انا مەن بالانى قورعاۋ تۇجىرىمداماسى ازىرلەنىپ جاتىر
بۇل جايىندا سەنات دەپۋتاتتارىنىڭ ساۋالىنا ق ر پرەمەر-ءمينيسترى ءاليحان سمايىلوۆتىڭ جاۋابىندا ايتىلعان، دەپ حابارلايدى قازاقپارات ءتىلشىسى.
بالالارى بار وتباسىلاردىڭ زاڭدى مۇددەلەرىن قورعاۋ، بالالاردى قوسا العاندا بارلىق قازاقستاندىق ءۇشىن ءومىر ساپاسىنىڭ جوعارى ستاندارتىنا قول جەتكىزۋ مەملەكەتتىك ساياساتتىڭ نەگىزگى باعىتتارىنىڭ ءبىرى سانالادى. ول 2050-جىلعا دەيىنگى قازاقستاننىڭ دامۋ ستراتەگياسىندا، 2025-جىلعا دەيىنگى قازاقستاننىڭ ۇلتتىق دامۋ جوسپارىندا، 2030-جىلعا دەيىنگى قازاقستان رەسپۋبليكاسىنىڭ الەۋمەتتىك دامۋ تۇجىرىمداماسىندا، «دەنى ساۋ ۇلت» ءاربىر ازاماتقا دەنساۋلىق ساقتاۋدىڭ ساپالى ءارى قولجەتىمدىلىگى» ۇلتتىق جوباسىندا كورىنىس تاپقان»، - دەدى ۇكىمەت باسشىسى جاۋابىندا.
ونىڭ اتاپ وتۋىنشە، 2024-جىلدىڭ 1- قاڭتارىنان «ۇلتتىق قور - بالالارعا» جاڭا جوباسىن ىسكە قوسۋ جوسپارلانعان. جوبا اياسىندا بالالاردىڭ ارنالۋى جيناقتاۋشى ەسەشوتىنا ولار 18 جاسقا تولعانعا دەيىن ۇلتتىق قوردىڭ جىل سايىنعى ينۆەستيتسيالىق تابىسىنىڭ 50 پايىزى اۋدارىلىپ وتىرادى.
«مەملەكەت باسشىسىنىڭ تاپسىرماسىن ورىنداۋ ءۇشىن قازاقستان رەسپۋبليكاسىنداعى انا مەن بالانى قورعاۋ تۇجرىمداماسى (2023-جىلى قابىلداۋ جوسپارلانىپ وتىر) ازىرلەنىپ جاتىر. بالالار جىلىن وتكىزۋ اياسىندا 2027-جىلعا دەيىنگى بالالاردىڭ مۇددەسىنە وراي ۇلتتىق جوبا ارىلەۋ ماسەلەسى پىسىقتالۋدا. ول بالانىڭ يگىلىگىنە ارنالعان كەشەندى ءىس-شارالاردى قامتيدى. بۇعان قوسا، بالالاردىڭ امان-ساۋلىعىن مونيتورينگىلەۋ ۇلتتىق جوباسىن قالىپتاستىرۋ جنە بالالاردىڭ يگىلىگىنە باعىتتالعان ۇلتتىق ساياساتتىڭ تيىمدىلىگىن باعالاۋ ماقساتىندا جىل باسىنان بەرى بارلىق وڭىردە بالالاردىڭ امان-ساۋلىعى يندەكسى جۇزەگە اسىرىلىپ جاتىر»، - دەدى ءاليحان سمايىلوۆ.
