ۋكراينادا سوعىس قالاي ءجۇرىپ جاتىر؟
ۋكراينا ەكونوميكا ءمينيسترىنىڭ سوزىنشە، مەملەكەتتىك قىزمەتكەرلەر سانىن قىسقارتۋ سەكىلدى جۇمىستار دا اتقارىلىپ جاتىر.
Massaget.kz ءتىلشىسى ۋكراينادا كەيىنگى احۋالعا شولۋ جاسادى.
ۋكراينانىڭ ج ءى و- ءى 39 پايىزعا قىسقارۋى مۇمكىن - ەكونوميكا ءمينيسترى
ۋكراينا ەكونوميكا ءمينيسترى يۋليا سۆيريدەنكو رەسەيدىڭ ازاماتتىق ينفراقۇرىلىمعا جاساعان شابۋىلدارى سالدارىنان ج ءى و 35 پايىزدان 39 پايىزعا دەيىن قۇلدىراۋى مۇمكىن ەكەنىن ايتتى. ونىڭ ايتۋىنشا، ۇكىمەت شىعىندى قىسقارتۋ بويىنشا ءبىرقاتار شارانى قولعا الىپ جاتىر. مىسالى، مەملەكەتتىك قىزمەتكەرلەر سانىن قىسقارتۋعا تىرىسۋ، شاعىن مەملەكەتتىك كاسىپورىنداردى جەكەشەلەندىرۋگە ۇمتىلۋ.
«ءبىزدىڭ ەسەپ بويىنشا، بلەكاۋتتار الداعى بىرنەشە اپتادا جالعاسسا، ۋكراينانىڭ ج ءى و كولەمى ودان دا تومەندەيدى، مۇمكىن 39 پايىزعا دەيىن»، - دەپ اتاپ ءوتتى ۋكراينا ەكونوميكا مينيسترلىگىنىڭ باسشىسى.
رەسەي حەرسون وبلىسى «باسشىسىنىڭ ورىنباسارى» قايتىس بولعانىن حابارلادى
رەسەيدىڭ ايماقتىق ۇكىمەتىنىڭ باسپا ءسوز قىزمەتى رەسەي فەدەراتسياسى تاراپىنان تاعايىندالعان «اكىمشىلىك باسشىسىنىڭ ورىنباسارى» كيريلل ستروموۋسوۆ حەرسون - ارميان تاسجولىنداعى اپاتتان قازا بولعانىن حابارلادى. ستروەموۋسوۆتىڭ ءولىمىن حەرسون وبلىسى اكىمشىلىگى باسشىسىنىڭ ورىنباسارى ەكاتەرينا گۋباريەۆا دا راستاعان.
سونىمەن قاتار، ۋكراينا بيلىگىنىڭ وكىلى، حەرسون وبلىستىق كەڭەسى باسشىسىنىڭ ورىنباسارى يۋري سوبوليەۆسكي كيريلل سترەموۋسوۆتىڭ ءولىمى ويلاستىرىلعان بولۋى مۇمكىن ەكەنىن جوققا شىعارماعان.
شويگۋ حەرسوننان اسكەردى شىعارۋعا بۇيرىق بەردى
رەسەي قورعانىس ءمينيسترى سەرگەي شويگۋ اسكەرىنە حەرسوننان شەگىنۋدى بۇيىردى. قالا دنەپر وزەنىنىڭ سولتۇستىگىندە، سول جاعالاۋىندا ورنالاسقان. شويگۋ مەن گەنەرال سەرگەي سۋروۆيكين ۋكراينالىق كۇش العا جىلجىعان كەزدە اسكەر وزەننىڭ ارعى جاعىندا قايتا جينالۋى كەرەگىن مالىمدەدى.
«قالىپتاسقان جاعدايدى جان-جاقتى باعالاي وتىرىپ، دنەپردىڭ سول جاق شىعىس جاعالاۋىندا قورعانىسقا ورنالاسۋ ۇسىنىلادى. حەرسون قالاسىنا جانە وزەننىڭ سول جاعالاۋىنداعى باسقا اۋداندارعا جۇك جەتكىزۋ ەندى مۇمكىن ەمەس»، - دەدى سۋروۆيكين بريفينگتە.
شويگۋ ونىڭ شەگىنۋ جانە باسقا جاعالاۋدا قورعانىس الۋ تۋرالى ۇسىنىسىمەن كەلىستى.
«اسكەردى شىعارۋعا كىرىسىپ، جەكە قۇرامنىڭ، قارۋ-جاراق پەن تەحنيكانىڭ دنەپر ارقىلى قاۋىپسىز ءوتۋىن قامتاماسىز ەتۋ ءۇشىن بارلىق شارانى جۇزەگە اسىرىڭىز»، - دەدى شويگۋ.
سۋروۆيكين شويگۋعا دنەپردىڭ باتىس جاعالاۋىنان 115 مىڭعا جۋىق ادام شىعارىلعانىن ايتتى.
ايتا كەتەيىك، رەسەي اسكەرى ۋكرايناعا باسىپ كىرگەن العاشقى كۇندەردە حەرسوندى باسىپ الدى.
