ورالدا توك سوعىپ، ەكى قولىنان ايىرىلعان بالانىڭ اتا- اناسىنا پاتەر بەرىلدى
اتالمىش تۇرعىن ءۇيدى «Aqjaiyq» ا ك ك» ا ق تاپسىرىسىنا سايكەس «التيم» ج ش س قۇرىلىس كومپانياسى سالىپ ءبىتىردى.
جالپى اۋدانى 10583,5 شارشى مەتر بولاتىن ءۇيدىڭ 72 پاتەرى ءبىر، 72 سى ەكى جانە 36 سى ءۇش بولمەلىك.
پاتەرلەر تۇرعىن ءۇي كەزەگىندە تۇرعان «وتباسى بانك» سالىمشىلارىنا بەرىلدى.
جاڭا پاتەر يەلەرىن ورال قالاسى اكىمىنىڭ ورىنباسارى اسحات كولبايەۆ قۇتتىقتاپ، كىلتتەرىن تابىس ەتتى.
ب ق و اكىمدىگىنەن ءمالىم ەتكەنىندەي، «جايىق مۇناي» كومپانياسىنىڭ قولداۋىمەن وسى جاڭا ۇيدەن وبلىس اكىمى عالي ەسقاليەۆتىڭ اتىنان جاڭاقالا اۋدانىندا توك سوعىپ، ەكى قولىنان ايىرىلعان امانجول ورىنبەك ۇلىنىڭ اتا-اناسىنا ءۇش بولمەلى پاتەر بەرىلدى.
بالانىڭ اناسى اسەل سەرىك قىزى تاڭداعان پاتەر الەۋمەتتىك نىساندارعا (مەكتەپ، اۋرۋحانا) جاقىن ورنالاسقان. سونىمەن قاتار جاڭاقالا اۋدانى اكىمدىگى اتىنان دەمەۋشىلەر اتىنان امانجولدىڭ بولمەسىنە جيھاز تارتۋ ەتىلدى.
وعان قوسا جۋىردا الماتى قالاسىندا امانجولدىڭ قولىنا ۋاقىتشا پروتەز ورناتىلدى. بالا جاساندى قولعا ۇيرەنگەننەن كەيىن ءبىر جىلدان سوڭ بيونيكالىق پروتەز قويىلادى.
ەسكە سالا كەتەيىك، بۇدان بۇرىن توك سوققان ەكى بالانىڭ اۋرۋحاناعا تۇسكەنىن، ب ق و اكىمىنىڭ توك سوققان بالاعا ءتيىسى كومەك كورسەتىلەتىنى تۋرالى ايتقانىن جازعان بولاتىنبىز.
سونداي-اق ب ق و-دا توك سوعىپ، ەكى قولىنان ايىرىلعان بالا وقيعاسى بويىنشا قىلمىستىق ءىس قوزعالدى.
