ۇكىمەت باسشىسى مۇنايدان بيۋجەتكە تۇسەتىن قاراجات تۋرالى ايتتى
بۇل تۋرالى سەناتتىڭ جالپى وتىرىسىنان كەيىن ۇكىمەت باسشىسى ءاليحان سمايىلوۆ ايتتى، دەپ حابارلايدى قازاقپارات ءتىلشىسى.
«بيۋجەت كىرىستەرىنە توقتالساق، بيۋجەت پەن ۇلتتىق قور تۇسىمدەرىنىڭ ازايۋى بولمايتىنىن بايقاپ وتىرمىز. مىسالى، مۇناي سەكتورىنان ءبىر جىلدا ۇلتتىق قورعا 3,9 تريلليون تەڭگە ءتۇسىم جوسپارلانعان ەدى. ال 10 ايدىڭ قورىتىندىسى بويىنشا بۇل جوسپار قازىردىڭ وزىندە تريلليون تەڭگەگە ارتىعىمەن ورىندالعانىن كورىپ وتىرمىز»، - دەدى ءاليحان سمايىلوۆ سەناتتىڭ جالپى وتىرىسىنان كەيىنگى باسپا ءسوز ءماسليحاتىندا.
ۇكىمەت باسشىسى رەسپۋبليكالىق بيۋجەتكە تۇسەتىن كىرىستەرگە دە توقتالدى.
«رەسپۋبليكالىق بيۋجەتكە تۇسەتىن كىرىستەردى ايتاتىن بولساق، ءبىز ەكسپورتتىق كەدەندىك باج سالىعى بويىنشا جىلىنا 1,8 تريلليون تەڭگەنى جوسپارلاعان بولاتىنبىز. 10 ايدىڭ قورىتىندىسى بويىنشا قازىردىڭ وزىندە 1,4 تريلليون تەڭگە ءتۇستى، سونداي-اق قالعان قاراجات الداعى ەكى ايدا تۇسەدى. الەمدىك مۇناي نارىعىندا قالىپتاسىپ جاتقان كونيۋنكتۋرا مەن باعانىڭ ارقاسىندا بىزدە مۇناي-گاز سەكتورىنان ۇلتتىق قور مەن رەسپۋبليكالىق بيۋجەتكە تۇسەتىن بارلىق تۇسىمدەر تولىق كولەمدە قامتاماسىز ەتىلەدى»، - دەدى ءاليحان سمايىلوۆ.
