ەلىمىزدە كيىم-كەشەك باعاسى ءبىر جىلدا قانشا پايىزعا قىمباتتادى

بۇل تۋرالى قازاقپارات Energyprom.kz رەسۋرسىنا سىلتەمە جاساپ حابارلايدى.

سايتتىڭ ساراپتاماسىنا سەنسەك، رەسپۋبليكا بويىنشا كيىم باعاسى ءبىر جىلدا 14,6 پايىز وسكەن.

«كيىم-كەشەكتىڭ قىمباتتاعانىن بارىنەن بۇرىن استانالىقتار قاتتى سەزىندى: ءبىر جىلدا بىردەن 25 وسكەن. كيىم قىمبات وڭىرلەردىڭ ۇشتىگىنە قىزىلوردا (+19,8 پايىز) جانە اقمولا (+ 19 پايىز) وبلىستارى كىردى. ەڭ باياۋ ءوسىم اقتوبە وبلىسىندا تىركەلگەن - 9,7 پايىز.

بىلتىرعى قازان ايىنان بەرى ەرلەردىڭ كيىمى 14 پايىز، ايەلدەردىڭ كيىمى 14,1 پايىز، بالالار كيىمى 17,2 پايىز قىمباتتاعان»، - دەپ جازىلعان ساراپتامادا.

ال قاڭتار- تامىز ارالىعىندا يمپورتپەن كەلگەن تريكوتاج جانە توقىما ونىمدەرىنىڭ كولەمى 71 مىڭ توننا بولعان. بۇل اقشاعا شاقساق، 888,9 ميلليون دوللار.

«قازاقستانعا ت م د ەلدەرىنەن 16,9 مىڭ توننا ءونىم اكەلىنگەن. بۇل بۇرىنعىدان 2,9 پايىز كەم. نەگىزگى جەتكىزۋشى - وزبەكستان: 10,2 مىڭ توننا.

ت م د قۇرامىنا كىرمەيتىن ەلدەردەن 54,1 مىڭ توننا كيىم اكەلىنگەن. بۇل بىلتىرعىدان 17,8 پايىز ارتىق. نەگىزگى جەتكىزۋشىلەر قىتاي (39,3 مىڭ توننا) مەن تۇركيا (12 مىڭ توننا) بولىپ وتىر.

قاڭتار- قىركۇيەك ارالىعىندا ەلدەگى كيىم ءوندىرىسىنىڭاقشالاي كولەمى 43,1 ميلليارد تەڭگە بولدى. بۇل ءبىر جىل بۇرىنعى كورسەتكىشتەن 12,7 پايىز كوپ.

ەڭ ۇلكەن ءوندىرىس كولەمى شىمكەنتتە تىركەلدى - 7,4 ميلليارد تەڭگە (+44 پايىز) . ودان كەيىن الماتى قالاسىندا 6,9 ميلليارد تەڭگەنىڭ (+15,2 پايىز) جانە الماتى وبلىسىندا 4,2 ميلليارد تەڭگەنىڭ (-48,6 پايىز) كيىم- كەشەگى وندىرىلگەن»، - دەپ جازادى Energyprom.kz.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى