە دايىن با؟»، - دەپ سۇراق قويدى فيشەر.

«جانىبەكتىڭ قورعانىسى كۇماندى»

بوكس تۋرالى پودكاستارىمەن تانىمال مالاچي ۋيليامس باسقا دا چەمپيوندارعا جانىبەك الىمحان ۇلىمەن ءدال قازىر جۇدىرىقتاسۋعا كەڭەس بەردى.

«دجەرمالل چارلو مەن حايمە مۋنگۋيانىڭ ورنىندا بولسام، جانىبەك ساۋىعىپ كەتپەي تۇرىپ، ءدال قازىر جەكپە-جەككە شىعۋ ءۇشىن بارىمدى سالار ەدىم. يەگىڭىز مىقتى بولسا، ونى جەڭۋگە بولادى. جانىبەكتىڭ شابۋىلىن بولجاۋعا بولادى. ال ونىڭ قورعانىسى كۇماندى»، - دەدى ول.

«بەنتلي تاۋەكەلگە باردى»

جانىبەك ءالىمحان ۇلىنىڭ باپكەرى دجەيمس «باددي» ماكگيرت قازاقستاندىق بوكسشى ديۆيزيون كوشباسشىلارىمەن جۇدىرىقتاسۋعا دايىن ەكەنىن ايتتى.

«تىڭداڭىزدارشى، ول ءالى الەم چەمپيونى، مەن ونى ءالى كۇنگە دەيىن ورتا سالماقتاعى ەڭ ۇزدىك بوكسشى دەپ سانايمىن. بەنتلي جەكپە-جەككە جاقسى دايىندىقپەن شىقتى. جانىبەككە جەكپە-جەك الدىندا بەنتليگە جوعالتاتىن ەشتەڭە جوق، ول تاۋەكەلگە بارادى دەدىم. ءالىمحان ۇلى ءوز تيتۋلىن قورعاپ قالۋ ءۇشىن قاجەت نارسەنى ىستەدى»، - دەپ كەلتىردى The Ring «بادديدىڭ» ءسوزىن.

بوكسشىلار نە دەيدى؟

دەنزەل بەنتلي تيتۋلدى ايقاستا جانىبەك ءالىمحان ۇلىنان جەڭىلگەننەن كەيىن مالىمدەمە جاسادى.

«سايتان العىر! نە ايتا الامىن؟! مەن ول جەرگە شىعىپ، بار كۇشىمدى سالىپ ايقاستىم جانە جەڭىسكە جاقىن بولدىم... مەن چەمپيون بولماقپىن، سوندىقتان بۇل مەن ءۇشىن اسا جاقسى ەمەس. سپورتزالعا ورالىپ، مەن ءوزىمدى كۇشەيتەمىن جانە ارمانىمدى جۇزەگە اسىرامىن. وسى كەزەڭدە كورسەتكەن بارلىق قولداۋ ءۇشىن العىس ايتامىن. وتباسىم مەن كومانداما دا قولداۋ ءۇشىن العىس بىلدىرەمىن. مەن چەمپيون بولامىن!»، - دەپ جازىپتى بەنتلي Instagram جەلىسىندە.

ال ءالىمحان ۇلى بۇل ايقاسقا دەيىن قارسىلاسىن نوكاۋتقا تۇسىرۋگە ۋادە بەرگەن ەدى. قازاقستاندىق بوكسشى جەكپە-جەكتەن كەيىن وسىعان بايلانىستى جاۋابىن بەردى.

«الدىمەن جانكۇيەرلەردىڭ بارىنە العىس ايتقىم كەلەدى. بۇل بوكس. مۇنداي ايقاستارعا بوكسشىلار 100 پايىز دايىندالىپ شىعادى. بۇل مەنىڭ ءبىرىنشى 12 راۋندىم. الدا جاقسىلاپ دايىندالىپ، بۇدان دا جاقسى ونەر كورسەتەمىز»، - دەدى جانىبەك رينگتە تۇرىپ.

سونىمەن قاتار، «قازاق ستيلى» كەلەسى كەزدەسۋىن كەز كەلگەن چەمپيونعا قارسى وتكىزۋگە دايىن ەكەنىن اتاپ ءوتتى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى