ءسابينا التىنبەكوۆا سپورتقا قايتا ورالدى

كوپشىلىكتى تولعاندىرىپ كەلگەن ماسەلە تۋرالى ايتقىم كەلەدى. ءيا، مەن قايتادان قاتاردامىن. جاڭالىقتان قۇلاعدار بولىڭىزدار، - دەپ جازدى ول Instagram جەلىسىندەگى ستوريستە.

ءسابينا التىنبەكوۆا تايۆاننىڭ استاناسى تايبەي قالاسىندا ۆولەيبولدان ايەلدەر اراسىندا وتكەن XVII ازيا چەمپيوناتىندا ەڭ سۇلۋ سپورتشى اتانعاننان كەيىن جەر جۇزىنە كەڭىنەن تانىلدى. سول كەزدە بويى 182 سانتيمەتر، سالماعى 59 كەلى، اياقتارىنىڭ ۇزىندىعى 124 سانتيمەتر قازاق قىزى تۋرالى تايۆان، جاپونيا مەن باسقا دا كوپتەگەن ەلدەردىڭ تەلەارنالارى رەپورتاجدار تۇسىرگەن بولاتىن. ال ينتەرنەتتە كوپتەگەن روليكتەر پايدا بولدى. ازيالىق جانكۇيەرلەر ءسابينانىڭ كەلبەتى جاپوندىق انيمە كەيىپكەرلەرىنە ۇقسايدى دەپ جارناما جاسادى. ينتەرنەتتە ءسابينا التىنبەكوۆانىڭ كوپتەگەن اۋەسقوي، ونىڭ ىشىندە «موە» ستيلىندە سۋرەتتەرى پايدا بولدى. سودان بەرى ۆولەيبولشىنىڭ ەسىمى جەر جۇزىنە تاراپ، تانىمالدىلىعى ارتتى.

ءسابينا 1996-جىلى اقتوبە قالاسىندا تۋعان. بەس جاستان باستاپ بيمەن اينالىسقان. ال ۆولەيبولمەن 14 جاسىنان بەرى اينالىسىپ كەلەدى. ول العاش رەت الاڭعا «كازحروم» كلۋبىنىڭ جەيدەسىن كيىپ شىقتى. سول كەزدە جاس بولسا دا باس بولا بىلەتىنىن كورسەتىپ، كوماندانىڭ كاپيتانى اتاندى. سودان كەيىن 16 جاستان باستاپ «الماتينوچكا» (الماتى قالاسى) كلۋبىنا اۋىسىپ، كوماندادا جاقسى ويىن ورنەگىن كورسەتىپ ءجۇردى. سونىڭ ناتيجەسىندە 17 جاسىندا قازاقستاننىڭ ۆولەيبولدان ايەلدەر قۇراماسىنا الىندى.

2020-جىلى ءسابيناعا سپورتتى ۋاقىتشا توقتاتۋعا تۋرا كەلدى. وسى جىلى ول سايات سالمان ۇلى دەگەن ازاماتقا تۇرمىسقا شىعىپ، كەلەسى جىلى ۇل بالانى دۇنيەگە اكەلدى. ەندى ۆولەيبولشى بالا كۇتىمىنە بايلانىستى دەمالىستان كەيىن ۇلكەن سپورتقا قايتا ورالىپ وتىر.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى