رەسەي قازاقستانعا امۋر جولبارىستارىن تەگىن بەرەدى
بۇل تۋرالى ق ر ەكولوگيا، گەولوگيا جانە تابيعي رەسۋرستار ءمينيسترى سەرىكقالي برەكەشيەۆ ايتتى، دەپ حابارلايدى قازاقپارات ءتىلشىسى.
«تۇران جولبارىسى بويىنشا جۇمىستار جالعاسىپ جاتىر. «ىلە-بالقاش» قورىعى دايىندالدى. ءبىز بۇل قورىقتىڭ 415 مىڭ گەكتاردان استام اۋماعىن بەلگىلەدىك. جولبارىستارعا قاتىستى ايتاتىن بولساق، قىركۇيەك ايىندا رەسەي فەدەراتسياسىندا وتكەن ەكونوميكالىق فورۋمىندا ر ف- ءتىڭ تابيعات مينيسترلىگىمەن ارادا مەموراندۋمعا قول قويىلدى. قازىرگى ۋاقىتتا ءتيىستى جول كارتاسى ازىرلەنىپ جاتىر. وعان سايكەس ءبىز عىلىمي زەرتتەۋلەردەن باسقا، 2025-جىلى امۋر جولبارىسىنىڭ ءبىرىنشى پارتياسىن ەلىمىزگە اكەلۋدى جوسپارلاپ وتىرمىز»، - دەدى س. برەكەشيەۆ ماجىلىستەگى ۇكىمەت ساعاتىنان كەيىن تىلشىلەر ساۋالىنا جاۋاپ بەرە وتىرىپ.
وسى ورايدا ول قازاقستانعا ءۇش جولبارىس جەتكىزىلەتىنىن ايتتى. بۇل تۇرعىدا ول اتالعان قورىق اۋماعىندا قابان مەن ەلىك سانىن كوبەيتۋ، بۇقار بۇعىلارىنىڭ پوپۋلياتسياسىن قالپىنا كەلتىرۋ جۇمىستارى ءجۇرىپ جاتىر.
«جولبارىستاردى رەسەي جاعى تەگىن بەرەدى، سوندىقتان بۇل تۇرعىدا تولەم تۋرالى ماسەلە جوق. امۋر جانە تۇران جولبارىستارىنا توقتالساق، عالىمدارىمىز د ن ق بويىنشا بۇل جولبارىستار ءوزارا جاقىن ەكەنىن دالەلدەدى. سوندىقتان امۋر جولبارىستارىن ىلە-بالقاش قورىعىنىڭ اۋماعىنا قايتا جەرسىندىرۋ تۋرالى شەشىم قابىلداندى»، - دەدى مينيستر.
ايتا كەتەيىك، 2010-جىلى قازاقستان حالىقارالىق جولبارىس سامميتىندە ورتالىق ازياعا تۇران جولبارىستارىن قايتارۋعا دايىن ەكەنىن مالىمدەگەن.
ال 2017-جىلى قازاقستان مەن بۇكىلالەمدىك جابايى تابيعات قورى (WWF) وڭتۇستىك بالقاش ماڭى مەن ىلەنىڭ دەلتا اۋدانىندا جولبارىستىڭ رەينسترودۋكتسياسى باعدارلاماسىن جۇزەگە اسىرۋ تۋرالى مەموراندۋمعا قول قويىلدى.
