فۋتبولدان ەكى جىلعا شەتتەتىلگەن باۋىرجان يسلامحان ەل قۇراماسىنا شاقىرتۋ الدى
بۇل جونىندە قازاقستان فۋتبول فەدەراتسياسى ءمالىم ەتتى.
باۋىرجان يسلامحاننىڭ فۋتبولدان ەكى جىلعا شەتتەتۋ جازاسىنىڭ مەرزىمى اياقتالدى. ەندى ول كاسىپقوي كوماندامەن جاتتىعۋدى جالعاستىرۋىنا بولادى. بۇعان بايلانىستى ءتيىستى قۇجاتتار الىندى.
ايتا كەتەيىك، ەل قۇراماسىنىڭ باپكەرلەر قۇرامى ءبىر اي بويى باۋىرجان يسلامحانمەن جۇمىس جۇرگىزدى. ونىڭ قورىتىندىسى بويىنشا الماتىدا باستالاتىن جيىنعا شاقىرتۋ تۋرالى شەشىم قابىلداندى.
«باۋىرجان تۋرالى كوپ ەستىدىم. ونىڭ ەرەكشە تالانتى مەن مول تاجىريبەسى بار. الداعى وقۋ-جاتتىعۋ جيىنىندا ونىڭ فيزيكالىق دايىندىعىن قاراعىم كەلەدى. ويتكەنى، ەكى جىلداي ونىڭ ويىن تاجىريبەسى بولعان جوق. وقۋ-جاتتىعۋ جيىنىندا ونىڭ بابى قانداي ەكەنىن بايقاپ، الداعى ويىندارعا قانشالىقتى دايىن ەكەنىن انىقتايمىز»، - دەيدى ۇلتتىق قۇراما باپكەرى ماگومەد اديەۆ.
فۋتبولشى سوڭعى رەت ەل قۇراماسى ساپىندا 2020 -جىلدىڭ قىركۇيەگىندە بەلارۋس كومانداسىنا قارسى وينادى.