رەسەيدىڭ حەرسوننان شەگىنۋى «ناقتى پروبلەمالارى» بارىن كورسەتەدى - بايدەن
ا ق ش پرەزيدەنتى دجو بايدەن رەسەيدىڭ حەرسوننان اسكەردى شىعارۋ تۋرالى بۇيرىعى ماسكەۋدىڭ سوعىستا «ناقتى پروبلەمالارى» بارىن كورسەتكەنىن مالىمدەدى.
«بۇل - رەسەيدە، رەسەي اسكەري كۇشتەرىندە ناقتى پروبلەمالارى بار ەكەنىنىڭ دالەلى. سىرتقى ساياسات سالاسىندا ۋكرايناداعى رەسەيدىڭ باسقىنشىلىعىنا قارسى تۇرۋدىڭ وسى ەكى پارتيالىق ءتاسىلىن جالعاستىرامىز دەپ ۇمىتتەنەمىن»، - دەدى بايدەن ۆاشينگتوندا.
ناتو باسشىسى ۋكراينانىڭ جەتىستىكتەرى «جىگەرلەندىرەتىنىن» ايتتى
ناتونىڭ باس حاتشىسى يەنس ستولتەنبەرگ باسىپ الىنعان اۋماقتى ۋكراينالىق اسكەردىڭ بوساتقانى «جىگەرلەندىرەتىنىن» ايتتى. ونىڭ سوزىنشە، جەڭىسكە ۋكراينا قارۋلى كۇشتەرىنىڭ ارەكەتى ارقىلى قول جەتكىزىلگەن، ءبىراق ول وداقتاستاردىڭ قولداۋىن دا اتاپ ءوتتى.
«ۋكراينا قارۋلى كۇشتەرى قول جەتكىزگەن جەڭىستەر، تابىستار باتىل، باتىر ۋكراينالىق ساربازدارعا تيەسىلى، ءبىراق، ارينە، ولاردىڭ ۇلى بريتانيادان، وداقتاستار مەن ناتو سەكىلدى سەرىكتەستەرىنەن الاتىن قولداۋى دا وتە ماڭىزدى»، - دەدى ستولتەنبەرگ.
رەسەي اسكەرىن حەرسوننان شىعارۋ تۋرالى ايتۋعا ەرتە - ۋكراينا پرەزيدەنتىنىڭ اعا كەڭەسشىسى
ۋكراينا پرەزيدەنتىنىڭ اعا كەڭەسشىسى ميحايل پودولياك رەسەي اسكەرىن حەرسوننان شىعارۋ تۋرالى ايتۋعا ءالى ەرتە ەكەنىن ايتتى. پودولياك رەسەي اسكەرى حەرسوندا قالعانىن، سوندىقتان ولار ساق بولاتىنىن اتاپ ءوتتى.
«حەرسون اسپانىندا ۋكراينا تۋى جەلبىرەگەنشە، ورىس اسكەرىنىڭ شىعارىلۋى تۋرالى ايتۋدىڭ ەش ءمانى جوق. رەسەي اسكەرىن حەرسوننان شىعارۋ تۋرالى ايتۋعا ءالى ەرتە، قالادا رەسەي فەدەراتسياسىنىڭ قارۋلى كۇشتەرىنىڭ توبى بار»، - دەدى پودولياك.
ە و ۋكراينانى 18 ميلليارد ەۋروعا قولداۋ جوسپارىن جاريالادى
ەۋروپالىق كوميسسيا 2023-جىلعا دەيىن ۋكرايناعا كومەك كورسەتۋگە باعىتتالعان 18 ميلليارد ەۋرو كولەمىندەگى ەكونوميكالىق قولداۋ جوسپارىن ۇسىندى. جوسپارعا سايكەس، ە و اي سايىن نەسيە تۇرىندە 1,5 ميلليارد ەۋرو بولەدى.
«ءبىز بۇل جاڭا قارجىلىق پاكەتتى ۋكراينا ءۇشىن شۇعىل قاجەتتىلىك كەزىندە ۇسىنامىز، ويتكەنى رەسەيلىك شابۋىل ينفراقۇرىلىمعا سوققى بەرۋدى جالعاستىرىپ جاتىر»، - دەدى كوميسسيانىڭ ۆيتسە-پرەزيدەنتى ۆالديس دومبروۆسكيس.
گەرمانيا ۋكرايناعا ارنالعان اسكەري كومەك ءتىزىمىن ۇسىندى
گەرمانيا ۇكىمەتى ۋكرايناعا جاڭا اسكەري كومەك ۇسىناتىنىن جاريالادى. قۇجاتتا 30 Dingo برونەترانسپورتەرى، Iris-T SLM اۋە قورعانىسى زىمىراندارى، ءتورت پيلوتسىز قورعانىس جۇيەسى، 18 بارلاۋ درونى، جۇك كولىكتەرى مەن جۇك تيەگىشتەر جەتكىزىلگەنى ايتىلعان.
تاعى بىرنەشە زەنيت زىمىراندارى، ونداعان ميناعا قارسى تانك پەن مينا تازالاعىش، سونداي-اق، بەس موبيلدى بارلاۋ جۇيەسىن جەتكىزۋ جۇمىستارى دايىندالعان. جەتكىزۋ مەرزىمى قاۋىپسىزدىك ماقساتىندا اتالماعان.
