باقىتگۇل حامەنوۆانىڭ ىسىنە قاتىستى سوت وتىرىسى قايتا جالعاستى
اتىراۋ قالاسىنداعى 2№ سوتتا باقىتگۇل حامەنوۆانىڭ ىسىنە قاتىستى سوت وتىرىسى ءوتىپ جاتىر.
سوت وتىرىسىندا «مەنىڭ بۇل قىلمىستىق وقيعاعا قاتىسىم بولعان جوق. وسى ءىس بويىنشا زاڭعا سايكەس اقتاۋ ۇكىمى شىعارىلۋى مۇمكىن»، - دەدى باقىتگۇل حامەنوۆا.
وبلىستىق سوتتىڭ باسپا ءسوز قىزمەتىنىڭ مالىمەتىنشە، بيىلعى 26- مامىردا اتىراۋ قالاسىنىڭ 2№ سوتىنا ق ر قىلمىستىق كودەكسى 366-بابىنىڭ 3-بولىگى 2-تارماعىمەن اتىراۋ وبلىسى اكىمىنىڭ ورىنباسارى باقىتگۇل حامەنوۆاعا، اتىراۋ وبلىسى مادەنيەت، تىلدەردى دامىتۋ جانە ارحيۆ ءىسى باسقارماسىنىڭ باسشىسى اقىلبەك رىسقاليەۆكە، ق ر قىلمىستىق كودەسى 367-بابىنىڭ 2-بولىگىمەن «ب» ج ش س ديرەكتورىنا قاتىستى قىلمىستىق ءىس ءتۇستى.
ال، 11- تامىزدا اتىراۋداعى 2№ قالالىق سوتتا باقىتگۇل حامەنوۆاعا قاتىستى سوت وتىرىسى باستالدى. ايىپتاۋ اكتىسى 55 بەتتەن تۇرادى.
العاشقى سوت وتىرىسىندا باقىتگۇل حامەنوۆا وزىنە تاعىلعان ايىپتى مويىندامادى.
ەسكە سالا كەتەلىك، بۇعان دەيىن پروكۋراتۋرا وكىلى باقىتگۇل حامەنوۆانى 7 جىلعا باس بوستاندىعىنان ايىرۋدى ۇسىنعانىن جازعان ەدىك.
سوت وتىرىسىندا پروكۋروراتۋرا وكىلى لاۋرا اسانوۆا وبلىس اكىمىنىڭ بۇرىنعى ورىنباسارى باقىتگۇل حامەنوۆانى 7 جىلعا باس بوستاندىعىنان جانە «قۇرمەت» وردەنىنەن ايىرۋدى ۇسىندى.
«مۇلكى تاركىلەنىپ، مەملەكەتتىك لاۋازىمداردى اتقارۋ قۇقىعىنان ءومىر بويىنا ايىرا وتىرىپ، 7 جىلعا باس بوستاندىعىنان ايىرۋ جازاسى تاعايىندالسىن. مەرزىمدى وتەۋ ورتاشا قاۋىپسىزدىك مەكەمەسىندە انىقتالسىن. سوتتالۋشىنىڭ كامەلەتكە تولماعان بالاسىنىڭ بولۋىنا بايلانىستى جازانى ءۇش جىلعا دەيىن كەيىنگە قالدىرۋدى سۇرايمىن»، - دەدى لاۋرا اسانوۆا.
