الماتىدا «ساياحات» اۆتوبەكەتى ماڭىنان جاڭا ەمحانا سالىنادى
بۇل تۋرالى الماتى اكىمى ەربولات دوسايەۆتىڭ جەتىسۋ اۋدانىنىڭ تۇرعىندارىمەن كەزدەسۋ كەزىندە اۋدان اكىمى گۇلنار كوكەبايەۆا ايتتى، دەپ حابارلايدى قازاقپارات ءتىلشىسى.
كەزدەسۋ بارىسىندا قالا تۇرعىنى ەمحاناعا جەتۋ قيىن ەكەنىن، سوندىقتان جاقىن جەردەن ەمحانا سالىپ بەرۋدى سۇرادى.
«ءبىز «ساياحات» جاقتا تۇرامىز. ءبىزدىڭ بەكىتىلگەن №2-ەمحاناعا جەتۋ قيىن، سەبەبى، ول بىزدەن الىس جەردە ورنالاسقان. ونىڭ ۇستىنە ءبىز جاقتا كوپ قارت ادامدار مەن كوپبالالى وتباسىلار تۇرادى. سىزدەن ەمحانانى بىزگە جاقىن اۋداندا سالىپ بەرۋىڭىزدى سۇرايمىن»، - دەدى قالا تۇرعىنى.
جەتىسۋ اۋدانىنىڭ اكىمى گۇلنار كوكەبايەۆا اۋداندا جاڭا ەمحانانىڭ جوبالىق- سمەتالىق قۇجاتى ازىرلەنىپ جاتقانىن ايتتى.
«ءبىز سيدوركين، 14 مەكەنجايىنان عيمارات ساتىپ الدىق. جىل سوڭىنا قاراي جوبالىق- سمەتالىق قۇجاتتى ازىرلەۋ جۇمىستارى اياقتالىپ، ساراپتامادان شىعادى. كەلەسى جىلى كۇردەلى جوندەۋ جۇمىستارىن باستاعالى وتىرمىز. مۇمكىن 2024 -جىلدىڭ باسىندا ەمحانا اشامىز»، - دەدى جەتىسۋ اۋدانىنىڭ اكىمى گۇلنار كوكەبايەۆا.
