الاياقتاردىڭ قوڭىراۋى ءۇشىن بايلانىس وپەراتورلارىنا جاۋاپكەرشىلىك كۇشەيتىلەدى
بۇل تۋرالى ق ر ىشكى ىستەر مينيسترلىگى كيبەرقىلمىسقا قارسى كۇرەس ورتالىعى باستىعىنىڭ ورىنباسارى رۇستەم دۇيسەتايەۆ ايتتى، دەپ حابارلايدى قازاقپارات ءتىلشىسى.
«جىل باسىنان بەرى ىشكى ىستەر مينيسترلىگى سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنىڭ، بايلانىس وپەراتورلارىنىڭ وكىلدەرى قاتىسۋىمەن بىرنەشە كەڭەس وتكىزدى. قازىر ۇيالى بايلانىس وپەراتورلارلارى اۋىستىرىلعان نومىرلەرمەن شالىناتىن قوڭىراۋلارعا توسقاۋىل قويۋ ماسەلەسىمەن اينالىسىپ جاتىر. بۇل ماسەلە جىلدىڭ سوڭىنا دەيىن شەشىلەدى»، - دەدى رۇستەم دۇيسەتايەۆ ءى ءى م باسپا ءسوز الاڭىندا وتكەن بريفينگتە.
ونىڭ تۇسىندىرۋىنشە، اۋىستىرۋ بايلانىس وپەراتورلارىنىڭ كەز كەلگەن نومىرلەرىنە جاسالۋى مۇمكىن.
«وكىلەتتى ورگاندارمەن بىرگە پلاستيك كارتالاردى بەرگەنى ءۇشىن جاۋاپكەرشىلىك ەنگىزۋ ماسەلەسىن قاراستىرىپ جاتىر. سونىمەن قاتار سانكتسيالانباعان ترافيكتى جىبەرگەنى ءۇشىن بايلانىس وپەراتورلارىنىڭ جاۋاپكەرشىلىگىن قاتاڭداتۋ ماسەلەسى دە قاراستىرىلۋدا»، - دەدى ءى ءى م وكىلى.
اۆتور
مارلان جيەمباي
